ក្រសួងអប់រំ យុវជន និងកីឡា អនុញ្ញាតឱ្យគ្រឹះស្ថានសិក្សារដ្ឋដែលមានសិស្សថ្នាក់ទី៩និងទី១២ និងគ្រឹះស្ថានសិក្សារដ្ឋគ្រប់កម្រិតនៅក្នុងទីរួមខេត្តចំនួន៤ បើកដំណើរការឡើងវិញនៅខែកញ្ញាខាងមុខ។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា មានប្រសាសន៍នៅថ្ងៃនេះថា ទីរួមខេត្តទាំង៤ដែលក្រសួងអនុញ្ញាតឱ្យបើកដំណើរការសិក្សាឡើងវិញ ក្នុងដំណាក់កាលទី២ នៅថ្ងៃទី០៧ ខែកញ្ញានោះ រួមមាន ខេត្តមណ្ឌលគិរី ស្ទឹងត្រែង ក្រចេះ និងរតនគិរី។
លោកបន្តថា គ្រឹះស្ថានសិក្សារដ្ឋក្នុងទីរួមខេត្តទាំង៤នេះត្រូវបានក្រុមការងារក្រសួងចុះពិនិត្យនិងវាយតម្លៃនៅទីតាំងផ្ទាល់ ដោយឃើញថា មានកម្រិតហានិភ័យពីការរាតត្បាតជំងឺកូវីដ១៩តិចតួច។
លោកថ្លែងថា៖ «ទីរួមខេត្តក្រចេះ ស្ទឹងត្រែង រតនគិរី និងមណ្ឌលគិរី គឺអនុញ្ញាតឱ្យគ្រឹះស្ថានសាធារណៈគ្រប់កម្រិតបើកដំណើការ»។
អ្នកនាំពាក្យរូបនេះបានបន្តទៀតថា ក្រៅពីនោះ ក្រសួងនឹងពិនិត្យលទ្ធភាពជាក់ស្តែងបើកដំណើរការគ្រឹះស្ថានសាធារណៈតាមរាជធានីនិងខេត្តផ្សេងទៀតតាមទម្រង់តូច។
ដោយឡែក សម្រាប់គ្រឹះស្ថានសិក្សាឯកជនវិញ លោកថា ក្រសួងនឹងអនុញ្ញាតឱ្យបើកដំណើរការពីកម្រិតមត្តេយ្យសិក្សាដល់ឧត្តមសិក្សា បន្ទាប់ពីមានការចុះពិនិត្យនិងវាយតម្លៃដោយផ្ទាល់ដល់ទីតាំងគ្រឹះស្ថានសិក្សាទាំងនោះ។
តែយ៉ាងណា ក្រសួងក៏តម្រូវឱ្យគ្រឹះស្ថានសិក្សាឯកជន ត្រូវដាក់ពាក្យស្នើសុំមកក្រសួងជាមុនសិន ដោយមានការចុះកិច្ចព្រមព្រៀងជាក់លាក់មុនបើកដំណើរការឡើងវិញ។
លោក រស់ សុវាចា បានបញ្ជាក់ដែរថា គ្រប់គ្រឹះស្ថានសិក្សារដ្ឋនិងឯកជនដែលក្រសួងអនុញ្ញាតឱ្យបើកដំណើរការឡើងវិញ ត្រូវអនុវត្តគោលការណ៍និងវិធីសាស្ត្របង្រៀន រួមនឹងវិធានការសុវត្ថិភាពសុខភាពរបស់សិស្សពីសំណាក់ក្រសួងអប់រំ ក្រសួងសុខាភិបាល និងអង្គការសុខភាពពិភពលោក។
លោកបន្ថែមថា ចំពោះកម្រិតសិក្សានិងគ្រឹះស្ថានសិក្សាដទៃទៀតដែលមិនទាន់បានបើកដំណើរការឡើងវិញ ត្រូវបន្តការសិក្សាពីចម្ងាយ។
លោកបានបញ្ជាក់ដែរថា សម្រាប់ការប្រឡងសញ្ញាបត្រមធ្យមសិក្សាទុតិយភូមិ នឹងប្រព្រឹត្តទៅនៅថ្ងៃទី២១ ខែធ្នូ និងការប្រឡងសញ្ញាបត្រមធ្យមសិក្សាបឋមភូមិ នឹងប្រព្រឹត្តទៅនៅថ្ងៃទី៣០ ខែវិច្ឆិកា ឆ្នាំ២០២០។
លោក តូច កន្សាល់ នាយកវិទ្យាល័យបាក់ទូក បានមានប្រសាសន៍កាលពីថ្ងៃម្សិលមិញថា វិទ្យាល័យនេះនឹងអនុវត្តតាមការណែនាំរបស់ក្រសួង ដោយធ្វើការបែងចែកសិស្សក្នុងមួយថ្នាក់ ដែលមានសិស្សជាង៥០នាក់ មកនៅត្រឹមចម្លោះពី១៥ទៅ២០នាក់ក្នុងមួយថ្នាក់វិញ។
លោកថ្លែងថា៖ «យើងអនុវត្តទៅតាមគោលការណ៍ណែនាំរបស់ក្រសួងសុខាភិបាល ហើយនិងការណែនាំរបស់ក្រសួងអប់រំនិងស្ថាប័នពាក់ព័ន្ធ ចឹងយើងធ្វើយ៉ាងម៉េចគម្លាតបុគ្គលចន្លោះពី១ម៉ែត្រកន្លះ»។
កាលពីថ្ងៃម្សិលមិញ រដ្ឋមន្ត្រីក្រសួងអប់រំ លោក ហង់ ជួនណារ៉ុន បានមានប្រសាសន៍ថា ការបើកដំណើរការគ្រឹះស្ថានសិក្សាឡើងវិញ ត្រូវបានអនុវត្តប្រកបដោយស្តង់ដារនិងសុវត្ថិភាព មិនមែនបើកទាំងប្រថុយប្រថានឡើយ។
តាមរយៈសេចក្ដីណែនាំរបស់ក្រសួងអប់រំ យុវជន និងកីឡា បានចែងថា សាលារៀនត្រូវរៀបចំបរិស្ថានសិក្សាប្រកបដោយសុវត្ថិភាព បរិយាកាសមានផាសុកភាពនិងមេត្រីភាព កៅអីអង្គុយសម្រាប់សិស្សានុសិស្ស ត្រូវរក្សាគម្លាតសុវត្ថិភាពយ៉ាងហោចណាស់២ម៉ែត្រ និងរៀបចំចំណុះថ្នាក់ដោយកំណត់សិស្សមិនឱ្យលើសពី១៥ទៅ២០នាក់ក្នុងមួយថ្នាក់ កាត់បន្ថយការប្រមូលផ្ដុំជាដើម៕
