ថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ស្វាគមន៍និងគាំទ្រក្រុមហ៊ុនចិន លើគម្រោងវិនិយោគប្រមូលទិញនិងនាំចេញប្រភេទផ្លែឈើស្រស់មួយចំនួនពីប្រទេសកម្ពុជាទៅកាន់ទីផ្សារប្រទេសចិន។
ការគាំទ្រនេះបានធ្វើឡើងនៅក្នុងជំនួបពិភាក្សាការងាររវាងរដ្ឋមន្ត្រីក្រសួងកសិកម្មកម្ពុជា លោក វេង សាខុន និងអគ្គនាយកក្រុមហ៊ុន ធៀន ធៀន លោក Wang Bingham កាលពីរសៀលថ្ងៃម្សិលមិញ ពាក់ព័ន្ធនឹងគម្រោងវិនិយោគរបស់ក្រុមហ៊ុនក្នុងវិស័យកសិកម្មនៅកម្ពុជា។ នេះបើតាមការផ្សព្វផ្សាយក្នុងទំព័រហ្វេសប៊ុកផ្លូវការរបស់ក្រសួងកសិកម្ម។
ក្នុងជំនួបនោះ លោក Wang Bingham មានប្រសាសន៍ថា ក្រោយពីក្រុមហ៊ុនបានធ្វើទស្សនកិច្ចសិក្សាស្វែងយល់ពីផលិតផលនិងគុណភាពនៃផ្លែស្វាយ មៀន ខ្នុរ ធុរេន ដូងក្រអូប និងក្រូចថ្លុងរបស់កម្ពុជារួចមក លោកជឿជាក់ថា ផលិតផលទាំងនេះនឹងមានការគាំទ្រនិងមានទីផ្សារខ្ពស់នៅប្រទេសចិន នៅពេលដែលក្រុមហ៊ុនដាក់លក់នៅលើប្រព័ន្ធទីផ្សារពាណិជ្ជកម្មព័ត៌មានវិទ្យាផ្ទាល់របស់ក្រុមហ៊ុន។
លោកក៏បានស្នើដល់ក្រសួងនិងមន្ត្រីជំនាញពាក់ព័ន្ធ ផ្តល់ព័ត៌មានពាក់ព័ន្ធនឹងទីផ្សារប្រមូលទិញនិងនីតិវិធីនៃការនាំចេញផលិតផលទាំងនោះទៅប្រទេសចិន ដើម្បីឱ្យការអនុវត្តគម្រោងនេះទទួលបានជោគជ័យ។
ជាការឆ្លើយតប លោករដ្ឋមន្ត្រី វេង សាខុន បានលើកឡើងថា គម្រោងវិនិយោគរបស់ក្រុមហ៊ុន លើការប្រមូលទិញ កែច្នៃ វេចខ្ចប់ និងនាំចេញផ្លែឈើស្រស់កម្ពុជាចេញទៅប្រទេសចិន ធ្វើឡើងស្របតាមផែនការអភិវឌ្ឍន៍វិស័យកសិកម្មរបស់កម្ពុជា ដែលនឹងជំរុញសេដ្ឋកិច្ចជាតិឱ្យមានការរីកចម្រើន។
លោកបានណែនាំដល់ក្រុមហ៊ុនសហការជាមួយស្ថានទូតចិនប្រចាំកម្ពុជានិងស្ថាប័នពាក់ព័ន្ធ ដើម្បីសិក្សាស្វែងយល់បន្ថែមអំពីសក្តានុពលនៃផលិតកម្មឈើហូបផ្លែទាំងនោះ រួចរៀបចំចុះអនុស្សរណៈនៃការយោគយល់គ្នាជាមួយក្រសួង ដើម្បីឱ្យក្រសួងមានលទ្ធភាពអាចជួយសម្របសម្រួលក្នុងការធ្វើផលិតកម្មកសិកម្មតាមកិច្ចសន្យាជាមួយសហគមន៍និងនីតិវិធីនៃការនាំចេញ។
បើតាមលោករដ្ឋមន្ត្រី កន្លងមក រដ្ឋាភិបាលនិងប្រជាជនចិនបានផ្តល់កិច្ចសហប្រតិបត្តិការល្អជាមួយកម្ពុជាលើគ្រប់វិស័យ ជាពិសេសវិស័យកសិកម្ម ដោយភាគីចិនបានបង្កើនបរិមាណនៃការនាំចូលអង្ករកម្ពុជារហូតដល់៥០០ពាន់តោន និងបានអនុញ្ញាតឱ្យកម្ពុជានាំចេញចេកអំបូងលឿងនិងស្វាយស្រស់ ឆ្ពោះត្រង់ទៅកាន់ប្រទេសចិន កាលពីពេលថ្មីៗនេះ៕