ក្រសួងទេសចរណ៍បានឱ្យដឹងថា វិបត្តិជំងឺកូវីដ១៩បានធ្វើឱ្យប៉ះពាល់ដល់ផ្នែកទេសចរណ៍ចំនួន៣ពាន់កន្លែងនិងប៉ះពាល់ដល់បុគ្គលិកជាង៥ម៉ឺននាក់នៅក្នុងប្រទេសកម្ពុជា។
រដ្ឋមន្ត្រីក្រសួងទេសចរណ៍ លោក ថោង ខុន ត្រូវបានហ្វេសប៊ុកក្រសួងស្រង់ប្រសាសន៍មកផ្សព្វផ្សាយកាលពីថ្ងៃម្សិលមិញថា គិតមកដល់ថ្ងៃទី១០ ខែកក្កដា បញ្ហាជំងឺកូវីដ១៩បានបង្កឱ្យមានផលប៉ះពាល់ផ្នែកទេសចរណ៍ដល់ជាង៣ពាន់ទីតាំង ហើយប៉ះពាល់ដល់បុគ្គលិកដែលបម្រើការងារនៅទីតាំងទាំងនេះជាង៥ម៉ឺននាក់ ប៉ុន្តែរាជរដ្ឋាភិបាលបានដាក់ចេញវិធានការជាច្រើន ដើម្បីជួយដល់បណ្តាប្រតិបត្តិករ ក៏ដូចជានិយោជិកដែលមានការប៉ះពាល់នេះ។
លោកបានបន្តថា៖ «រាជរដ្ឋាភិបាល មកដល់ថ្ងៃនេះ បានដាក់ចេញវិធានការជាចម្បងជុំទី៥ហើយ ដែលក្នុងនោះបានដោះស្រាយជួយដល់បុគ្គលិក និយោជក ដែលមានការប៉ះពាល់នេះ ជាង៣ម៉ឺននាក់នៅក្នុងវិស័យទេសចរណ៍នេះ ដោយផ្តល់ប្រាក់ឧបត្ថម្ភ៤០ដុល្លារក្នុងម្នាក់រយៈពេល២ខែ ហើយជុំទី៥នេះផ្តល់២ខែបន្តទៀត»។
ចំពោះផ្នែកឯកជនវិញ លោក ថោង ខុន បានគូសបញ្ជាក់ថា ប្រតិបត្តិករនិងអាជីវករដែលជាម្ចាស់ភោជនីយដ្ឋាន រាជរដ្ឋាភិបាលបានផ្តល់ការលើកលែងពន្ធអាជីវកម្មនិងមិនឱ្យអាជីវករបង់ប្រាក់វិភាគទានសម្រាប់ ប.ស.ស ទេ ប៉ុន្តែក្នុងដំណាក់កាលនេះ និយោជិតនៅតែទទួល ប.ស.ស ពីរាជរដ្ឋាភិបាលដដែល។
លោកបានបន្តថា គ្រប់អាជ្ញាបណ្ណទេសចរណ៍ទាំងអស់ អាចទៅសុំអាជ្ញាបណ្ណបាន ប៉ុន្តែមិនតម្រូវឱ្យមានការបង់កម្រៃអាជ្ញាបណ្ណឡើយ ហើយចំពោះមគ្គទេសក៍ទេសចរណ៍ ទោះបីមិនបានប្រាក់ឧបត្ថម្ភ៤០ដុល្លារ ក៏ប៉ុន្តែអាជ្ញាបណ្ណមគ្គទេសក៍ ក៏រាជរដ្ឋាភិបាលមិនឱ្យយកកម្រៃដែរ។
នៅព្រឹកថ្ងៃព្រហស្បតិ៍នេះដែរ ប្រធានគណៈកម្មការអប់រំ យុវជន ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា (គណៈកម្មការទី៧) លោក ហ៊ុន ម៉ានី ក៏បានជួបប្រជុំជាមួយរដ្ឋមន្ត្រីក្រសួងទេសចរណ៍ ដើម្បីពិភាក្សាអំពីវិធានការជាដំណោះស្រាយចំពោះវិស័យទេសចរណ៍ក្នុងបរិបទកូវីដ១៩និងក្រោយកូវីដ១៩ ព្រមទាំងពិនិត្យលទ្ធភាពបង្កើនសកម្មភាពទេសចរណ៍ក្នុងប្រទេសកម្ពុជា។
ក្នុងកិច្ចប្រជុំនោះ លោក ហ៊ុន ម៉ានី បានស្នើនិងជំរុញឱ្យក្រសួងទេសចរណ៍បន្តសកម្មភាពរបស់ខ្លួន ជាពិសេសក្នុងកិច្ចការជំរុញចលនាទេសចរណ៍ ដោយផ្តោតចម្បងលើការកសាងទំនុកចិត្តដល់ភ្ញៀវទេសចរជាតិនិងអន្តរជាតិ។
លោកក៏បានលើកទឹកចិត្តឱ្យក្រសួងបន្តកិច្ចសហការជិតស្និទ្ធជាមួយអន្តរជាតិ ជាពិសេសប្រទេសក្នុងតំបន់អាស៊ាន ដើម្បីចូលរួមជំរុញចលនាទេសចរណ៍ផ្ទៃក្នុងអាស៊ាននៅក្នុងដំណាក់កាលសមស្របណាមួយ ដែលចរន្តនិងលំហូរទេសចរណ៍ផ្ទៃក្នុងតំបន់អាចដំណើរការវិញបាន។
លោកបានបញ្ជាក់ថា៖ «ក្នុងដំណាក់កាលនេះ ការបង្កើនបរិយាកាសទេសចរណ៍ដែលគួរឱ្យទុកចិត្តនិងដោយមានសុវត្ថិភាពពីជំងឺកូវីដ១៩ ព្រមទាំងការធានាស្តង់ដារនៃការការពារ មើលថែប្រកបដោយការយកចិត្តទុកដាក់ គឺជាកត្តាសំខាន់ក្នុងការជំរុញឧស្សាហកម្មទេសចរណ៍ឱ្យដំណើរការបានជាធម្មតា ក៏ដូចជាការចូលរួមជំរុញកំណើនសេដ្ឋកិច្ចជាតិផងដែរ»៕
