TikTok កាលពីថ្ងៃចន្ទម្សិលមិញបានប្តឹងរដ្ឋបាលលោក ដូណាល់ ត្រាំ បន្ទាប់ពីមេដឹកនាំប្រទេសមហាអំណាចមួយនេះដាក់បញ្ជាហាមឃាត់បណ្តាញសង្គមដ៏ពេញនិយមរបស់ចិនមួយនេះប្រតិបត្តិការនៅសហរដ្ឋអាមេរិក ដោយថា អ្វីដែលលោក ត្រាំ និយាយគឺជាវោហារសាស្ត្រប្រឆាំងចិនដើម្បីបានសន្លឹកឆ្នោតប៉ុណ្ណោះ។
ក្រុមហ៊ុន ByteDance Ltd បានច្រានចោលការចោទប្រកាន់របស់សេតវិមានដែលថា បណ្តាញសង្គម TikTok របស់ខ្លួនគឺជាការគំរាមកំហែងសន្តិសុខជាតិ។ ក្រុមហ៊ុននេះអះអាងថា ខ្លួនបានរក្សានិងការពារយ៉ាងយកចិត្តទុកដាក់បំផុតនូវព័ត៌មាននិងទិន្នន័យរបស់អ្នកប្រើប្រាស់។
តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ក្រុមហ៊ុន ByteDance Ltd បានពិពណ៌នាថា ការអំពាវនាវរបស់លោក Trump នៅក្នុងបទបញ្ជាប្រតិបត្តិថ្ងៃទី៦ ខែសីហា របស់លោក ត្រាំ ដែលហាមឃាត់ TikTok ជាមធ្យោបាយមួយដើម្បីបន្ត «យុទ្ធនាការបើកចំហនៃវោហារសាស្ត្រប្រឆាំងនឹងប្រទេសចិន» នៅមុនការបោះឆ្នោតប្រធានាធិបតីសហរដ្ឋអាមេរិកនៅថ្ងៃទី៣ ខែវិច្ឆិកា។
លោក Patrick Ryan អ្នកគ្រប់គ្រងកម្មវិធីបច្ចេកទេសនៅ TikTok ដែលបានប្តឹងរដ្ឋបាលលោក ត្រាំ បានលើកឡើងថា លោកនិងសហការីចំនួន១៥០០នាក់នឹងបាត់បង់ការងាររបស់ខ្លួននៅខែក្រោយប្រសិនបើបទបញ្ជារបស់លោក ត្រាំ ត្រូវបានអនុវត្ត។
លោក Alex Urbelis មេធាវីតំណាងឱ្យលោក Ryan បានដាក់ពាក្យបណ្តឹងទៅតុលាការសាន់ហ្វ្រាន់ស៊ីស្កូ ដោយបានលើកឡើងថា បទបញ្ជារបស់លោក ត្រាំ មិនស្របតាមរដ្ឋធម្មនុញ្ញនោះទេ។
ក្រុមហ៊ុន ByteDance បានលើកឡើងថា លោក ត្រាំ មិនមានសិទ្ធិអំណាចត្រឹមត្រូវក្នុងការចេញបទបញ្ជានេះទេ។
លោក ត្រាំ បានចេញបទបញ្ជាដាច់ដោយឡែកមួយនៅថ្ងៃទី១៤ ខែសីហា ដោយទុកពេលឱ្យក្រុមហ៊ុន ByteDance ៩០ថ្ងៃដើម្បីបង្វែរប្រតិបត្តិការនិងទិន្នន័យរបស់ TikTok ឱ្យសហរដ្ឋអាមេរិក។
យោងតាមពាក្យបណ្តឹងបានឱ្យដឹងថា TikTok ជាកម្មវិធីដែលកំពុងពេញនិយមក្នុងចំណោមយុវវ័យ ដែលមានប្រហែលជាង៩០លាននាក់ប្រើប្រាស់វានៅសហរដ្ឋអាមេរិក។
រដ្ឋបាលលោក ត្រាំ បាននិយាយថា ជនជាតិអាមេរិកគួរតែប្រុងប្រយ័ត្នក្នុងការប្រើប្រាស់ TikTok។ ប្រភពដដែលថា តាមច្បាប់ដែលបានណែនាំក្នុងឆ្នាំ២០១៧ ដែលអនុម័តដោយ លោកប្រធានាធិបតី ស៊ី ជិនពីង ក្រុមហ៊ុនចិនមានកាតព្វកិច្ចគាំទ្រនិងសហប្រតិបត្តិការក្នុងការងារស៊ើបការណ៍ជាតិរបស់ចិន៕
