ក្រសួងសាធារណការ និងដឹកជញ្ជូន និងសហការជាមួយស្ថាប័នពាក់ព័ន្ធ ចាត់វិធានការតឹងរ៉ឹង ក្នុងការលុបបំបាត់យានដ្ឋានកែច្នៃយានយន្តខុសច្បាប់និងយានយន្តដឹកជញ្ជូនលើសទម្ងន់កម្រិតកំណត់ ដែលជាមូលហេតុចម្បងធ្វើឱ្យមានគ្រោះថ្នាក់ចរាចរណ៍និងការខូចខាតផ្លូវមុនអាយុកាល។
កាលពីថ្ងៃពុធម្សិលមិញ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានបើកកិច្ចប្រជុំមួយជាមួយមន្ត្រីពាក់ព័ន្ធ ដើម្បីពិភាក្សាពីវិធានការទប់ស្កាត់យានដ្ឋានជួសជុលនិងកែច្នៃ និងយានដ្ឋានដំឡើងយានយន្តខុសច្បាប់ ការត្រួតពិនិត្យយានយន្តកែច្នៃខុសលក្ខណៈបច្ចេកទេស និងការងារមួយចំនួនទៀត។
ក្រសួងសាធារណការ និងដឹកជញ្ជូន បានឱ្យដឹងក្នុងទំព័រហ្វេសប៊ុករបស់ខ្លួនថា ក្នុងកិច្ចប្រជុំនោះ លោករដ្ឋមន្ត្រី ស៊ុន ចាន់ថុល បានចាត់ឱ្យមន្ត្រីជំនាញធ្វើរបាយការណ៍អំពីស្ថានភាពនៃយានដ្ឋានគ្មានច្បាប់អនុញ្ញាត យានដ្ឋានមានច្បាប់អនុញ្ញាត និងយានដ្ឋានមានច្បាប់អនុញ្ញាតតែកែច្នៃយានយន្តខុសលក្ខណៈបច្ចេកទេស ជូនក្រសួងមហាផ្ទៃនិងអាជ្ញាធរដែនដី ដើម្បីចាត់ការតាមច្បាប់។
លោក ស៊ុន ចាន់ថុល បានគូសបញ្ជាក់ថា៖ «ក្រសួងត្រូវបន្តសហការជាមួយអាជ្ញាធរដែនដី ជាពិសេសនគរបាលនិងកងរាជអាវុធហត្ថ ដើម្បីចាត់វិធានការលើយានយន្តកែច្នៃខុសលក្ខណៈបច្ចេកទេស»។
ដោយឡែក ចំពោះវិធានការទប់ស្កាត់ការដឹកជញ្ជូនលើសទម្ងន់កម្រិតកំណត់ លោករដ្ឋមន្ត្រីបានណែនាំឱ្យក្រុមមន្ត្រីជំនាញពាក់ព័ន្ធប្រើប្រាស់យន្តការជញ្ជីងចល័ត ជញ្ជីងបង្កប់ក្រោមតួផ្លូវ (WEIGHT IN MOTION) និងកាមេរ៉ាចាប់យានយន្តដឹកជញ្ជូនលើសទម្ងន់កម្រិតកំណត់ឱ្យបានច្រើនកន្លែង ដើម្បីតាមចាប់យានយន្តដឹកជញ្ជូនលើសទម្ងន់កម្រិតកំណត់ ដែលគេចវេះ មិនព្រមចូលថ្លឹងនៅតាមស្ថានីយជញ្ជីង ដែលជាមូលហេតុចម្បងនាំឱ្យមានគ្រោះថ្នាកចរាចណ៍ អន្តរាយដល់ផ្លូវថ្នល់ និងខាតបង់ថវិកាជាតិជាដើម៕
