ក្រសួងការងារបានឱ្យដឹងនៅថ្ងៃនេះថា មានកម្មករម្នាក់បានស្លាប់និង៣៣នាក់រងរបួស ដោយសារឧបទ្ទវហេតុគ្រោះថ្នាក់ចរាចរណ៍បង្កឡើងដោយរថយន្តកុងទីន័រ នៅតាមបណ្តោយផ្លូវជាតិលេខ៤ ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ។
តាមសេចក្តីប្រកាសព័ត៌មានរបស់ក្រសួងការងារ និងបណ្តុះបណ្តាលវិជ្ជាជីវៈ គ្រោះថ្នាក់ចរាចរណ៍នេះបានកើតឡើងកាលពីម៉ោង៧យប់ថ្ងៃអង្គារម្សិលមិញ បង្កឡើងដោយរថយន្តកុងទីន័រមួយគ្រឿងបើកស្របទិសគ្នា ជ្រុលទៅបុករថយន្តដឹកកម្មករពីក្រោយចំនួនពីរគ្រឿង។
ក្រសួងបន្តថា ហេតុការណ៍នេះបានបណ្តាលឱ្យកម្មករនិយោជិតរងគ្រោះសរុប៣៤នាក់ ក្នុងនោះស្លាប់១នាក់ របួសធ្ងន់១១នាក់ និងរបួសស្រាល២២នាក់ ។
បើតាមក្រសួង សពកម្មករដែលបានស្លាប់ត្រូវបានបញ្ជូនទៅឱ្យក្រុមគ្រួសារធ្វើបុណ្យតាមប្រពៃណីនៅខេត្តព្រះសីហនុ ខណៈអ្នករងរបួសកំពុងព្យាបាលនៅមន្ទីរពេទ្យរដ្ឋនិងឯកជនក្នុងខេត្តនេះ។
របាយការណ៍របស់ក្រុមការងារសុវត្ថិភាពចរាចរណ៍ផ្លូវគោក សម្រាប់គាំពារកម្មករនិយោជិត ដែលបានផ្សព្វផ្សាយកាលពីថ្ងៃទី២៩ ខែកក្កដា បានឱ្យដឹងថា គិតក្នុងឆមាសទី១ (រយៈពេល៦ខែ) ឆ្នាំនេះ ករណីគ្រោះថ្នាក់ចរាចរណ៍ទៅលើរថយន្តដឹកកម្មករនិយោជិត បានកើតឡើងចំនួន៨ករណីនិងបង្កឱ្យមានជនរងគ្រោះចំនួន២២៣នាក់ ក្នុងនោះស្លាប់ចំនួន២នាក់ របួសធ្ងន់៣២នាក់ និងរបួសស្រាល១៨៩នាក់។
របាយការណ៍បន្តថា គ្រោះថ្នាក់កើតឡើងដោយរ៉ឺម៉កបណ្តាលឱ្យកម្មកររងគ្រោះចំនួន២នាក់ គ្រោះថ្នាក់ដោយសារកង់បណ្តាលឱ្យកម្មកររងគ្រោះ៣នាក់ និងគ្រោះថ្នាក់ដោយថ្មើរជើងបណ្តាលឱ្យកម្មកររងគ្រោះ១៨នាក់៕