ភាគីវៀតណាមបញ្ជាក់ថា ខ្លួនត្រៀមកញ្ចប់ថវិកាទុកជាស្រេចសម្រាប់ជួយកសាងអគាររដ្ឋបាលសម្រាប់រដ្ឋសភាកម្ពុជាប្រើប្រាស់។
នៅក្នុងជំនួបរវាងលោក ហេង សំរិន ប្រធានរដ្ឋសភាកម្ពុជា និងលោកស្រី ង្វ្រៀន ធីគឹមងិន ប្រធានរដ្ឋសភាវៀតណាម នៅទីក្រុងហាណូយកាលពីម្សិលមិញ ខាងភាគីវៀតណាមបញ្ជាក់ថា បានត្រៀមកញ្ចប់ថវិការួចស្រេចហើយក្នុងការកសាងអគាររដ្ឋបាលសភាកម្ពុជា។
ខ្លឹមសារក្នុងហ្វេសប៊ុក លោក ហេង សំរិន៖«លោកជំទាវ ង្វៀន ធី គឹមងិន បានគូសបញ្ជាក់ថា រហូតមកដល់ពេលនេះ ភាគីវៀតណាមបានត្រៀមបញ្ចប់ថវិការួចជាស្រេច ក្នុងការផ្តល់ជំនួយសាងសង់អគាររដ្ឋបាលរដ្ឋសភាកម្ពុជា ដោយរងចាំភាគីកម្ពុជាបញ្ជាក់អំពីការបំពេញលក្ខខណ្ឌចូលជាធរមាននៃកិច្ចព្រមព្រៀងតែប៉ុណ្ណោះ»។
ក្នុងឱកាសនោះ លោក ហេង សំរិន ក៏បានថ្លែងអំណរគុណដល់ភាគីវៀតណាមដែលបានជួយលុយកសាងអគាររដ្ឋបាលនៃសភាកម្ពុជា។
ខ្លឹមសារក្នុងហ្វេសប៊ុក លោក ហេង សំរិន៖«សម្តេចអគ្គមហាពញាចក្រី ហេង សំរិន បានថ្លែងអំណរគុណជាថ្មី ចំពោះវៀតណាម ដែលបានផ្តល់ជំនួយ ២៥ លានដុល្លាអាមេរិក សម្រាប់កសាងអាគាររដ្ឋបាលរដ្ឋសភាកម្ពុជា។ រដ្ឋសភាកម្ពុជានឹងប្រើប្រាស់ថវិកាសាងសង់នោះ ប្រកបដោយតម្លាភាព ជាទីបំផុត ហើយថាសំណង់ជំនួយដ៏ថ្លៃថ្លានេះនឹងលេចជារូបរាងក្នុងពេលឆាប់ៗនេះ»។
ក្នុងជំនួបរវាងលោក ហេង សំរិន និងលោកស្រី ង្វ្រៀន ធីគឹមងិន ក៏បានលើកឡើងពីការប្តេជ្ញាចិត្តក្នុងដំណើរការបោះបង្គោលព្រំដែន ការរួមគ្នាទប់ស្កាត់ការឆ្លងរាលដាលមេរោគកូវីដ១៩ និង ការបង្កើនទំហំពាណិជ្ជកម្មផងដែរ៕