បណ្តាប្រទេសនៃមហាអនុតំបន់ទន្លេមេគង្គ បានជួបគ្នាពិភាក្សានិងចែករំលែកបទពិសោធន៍គ្នា ក្នុងការស្តារវិស័យទេសចរណ៍ឡើងវិញ ក្នុងអំឡុងពេលនិងក្រោយមានវិបត្តិជំងឺកូវីដ១៩។
ការជួបពិភាក្សាគ្នានេះ ត្រូវបានធ្វើឡើងក្នុងកិច្ចប្រជុំ «The 1st Destination Mekong Summit» តាមរយៈប្រព័ន្ធ (Video Conference) កាលពីថ្ងៃទី២៥ ខែសីហា ដោយមានការចូលរួមពីតំណាងរដ្ឋាភិបាលនៃប្រទេសមហាអនុតំបន់ទន្លេមេគង្គ រួមមាន កម្ពុជា ចិន មីយ៉ាន់ម៉ា ថៃ ឡាវ និងវៀតណាម រួមនឹងអ្នកពាក់ព័ន្ធ និងវិស័យឯកជនមកពីបណ្តាប្រទេសនានាជុំវិញពិភពលោក សរុបប្រមាណ១ ០០០នាក់។ សម្រាប់ភាគីកម្ពុជា ចូលរួមដោយលោក ថោង ខុន រដ្ឋមន្ត្រីក្រសួងទេសចរណ៏។
ក្រសួងទេសចរណ៍ បានឱ្យដឹងក្នុងទំព័រហ្វេសហ៊ុកថា ក្នុងកិច្ចប្រជុំនេះ ផ្នែកឯកជនក្នុងវិស័យទេសចរណ៍និងភ្ញៀវទេសចរអន្តរជាតិជាច្រើន បានសម្លឹងឃើញថា កម្រិតនៃការឆ្លងជំងឺកូវីដ១៩ នៅក្រុមប្រទេសមហាអនុតំបន់ទន្លេមេគង្គ នៅមានកម្រិតតិចជាងតំបន់ដទៃ ដែលទៅថ្ងៃមុខ គួរតែរៀបចំឱ្យមានទេសចរមកលេងកម្សាន្តបាន ប៉ុន្តែក៏ត្រូវតែធានាសុវត្ថិភាពទេសចរណ៍ខ្ពស់និងច្បាស់លាស់ដែរ។
តែយ៉ាងណា ក្រុមប្រទេសក្នុងតំបន់នេះមិនទាន់ហ៊ានទទួលយកភ្ញៀវទេសចរអន្តរជាតិបាននៅឡើយទេ ពីព្រោះហានិភ័យពីខាងក្រៅនៅមានកម្រិតខ្ពស់ គឺមានតែភ្ញៀវទេសចរក្នុងស្រុកខ្លះៗប៉ុណ្ណោះ តួយ៉ាងដូចជា កម្ពុជា ថៃ ចិនជាដើម។
បើតាមក្រសួងទេសចរណ៍ ក្នុងកិច្ចប្រជុំនោះ ប្រទេសថៃក៏បានលើកឡើងពីគម្រោងចង់ពិភាក្សាជាមួយរដ្ឋាភិបាលនៃប្រទេសផ្សេងទៀត ដើម្បីពិនិត្យលើលទ្ធភាពអនុវត្តនយោបាយទេសចរណ៍ «Green Travel Bubble» ជាលក្ខណៈទ្វេភាគីឬត្រីភាគី ហើយប្រសិនជាជោគជ័យ គេនឹងអាចឈានដល់ពហុភាគីថែមទៀត។
លោករដ្ឋមន្ត្រី ថោង ខុន ត្រូវបានស្រង់ប្រសាសន៍ក្នុងកិច្ចប្រជុំនោះថា រាជរដ្ឋាភិបាលនិងគ្រប់ស្ថាប័នទាំងអស់ រួមទាំងប្រជាពលរដ្ឋ បានចូលរួមយ៉ាងសកម្មក្នុងការបង្ការ ទប់ស្កាត់ និងប្រយុទ្ធប្រឆាំងនឹងជំងឺសកលនេះ ក្នុងនោះក្រសួងទេសចរណ៍បានធ្វើសកម្មភាពជាប់ជាប្រចាំលើការអនុវត្តវិធានសុវត្ថិភាពទេសចរណ៍នៅតាមតំបន់រមណីយដ្ឋាន សហគមន៍ទេសចរណ៍ មូលដ្ឋានអាជីវកម្មសេវាកម្មស្នាក់នៅ មូលដ្ឋានអាជីវកម្មសេវាកម្មម្ហូបអាហារ អាជីវកម្មសេវាកម្មដឹកជញ្ជូនផ្លូវគោកនិងផ្លូវទឹកជាដើម។
លោកបានបន្តថា៖ «ការខិតខំនេះគឺដើម្បីធ្វើយ៉ាងណាអាចស្ដារវិស័យទេសចរណ៍ក្នុងប្រទេសបានខ្លះ ដើម្បីជួយកុំឱ្យជួបនូវវិបត្តិដុនដាបខ្លាំងពេក»។
លោករដ្ឋមន្ត្រី ថោង ខុន បានបន្ថែមថា ទោះបីមិនទាន់អាចទទួលយកទេសចរអន្តរជាតិបាន ក៏កម្ពុជានៅតែរៀបចំខ្លួនជាប់ជាប្រចាំ ដូចជា ពង្រឹងវិធានសុវត្ថិភាពទេសចរណ៍ ការលើកទឹកចិត្តឱ្យមានការវិនិយោគបង្កើតផលិតផលទេសចរណ៍ថ្មីៗនិងមានសុវត្ថិភាពខ្ពស់ រួមនឹងការជំរុញឱ្យប្រជាពលរដ្ឋចេះប្រើប្រាស់បច្ចេកវិទ្យាឌីជីថល ការបណ្ដុះបណ្ដាលធនធានមនុស្សក្នុងវិស័យទេសចរណ៍បន្ថែម៕