ក្រសួងមហាផ្ទៃសម្រេចផ្អាកការងារលោក អ៊ុក កុសល ពីស្នងការនគរបាលខេត្តកំពង់ធំជាបណ្ដោះអាសន្ន ខណៈដែលស្នងការរូបនេះបានរងនូវបណ្តឹងរបស់មន្ត្រីក្រោមឱវាទជាស្ត្រី ថាបានបៀតបៀនកេរ្តិ៍ភេទទៅលើពួកគេ។
យោងតាមប្រកាសរបស់ក្រសួងមហាផ្ទៃ ស្តីពីការផ្អាកការងារបណ្តោះអាសន្នមន្ត្រីនគរបាលជាតិ ចុះថ្ងៃទី១២ ខែសីហា បានសម្រេចផ្អាកការងារបណ្តោះអាសន្នលោកឧត្តមសេនីយ៍ទោ អ៊ុក កុសល ស្នងការនៃស្នងការដ្ឋាននគរបាលខេត្តកំពង់ធំ និងតម្រូវឱ្យលោកត្រូវទៅបង្ហាញខ្លួននៅនាយកដ្ឋានបុគ្គលិករៀងរាល់ម៉ោងធ្វើការ ដើម្បីរង់ចាំការសម្រេចជាថ្មី។
ប្រកាសចំនួនពីរទៀតរបស់ក្រសួង ចុះថ្ងៃទី១២ ខែសីហាដែរនោះ បានសម្រេចប្រគល់ភារកិច្ចឱ្យ លោកឧត្តមសេនីយ៍ត្រី អ៊ិត គឹមស៊្រន ពីស្នងការរងទៅជាស្នងការស្តីទីនៃស្នងការដ្ឋាននគរបាលខេត្តកំពង់ធំ និងបានផ្ទេរភារកិច្ចលោកឧត្តមសេនីយ៍ត្រី អ៊ឹម សុគឿន ពីស្នងការរងទទួលផែនការងារធនធានមនុស្សនៃស្នងការដ្ឋាននគរបាលខេត្តកំពង់ធំ ឱ្យទៅបម្រើការងារនៅនាយកដ្ឋានបុគ្គលិក។
អភិបាលខេត្តកំពង់ធំ លោកសុខ លូ បញ្ជាក់យ៉ាងខ្លីថា លោកទើបតែទទួលបានព័ត៌មានពីការផ្អាកការងារស្នងការនគរបាលខេត្តរូបនេះ ចំពោះរឿងលម្អិតយ៉ាងណានោះ លោកពុំបានដឹងទេ។
កាលពីពេលថ្មីៗនេះ មានការបែកធ្លាយនូវពាក្យបណ្តឹងមួយដែលបានរៀបរាប់ពីដំណើររឿង ដោយចោទស្នងការនគរបាលខេត្តកំពង់ធំ លោក អ៊ុក កុសល ថាបានបំពានកេរ្តិ៍ភេទទៅលើមន្ត្រីនគរបាលជាស្ត្រីនៅខេត្តកំពង់ធំជាច្រើននាក់ និងប្រើអំណាចមិនឱ្យមន្ត្រីនគរបាលទាំងនោះរើបម្រាសទៀតផង។
ករណីនេះ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានបញ្ជាក់កាលពីថ្ងៃទី១១ ខែសីហាថា អគ្គស្នងការនគរបាលជាតិ លោក នេត សាវឿន និងអភិបាលខេត្តកំពង់ធំ លោក សុខ លូ ជាអ្នកទទួលភារៈពិនិត្យមើលលើបណ្ដឹងបកអាក្រាតរឿងអាស្រូវរបស់ស្នងការខេត្តកំពង់ធំ លោក អ៊ុក កុសល នេះ។
លោក ស ខេង មានប្រសាសន៍ថា៖ «ក្នុងស្នងការហ្នឹងមានបញ្ហា ការពិតខ្ញុំបានព្រមានម្ដងហើយ ខ្ញុំក៏បានសន្យាហើយថា ក្រោយពីបានព្រមានហើយ បើមិនកែប្រែ មានតែឈានមួយជំហានទៀត គឺការពិន័យរដ្ឋបាលធ្ងន់ជាងនេះឬត្រូវដក។ បើរកឃើញថាប៉ះពាល់ស្ត្រីមែន នឹងអនុវត្តច្បាប់ ច្បាប់ធ្វើម៉េច ធ្វើអីចឹង។»
ទោះជាយ៉ាងណា វីអូឌី មិនអាចទាក់ទងស្នងការដ្ឋាននគរបាលខេត្តកំពង់ធំ លោក អ៊ុក កុសល និងដើមបណ្ដឹងទាំងអស់ដែលមានក្នុងលិខិតនោះ ដើម្បីសុំការបញ្ជាក់បន្ថែមបាននៅឡើយទេ នៅថ្ងៃនេះ។
លោក អ៊ុក កុសល ធ្លាប់ត្រូវបានរដ្ឋមន្ត្រីក្រសួងមហាផ្ទៃដាក់ពិន័យរដ្ឋបាលម្ដងរួចហើយកាលពីខែមីនា ក្រោមមូលហេតុខ្វះការយកចិត្តទុកដាក់លើការគ្រប់គ្រងនិងដឹកនាំ៕
