ក្រសួងសុខាភិបាលអំពាវនាវឱ្យសាធារណជនចូលរួមផ្តល់ឈាមឱ្យបានច្រើន ដើម្បីសង្គ្រោះជីវិតអ្នកជំងឺដែលកំពុងប្រឈមខ្លាំង ហើយក្រសួងក៏ព្រមានចាត់វិធានការតឹងរ៉ឹងចំពោះអ្នកដែលយកឈាមពីសប្បុរសជនទៅលក់។
អង្គភាពអ្នកនាំពាក្យរាជរដ្ឋាភិបាលបានរៀបចំសន្និសីទសារព័ត៌មានមួយនៅថ្ងៃនេះស្តីពី«ការផ្ដល់ឈាមសង្គ្រោះជីវិត»។ ក្នុងសន្និសីទនេះ អគ្គនាយកបច្ចេកទេសសុខាភិបាលនៃក្រសួងសុខាភិបាល លោក ហុក គឹមចេង ថ្លែងថា អ្នកដែលត្រូវការឈាមភាគច្រើនជាអ្នកកើតជំងឺរ៉ាំរ៉ៃដូចជា ខ្សោយតម្រងនោម មហារីកឈាម អ្នកបាត់បង់ឈាមក្រោយសម្រាលកូន បាត់បង់ឈាមដោយគ្រោះថ្នាក់ចរាចរណ៍ និងជំងឺត្រូវវះកាត់។
លោក ហុក គឹមចេង ជំរុញសាធារណជនបង្កើនការចូលរួមផ្តល់ឈាម ដោយថា ចំនួនឈាមបច្ចុប្បន្នមិនគ្រប់គ្រាន់សម្រាប់សង្គ្រោះជីវិតនោះទេ។
លោក ហុក គឹមចេង៖ «គោលនយោបាយរបស់ក្រសួងសុខាភិបាល គឺជំរុញឱ្យមានការបរិច្ចាគឈាមដោយស្ម័គ្រចិត្តនិងមិនគិតកម្រៃ […] បងប្អូនប្រជាពលរដ្ឋយើងដែលមានសុខភាពល្អ អាយុចាប់ពី១៨ឆ្នាំឡើងទៅ គឺអាចធ្វើការបរិច្ចាគឈាមបាន៣ដងទៅ៤ដងក្នុង១ឆ្នាំ ៣ដងចំពោះស្រ្តីនិង៤ដងចំពោះបុរស»។
លោក ហុក គឹមចេង បន្តថា តាមការសិក្សារបស់អង្គការសុខភាពពិភពលោក គឺនៅក្នុងប្រទេសមួយត្រូវមានអ្នកស្ម័គ្រចិត្តបរិច្ចាគឈាមចំនួន១ឬលើសពី១ភាគរយនៃប្រជាជនសរុប ទើបមានឈាមគ្រប់គ្រាន់ដើម្បីសង្គ្រោះជីវិត។ ប៉ុន្តែលោកថា នៅកម្ពុជាមានអ្នកស្ម័គ្រចិត្តបរិច្ចាគឈាមមានតែ០,៧ទៅ០,៨ភាគរយតែប៉ុណ្ណោះ។
ប្រធានមជ្ឈមណ្ឌលជាតិផ្ដល់ឈាម លោក សុខ ប៉ូ មានប្រសាសន៍នៅក្នុងសន្និសីទនោះដែរថា ដោយសារតែឥទ្ធិពលនៃមេរោគកូវីដ ធ្វើឱ្យអ្នកស្ម័គ្រចិត្តផ្តល់ឈាមបានថយចុះ។ លោកជំរុញលើកទឹកចិត្តឱ្យសាធារណជនចូលរួមផ្តល់ឈាម ដោយអនុវត្តគោលការណ៍គម្លាតសុវត្ថិភាពនិងវិធានការផ្សេងៗទៀតរបស់ក្រសួងដែលអាចការពារការឆ្លងមេរោគកូវីដ១៩បាន។
លោក សុខ ប៉ូ៖ «ឈាមវាអត់ផលិតបានដោយរោងចក្រ មានតែប្រភពតែមួយគត់ពីមនុស្ស អ៊ីចឹងសុំឱ្យជនរួមជាតិទាំងអស់មេត្តាចូលរួមទាំងអស់គ្នា ជនរួមជាតិយើងៗអាចជួយគ្នាបានដូចប្រទេសគេដែរ អ៊ីចឹងគេអត់ចាំបាច់រោងចក្រ យើងគួរតែមិនចាំបាច់រោងចក្រដូចគ្នា»។
លោក សុខ ប៉ូ បានឱ្យដឹងថា មួយផ្នែកទៀតនៃការជួញដូរឈាមជាអំពើខុសច្បាប់ ហើយជនដែលប្រព្រឹត្តទាំងនោះគឺត្រូវមានទោស។
លោក សុខ ប៉ូ៖ «បើនិយាយអំពីច្បាប់ គឺគាត់មានទោសធ្ងន់ណាស់ ពីព្រោះយើងមានច្បាប់ស្ដីអំពីការបរិច្ចាគកោសិកា ជាលិកា និងសរីរាង្គមនុស្ស»។
លោក សុខ ប៉ូ បានបន្តថា គិតមកដល់ពេលបច្ចុប្បន្ន ជនល្មើសប្រមាណជា៣០០នាក់ ត្រូវបានមជ្ឈមណ្ឌលផ្ដល់ឈាមជាតិកម្ពុជាធ្វើការអប់រំនិងណែនាំ។ លោក សុខ ប៉ូ បានថ្លែងថា ក្នុងរយៈពេលប្រមាណ៨ខែមកនេះ ឈាមដែលត្រូវបានគេបរិច្ចាគមានប្រមាណ៦ពាន់ប្លោក៕