រុស្ស៊ីបានប្រកាសដាក់ឱ្យប្រើប្រាស់វ៉ាក់សាំងបង្ការជំងឺកូវីដ១៩នៅថ្ងៃអង្គារម្សិលមិញ បន្ទាប់ពីចាប់ផ្តើមដាក់សាកល្បងលើមនុស្សនៅក្នុងខែឧសភា ដោយការសម្រេចនេះបាននាំឱ្យមានមន្ទិលចំពោះសុវត្ថិភាពរបស់វ៉ាក់សាំងក្នុងចំណោមអ្នកជំនាញ។
តាមសេចក្តីរាយការណ៍ពីសារព័ត៌មានរ៉យទ័រ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានបញ្ជាក់ពីជោគជ័យនេះនិងប្រកាសថា រុស្ស៊ីជាប្រទេសដំបូងបង្អស់ដែលអនុញ្ញាតឱ្យប្រើប្រាស់វ៉ាក់សាំងប្រឆាំងជំងឺផ្លូវដង្ហើមថ្មីដំបូងគេក្នុងលោក ក្រោយដាក់សាកល្បងនៅថ្ងៃទី១៧ ខែឧសភា។
ការសម្រេចនេះបានបន្សល់ទុកក្តីកង្វល់ពីក្រុមអ្នកវិទ្យាសាស្រ្តមួយចំនួន ដោយសារពួកគេមើលឃើញថា ដំណើរការពិសោធន៍ទើបសម្រេចត្រឹម១០ភាគរយ ហើយបារម្ភថា ម៉ូស្គូអាចនឹងផ្តោតលើកិត្យានុភាពរបស់ប្រទេសជាជាងសុវត្ថិភាពសុខភាពសាធារណៈ។
យ៉ាងណា លោក ពូទីន និងមន្រ្តីរបស់លោក បានច្រានចោលក្តីកង្វល់ទាំងនោះ ដោយអះអាងថា វ៉ាក់សាំងរបស់ខ្លួនមានសុវត្ថិភាពពេញលេញ។ លោក ពូទីន បន្ថែមថា កូនស្រីម្នាក់របស់លោកបានស្ម័គ្រចិត្តសាកល្បងរួចហើយនិងមិនមានផលប៉ះពាល់អ្វីទេ។
មេដឹកនាំរូបនេះថ្លែងក្នុងកិច្ចប្រជុំរដ្ឋាភិបាលថា វ៉ាក់សាំង Sputnik V មានប្រសិទ្ធភាពខ្ពស់និងអាចបង្កើតប្រព័ន្ធភាពផ្សំាំក្នុងខ្លួនមនុស្សប្រឆាំងនឹងមេរោគកូរ៉ូណាថ្មីបានយ៉ាងល្អ ដោយលោកថា វាបានឆ្លងកាត់គ្រប់ដំណាក់កាលសាកល្បងចាំបាច់អស់ហើយ។
តាមប្រភពពីមន្រ្តីរដ្ឋាភិបាលដែលភ្នាក់ងាររ៉យទ័រទទួលបាន ឱ្យដឹងថា វ៉ាក់សាំងនេះអាចនឹងចាប់ផ្តើមដំណើរការផលិតក្នុងស្រុកជាលក្ខណៈទ្រង់ទ្រាយធំចាប់ពីខែតុលា ខណៈរដ្ឋាភិបាលបានទទួលសំណើកក់ទុកពីក្រៅប្រទេសចំនួន១ពាន់លានដបរួចទៅហើយ។
ដោយឡែក ក្រុមអាជ្ញាធរសង្ឃឹមថា វ៉ាក់សាំងនេះនឹងជួយស្តារសេដ្ឋកិច្ចរុស្ស៊ីដែលកំពុងដាំក្បាលចុះដោយសារការឆ្លងរាលដាលនៃមេរោគឱ្យរស់រវើកឡើងវិញ ខណៈក្រុមហ៊ុនផលិតក្នុងស្រុករំពឹងថា ខ្លួននឹងអាចចាប់ផ្តើមផលិតសម្រាប់ទីផ្សារសកលនៅដំណាច់ឆ្នាំ។
តាមការចុះផ្សាយរបស់រ៉យទ័រ វ៉ាក់សាំងនេះមិនទាន់ឆ្លងកាត់ពិសោធន៍ដំណាក់កាលទី៣ ដែលជាការតេស្តសាកល្បងលើអ្នកស្ម័គ្រចិត្តក្នុងចំនួនច្រើនដល់រាប់ពាន់នាក់ ដើម្បីធានាពីសុវត្ថិភាពរបស់វ៉ាក់សាំងចំពោះសុខភាពមនុស្សតាមវ័យផ្សេងគ្នានៅឡើយទេ។
អង្គការសុខភាពពិភពលោក WHO ក៏បានស្នើទៅរដ្ឋាភិបាលរុស្ស៊ី ដើម្បីបានពិនិត្យលើរបាយការណ៍នៃការសាកល្បងវ៉ាក់សាំងនេះ។ សំណើនេះមិនទាន់មានការឆ្លើយតបទេ។
លោក Mikhail Murashko រដ្ឋមន្ត្រីក្រសួងសុខាភិបាលរុស្ស៊ី ថ្លែងថា គុណភាពវ៉ាក់សាំងនេះ មិនមានអ្វីគួរសង្ស័យទេ ហើយថា ការបង្ហាញក្តីបារម្ភនានា ដោយសារប្រទេសផ្សេងៗច្រណែនជាមួយរុស្ស៊ីតែប៉ុណ្ណោះ។
ទាក់ទងនឹងបញ្ហានេះ សមាគម ACTO ដែលជាភ្នាក់ងារតំណាងក្រុមអ្នកផលិតឱសថធំបំផុតនៅរុស្ស៊ី បានទទូចឱ្យរដ្ឋាភិបាលក្រុងម៉ូស្គូពន្យារពេលចេញច្បាប់អនុញ្ញាតឱ្យប្រើប្រាស់វ៉ាក់សាំងនេះរហូតដល់ដំណើរការពិសោធន៍ជំហានចុងក្រោយបានបញ្ចប់ដោយជោគជ័យ។
ប្រភពដដែលលើកឡើងថា ការសម្រេចទាំងប្រញាប់បែបនេះ នឹងនាំឱ្យអ្នកប្រើប្រាស់វ៉ាក់សាំងប្រឈមផលប៉ះពាល់ផ្នែកសុខភាពខ្ពស់ ពិសេសអ្នកដែលមានប្រព័ន្ធភាពផ្សាំក្នុងខ្លួនខ្សោយដូចជាមនុស្សចាស់និងអ្នកដែលមានជំងឺផ្សេងៗក្នុងខ្លួនស្រាប់ជាដើម។
បើតាមអង្គការ WHO បច្ចុប្បន្នវ៉ាក់សាំងប្រឆាំងកូវីដ១៩ច្រើនជាង១០០មុខផ្សេងគ្នា កំពុងត្រូវបានអភិវឌ្ឍនៅជុំវិញពិភពលោក។ ក្នុងនោះ មានយ៉ាងហោច៤មុខដែលបានកំពុងឋិតក្នុងដំណាក់កាលពិសោធន៍ចុងក្រោយលើមនុស្ស៕
