គណៈកម្មការទន្លេមេគង្គ ឬហៅកាត់ MRC ជំរុញឱ្យចិនធ្វើការជាមួយខ្លួនលើការចែករំលែកព័ត៌មានគ្រប់គ្រងលំហូរទឹកនៅទន្លេមេគង្គជាលើកដំបូង ជាជាងរក្សាទុកព័ត៌មានទាំងនោះដោយឡែកក្រោមគម្រោងកិច្ចសហប្រតិបត្តិការថ្មីមេគង្គ-ឡានឆាងរបស់ខ្លួន។
តាមសេចក្តីរាយការណ៍ពីសារព័ត៌មាន Reuters ឱ្យដឹងថា ការជំរុញរបស់ស្ថាប័នប្រឹក្សាទន្លេមេគង្គមួយនេះធ្វើឡើងបន្ទាប់ពីមានការស្រាវជ្រាវថ្មីមួយរកឃើញថា ក្រុងប៉េកាំងលាក់បាំងព័ត៌មានបរិមាណទឹកដែលខ្លួនបានទប់នៅតាមទំបន់វារីអគ្គិសនីអំឡុងរដូវប្រាំង។
ក្នុងរបាយការណ៍ថ្មីមួយចេញដោយក្រុមហ៊ុនស្រាវជ្រាវរបស់អាមេរិកនៅឆ្នាំនេះ រកឃើញថា ចិនបានទប់ទឹកទន្លេមេគង្គដែលមានប្រភពក្នុងទឹកដីរបស់ខ្លួនក្នុងបរិមាណដ៏ច្រើននៅអំឡុងកម្ពស់ទឹកទន្លេស្រកចុះទាបបំផុតមិនធ្លាប់មាននៅរដូវរាំងស្ងួតឆ្នាំ២០២០។ យ៉ាងណា ការរកឃើញនេះ ត្រូវបានរដ្ឋាភិបាលបក្សកុម្មុយនីស្តចិនទាត់ចោល។
តាមសេចក្តីថ្លែងការណ៍នៅថ្ងៃអង្គារម្សិលមិញ គណកម្មការ MRC ដែលមានកម្ពុជា ឡាវ វៀតណាម និងថៃជាសមាជិក អះអាងថា ចិនមិនទាន់បានចែកចាយព័ត៌មានលម្អិតនៃការគ្រប់គ្រងធនធានទឹកទន្លេមេគង្គឱ្យបានច្បាស់លាស់នៅឡើយ បើទោះជាក្រុងប៉េកាំងបង្ហាញពីការប្តេជ្ញារបស់ខ្លួនក្តី។
ចិនជាប្រទេសឋិតនៅខ្សែទឹកខាងលើ ឯប្រទេសអាស៊ាន៥ រួមមានកម្ពុជា វៀតណាម ឡាវ ថៃ និងមីយ៉ាន់ម៉ា ឋិតនៅខ្សែទឹកខាងក្រោម។ មហាអំណាចមួយនេះមិនបានចុះសន្ធិសញ្ញាទឹកណាមួយជាមួយប្រទេសក្នុងតំបន់មេគង្គនោះទេ និងបានផ្តល់ទិន្នន័យតិចតួចប៉ុណ្ណោះពីការគ្រប់គ្រងទឹកទន្លេក្នុងដែនដីរបស់ខ្លួន។
ទីភ្នាក់ងារព័ត៌មានអង់គ្លេសបានស្រង់សម្តីមន្ត្រីលេខាធិការដ្ឋាន MRC លោក An Pich Hatda ថា ចិននិងប្រទេសសមាជិក MRC ដែលឋិតក្រោមគម្រោងមេគង្គ-ឡានឆាង គួរតែចែករំលែកទិន្នន័យនិងព័ត៌មានទាំងឡាយជាមួយក្រុមអ្នកជំនាញរបស់ MRC ដើម្បីជួយដល់ការគ្រប់គ្រងធនធានទឹកមានប្រសិទ្ធភាព។
នៅក្នុងវេទិកាជំនួបកំពូលមេគង្គ-ឡានឆាងលើកទី៣តាមប្រព័ន្ធអនឡាញកាលពីថ្ងៃចន្ទ ចិនយល់ព្រមរួមគ្នាជាមួយប្រទេសឋិតនៅខ្សែទឹកខាងក្រោមទាំង៥ ក្នុងការដោះស្រាយបញ្ហាគ្រប់គ្រងទឹកទន្លេ និងផ្តល់ទិន្នន័យនិងព័ត៌មានជលសាស្រ្តដល់ប្រទេសទាំងនេះ។
នាយករដ្ឋមន្រ្តីកម្ពុជា លោក ហ៊ុន សែន ថ្លែងក្នុងជំនួបក្រោមមូលបទ «ការគ្រប់គ្រងទឹកឆ្លងដែន» នោះថា ការព្រមព្រៀងគ្នាដោះស្រាយបញ្ហាគ្រប់គ្រងធនធានទឹកទន្លេមេគង្គក្នុងចំណោមប្រទេសក្នុងតំបន់នៅអំឡុងកិច្ចប្រជុំ គឺជាជោគជ័យថ្មីមួយ។
លោកមានប្រសាសន៍ថា៖ «ការស្រុះស្រួលមតិរួមគ្នាក្នុងការរកដំណោះស្រាយពាក់ព័ន្ធនឹងប្រធានបទរសើបបំផុតនៃការគ្រប់គ្រងទឹកឆ្លងដែន គឺជាជោគជ័យដ៏សំខាន់បំផុតមួយទៀតនៃកិច្ចសហប្រតិបត្តិការរបស់យើង»។
កិច្ចសហប្រតិបត្តិការមេគង្គ-ឡានឆាង ត្រូវបានចិនផ្តួចផ្តើមបង្កើតឡើងនៅឆ្នាំ២០១៥ ដោយមានប្រទេសឋិតនៅខ្សែទឹកខាងក្រោមនៃទន្លេមេគង្គចូលរួមដើម្បីជំរុញកំណើនសេដ្ឋកិច្ចនិងកិច្ចសហប្រតិបត្តិការអភិវឌ្ឍន៍ក្នុងតំបន់។
យ៉ាងណា អាមេរិកចាត់ទុកថា ចិនបង្កើតគម្រោងនេះដើម្បីដោះខ្លួនចេញពីគណៈកម្មការ MRC និងបង្កើតរបៀបវារៈអភិវឌ្ឍន៍ផ្លូវទឹកថ្មីក្រោមការដឹកនាំរបស់ខ្លួន ដែលការចោទប្រកាន់នេះត្រូវបានក្រុងប៉េកាំងបដិសេធ។
ចិនមានទំនប់វារីអគ្គិសនីចំនួន៦នៅតាមបណ្តោយទន្លេមេគង្គខ្សែទឹកខាងលើ ដោយអាចផលិតថាមពលអគ្គិសនីសរុប១៥ ៦០០មេហ្គាវ៉ាត់ ដែលជាកម្រិតខ្ពស់បំផុតក្នុងតំបន់ ខណៈគម្រោងថ្មីមួយទៀតរបស់ប្រទេសនេះដែលមានកម្លាំង១៥៥មេហ្គាវ៉ាត់កំពុងសិក្សា។
ក្នុងការស្រាវជ្រាវថ្មីមួយរបស់ក្រុមប្រឹក្សា MRC រកឃើញថា ការអភិវឌ្ឍវារីអគ្គិសនីនៅទន្លេមេគង្គកំពុងប៉ះពាល់ដល់សន្ដិសុខស្បៀង ផ្លូវដោះដូរពាណិជ្ជកម្ម និងជីវភាពមនុស្សប្រមាណ៦០លាននាក់ពឹងផ្នែកលើទន្លេ ដោយសារទំនប់ទាំងនោះបង្កផលប៉ះពាល់ដល់លំហូរទឹក៕
