លោកនាយករដ្ឋមន្ត្រី ហ៊ុន សែន ព្រមានបន្តចាប់ក្រុមអ្នកប្រឆាំងដែលនិយាយរិះគន់រដ្ឋាភិបាលជុំវិញរឿងព្រំដែនទាំងអស់ ដោយលោកបញ្ជាក់ថា ការនិយាយបរិហារខុសការពិតអាចនាំឱ្យមានសង្គ្រាមជាមួយប្រទេសជិតខាង។
ក្នុងពិធីបើកសម្ពោធសួនទឹក «ហ្គាឌិនស៊ីធី» ស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ លោកនាយករដ្ឋមន្ត្រី ហ៊ុន សែន បានថ្លែងនាព្រឹកនេះថា ក្រុមអ្នកដែលរិះគន់រដ្ឋាភិបាលថា ធ្វើឲ្យកម្ពុជាបាត់បង់ទឹកដីមួយផ្នែកទៅវៀតណាមដោយសារការបោះបង្គោលព្រំដែន ត្រូវបានសមត្ថកិច្ចចាប់ខ្លួនជារឿងត្រឹមត្រូវតាមច្បាប់។ លោកបន្តថា បើរដ្ឋាភិបាលមិនទប់ស្កាត់ក្រុមអ្នករិះគន់នោះឲ្យបានទាន់ពេលទេ អាចធ្វើឲ្យកម្ពុជាមានសង្គ្រាមជាមួយប្រទេសជិតខាង។
លោកថ្លែងថា៖ «បញ្ហាព្រំដែនមិនមែនជាបញ្ហាលេងសើច ហើយវាអាចមានសង្គ្រាមជាមួយប្រទេសជិតខាងតាមរយៈមាត់ដែលអ្នកឯងថា ចាំមើលមានអ្នកនិយាយ[រឿងព្រំដែន]ប៉ុន្មាននាក់ចេញមកទៀត សុំផ្ញើសារ មានចេញប៉ុន្មានចាប់ប៉ុណ្នឹង រឿងព្រំដែនមិនឲ្យរញ៉េរញ៉ៃទេ កុំថាហ៊ុន សែន ផ្តាច់ការ អ្នកខ្លះចេញមកថា តស៊ូមតិ អត់តស៊ូមតិទេ នេះជារឿងផ្លូវច្បាប់សុទ្ធសាត »។
ពាក់ព័ន្ធរឿងព្រំដែននេះ លោក រ៉ុង ឈុន ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនបណ្តោះអាសន្ននៅពន្ធនាគារ ពីបទ «ញុះញង់ឱ្យមានការប្រព្រឹត្តបទឧក្រិដ្ឋជាអាទិ៍» ពាក់ព័ន្ធនឹងបញ្ហាព្រំដែន កាលពីដើមខែសីហារួចមក យុវជននៃក្រុមខ្មែរថាវរៈបាននាំគ្នាធ្វើសកម្មភាពតវ៉ាមួយចំនួនដូចជា ការប្រមូលផ្តុំនៅមុខសាលាដំបូងរាជធានីភ្នំពេញ និងធ្វើយុទ្ធនាការដើរតាមដងវិថីមួយចំនួនក្នុងរាជធានីភ្នំពេញ ដើម្បីទាមទារឱ្យមានការដោះលែងលោក រ៉ុង ឈុន។
ក្រោយមក នៅរសៀលថ្ងៃទី១៣ ខែសីហា អាជ្ញាធររាជធានីភ្នំពេញ បានចាប់ខ្លួនមនុស្ស៦នាក់ ក្នុងនោះមានយុវជនខ្មែរថាវរៈចំនួន៥នាក់ ដែលជាអ្នកសកម្មក្នុងការតវ៉ាទាមទារឱ្យមានការដោះលែងលោក រ៉ុង ឈុន សមាជិកក្រុមប្រឹក្សាឃ្លាំមើលកម្ពុជា។
ចំណែក ប្រធានគណបក្សខ្មែរឈ្នះ លោក សួង សុភ័ណ្ឌ ត្រូវបានសមត្ថកិច្ចឃាត់ខ្លួនតាមដីកាតុលាការ កាលពីថ្ងៃ១៤ សីហានេះ នៅគេហដ្ឋានរបស់លោក ស្ថិតនៅក្នុងខណ្ឌទួលគោក រាជធានីភ្នំពេញ បន្ទាប់ពីលោកដឹកនាំក្រុមកងារចុះទៅពិនិត្យមើលបង្គោលព្រំដែនកម្ពុជា-វៀតណាម ស្ថិតនៅស្រុកពញ្ញាក្រែក ខេត្តត្បូងឃ្មុំ។ លោកត្រូវបានចោទប្រកាន់ពីបទ «ញុះញង់បំភ្លៃការពិតលើបញ្ហាព្រំដែន និងការចោទប្រកាន់មួលបង្កាច់ទម្លាក់កំហុស មកលើគណៈកម្មាធិការចម្រុះកិច្ចការព្រំដែនកម្ពុជា ថាប្រព្រឹត្តបទល្មើសក្បត់ជាតិលើរឿងព្រំដែនកម្ពុជា-វៀតណាម»៕
