យុវតីខ្មែរថាវរៈម្នាក់ត្រូវបានអាជ្ញាធររាជធានីភ្នំពេញ បញ្ជូនខ្លួននិងសំណុំរឿងទៅសាលាដំបូងរាជធានីភ្នំពេញនៅរសៀលថ្ងៃសុក្រនេះ ខណៈមនុស្ស៥នាក់ទៀតកំពុងស្ថិតក្រោមការសាកសួរនៅស្នងការនគរបាលរាជធានីភ្នំពេញ។
កាលពីរសៀលថ្ងៃម្សិលមិញ អាជ្ញាធររាជធានីភ្នំពេញ បានចាប់ខ្លួនមនុស្ស៦នាក់ ក្នុងនោះមានយុវជនខ្មែរថាវរៈចំនួន៥នាក់ ដែលជាអ្នកសកម្មក្នុងការតវ៉ាទាមទារឱ្យមានការដោះលែងលោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា។
អ្នកដែលត្រូវបានអាជ្ញាធរចាប់ខ្លួននោះ រួមមានឈ្មោះ ហ៊ុន វណ្ណៈ, ឈឿន ដារ៉ាវី, សំណាង, ថា ឡាវី, យ៉ង សៀងហៃ និង ជា គន្ធីន។ បើតាមអាជ្ញាធររាជធានីភ្នំពេញ កញ្ញា ឈឿន ដារ៉ាវី ត្រូវបានសមត្ថកិច្ចចាប់ខ្លួនតាមដីការបស់តុលាការនិង៥នាក់ទៀតជាបទល្មើសជាក់ស្តែង។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានប្រាប់វីអូឌីថា យុវជនម្នាក់ក្នុងចំណោម៦នាក់ ត្រូវបានបញ្ជូនទៅសាលាដំបូងរាជធានីភ្នំពេញហើយ ខណៈ៥នាក់ទៀត កំពុងស្ថិតក្នុងនីតិវិធីសាកសួរ។
លោកថា៖ «ឈ្មោះ ឈឿន ដារ៉ាវី នៅវេលាថ្ងៃត្រង់នេះ សមត្ថកិច្ចបានបញ្ជូនគាត់ដល់តុលាការហើយ ហើយចំពោះយុវជន៥នាក់ទៀត យើងកំពុងធ្វើការសួរនាំតាមបញ្ជារបស់ព្រះរាជអាជ្ញាអមសាលាដំបូងរាជធានីភ្នំពេញ»។
យោងតាមដីកាឆែកឆេរលំនៅដ្ឋានរបស់ចៅក្រមស៊ើបសួរសាលាដំបូងរាជធានីភ្នំពេញ លោក ពេជ្រ វិជ្ជាធរ បញ្ជាក់ថា កញ្ញា ឈឿន ដារ៉ាវី ត្រូវបានចោទពីបទ «ញុះញង់ឱ្យមានភាពវឹកវរដល់សន្តិសុខសង្គម» ប្រព្រឹត្តនៅក្នុងប្រទេសកម្ពុជា កាលពីខែសីហា ឆ្នាំ២០២០។
ក្រោយពីលោក រ៉ុង ឈុន ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនបណ្តោះអាសន្ននៅពន្ធនាគារ ពីបទ «ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍» ពាក់ព័ន្ធនឹងបញ្ហាព្រំដែន កាលពីដើមខែសីហារួចមក យុវជនទាំង៦នាក់នេះបាននាំគ្នាធ្វើសកម្មភាពតវ៉ាមួយចំនួនដូចជា ការប្រមូលផ្តុំនៅមុខសាលាដំបូងរាជធានីភ្នំពេញ និងធ្វើយុទ្ធនាការដើរតាមដងវិថីមួយចំនួនក្នុងរាជធានីភ្នំពេញ ដើម្បីទាមទារឱ្យមានការដោះលែងលោក រ៉ុង ឈុន៕
