ក្រសួងសាធារណការ និងដឹកជញ្ជូន បានណែនាំដល់ម្ចាស់រថយន្តដឹកទំនិញធុនធ្ងន់ យានយន្តុបករណ៍ រ៉ឺម៉ក និងសឺមីរ៉ឺម៉ក បិទស្លាកសញ្ញាចាំងពន្លឺ ដើម្បីបង្ការនិងទប់ស្កាត់គ្រោះថ្នាក់ចរាចរណ៍ផ្លូវគោក ពាក់ព័ន្ធនឹងយានជំនិះធុនធ្ងន់ដែលមានទម្ងន់សរុបអតិបរមាលើសពី៣,៥តោន។
សេចក្តីណែនាំរបស់ក្រសួងសាធារណការ និងដឹកជញ្ជូន ស្តីពីការបិទស្លាកសញ្ញាចាំងពន្លឺលើយានយន្តធុនធ្ងន់ ដែលបានផ្សព្វផ្សាយនៅថ្ងៃអង្គារនេះ បានលើកឡើងថា ស្លាកសញ្ញាចាំងពន្លឺបិទនៅលើយានជំនិះធុនធ្ងន់ទាំងនោះ ត្រូវមានពីរពណ៌ រួមមាន ពណ៌ក្រហមនិងពណ៌លឿង ដែលមានទទឹងមិនតិចជាង៥០មីលីម៉ែត្រ និងកម្រិតចាំងពន្លឺស្របតាមបទដ្ឋានបច្ចេកទេស VC104+។
ក្រសួងបន្តថា ស្លាកសញ្ញាចាំងពន្លឺពណ៌លឿង ត្រូវបិទនៅផ្នែកសងខាងតាមបណ្តោយយានជំនិះ ដែលមានប្រវែងមិនតិចជាង៨០%នៃប្រវែងបណ្តោយរបស់យានជំនិះ និងបិទនៅគែមខ្ពស់បំផុតតាមទម្រង់យានជំនិះ ខណៈស្លាកសញ្ញាចាំងពន្លឺពណ៌ក្រហម ត្រូវបិទនៅផ្នែកខាងក្រោយតាមទទឹងយានជំនិះ និងបិទនៅគែមខ្ពស់បំផុតតាមទម្រង់យានជំនិះ ប៉ុន្តែមិនតិចជាង៤០០មីលីម៉ែត្រពីគែម។
ក្រសួងក៏បានណែនាំឱ្យរថយន្តដឹកទំនិញធុនធ្ងន់ យានយន្តុបករណ៍ រ៉ឺម៉ក ឬសឺមីរ៉ឺម៉ក ដែលមានទម្ងន់សរុបអតិបរមាលើសពី៣,៥តោន ទៅទទួលសេវាត្រួតពិនិត្យលក្ខណៈបច្ចេកទេស ដើម្បីឱ្យការបិទស្លាកសញ្ញាចាំងពន្លឺបានត្រឹមត្រូវ តាមខ្លឹមសារប្រកាសចុះថ្ងៃទី៣០ ខែកក្កដា ឆ្នាំ២០១៩ ស្តីពីបទដ្ឋានត្រួតពិនិត្យលក្ខណៈបច្ចេកទេសយានជំនិះរបស់ក្រសួង៕
