រដ្ឋាភិបាលបានសម្រេចបន្តអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រនិងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ១៩ រយៈពេលពីរខែទៀត គឺខែសីហានិងខែកញ្ញា ក្នុងនោះសាច់ប្រាក់ចំនួន៣០លានដុល្លារ នឹងត្រូវបើកជូនប្រជាពលរដ្ឋជាង២,៦លាននាក់សម្រាប់ខែសីហានេះ។
យោងតាមសេចក្ដីសម្រេចស្តីពីការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រនិងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ១៩សម្រាប់ជុំទី២របស់ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃម្សិលមិញ បានសម្រេចបន្តអនុវត្តកម្មវិធីនេះរយៈពេលពីរខែទៀត គឺខែសីហានិងខែកញ្ញា ឆ្នាំ២០២០ ដោយរយៈពេលអនុវត្តបន្តនឹងត្រូវកំណត់ដោយឡែកផ្អែកតាមសភាពការណ៍វិវត្តជាក់ស្តែង។
សេចក្តីសម្រេចបន្តថា៖ «ការបើកផ្តល់ប្រាក់ឧបត្ថម្ភ ត្រូវធ្វើឡើងក្នុងសប្តាហ៍ទី៤នៃខែនីមួយៗ»។
កាលពីថ្ងៃម្សិលមិញនេះដែរ ក្រសួងសេដ្ឋកិច្ចក៏បានចេញសេចក្តីប្រកាសព័ត៌មានស្តីពីការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រនិងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ សម្រាប់ជុំទី២ផងដែរ។
ក្រសួងបានឱ្យដឹងថា ដោយមើលឃើញពីបញ្ហាផ្នែកជីវភាពនិងតម្រូវការនានារបស់ប្រជាជនក្រីក្រដែលងាយរងគ្រោះដោយសារជំងឺកូវីដ១៩ រាជរដ្ឋាភិបាលបានសម្រេចបន្ដអនុវត្តកម្មវិធីឧបត្ថម្ភសាច់ប្រាក់សម្រាប់ជុំទី២ (ខែសីហានិងខែកញ្ញា) តាមរយៈការប្រើប្រាស់សេវាកម្មផ្ទេរប្រាក់វីង ក្នុងនោះ ថវិកាជាតិចំនួន៣០លានដុល្លារអាមេរិក នឹងបើកជូនដល់ប្រជាជន២,៦លាននាក់ សម្រាប់ខែសីហានេះ។
ក្រសួងបានបន្ថែមថា ទំហំថវិកានេះមានការកើនឡើងពី២៦លានដុល្លារនៅខែកក្កដា និង២៣លានដុល្លារនៅខែមិថុនា ដោយសារមានការកើនឡើងនៃគ្រួសារក្រីក្រប្រមាណ៦ម៉ឺននាក់បន្ថែមទៀត។
គួរបញ្ជាក់ថា ដំណើរការនៃការអនុវត្តកម្មវិធីជំនួយពិសេសនេះ ត្រូវបានរាជរដ្ឋាភិបាលដាក់ឱ្យដំណើរការជាផ្លូវការកាលពីថ្ងៃទី២៤ ខែមិថុនា ឆ្នាំ២០២០ ដើម្បីជួយដោះស្រាយជីវភាពរស់នៅរបស់គ្រួសារក្រីក្រនិងងាយរងគ្រោះដែលមានបណ្ណសមធម៌ ក្នុងអំឡុងមានវិបត្តិជំងឺកូវីដ១៩ រួមបញ្ចូលទាំងអ្នកដែលបាត់បង់ការងារឬប្រាក់ចំណូលដែលធ្វើឱ្យពួកគាត់ធ្លាក់ចូលក្នុងភាពក្រីក្រ៕
