អតីតមន្ត្រីជាន់ខ្ពស់គណបក្សសង្គ្រោះជាតិចំនួន៣រូប បានស្នើក្រសួងមហាផ្ទៃលើកបម្រាមសិទ្ធិនយោបាយ ដើម្បីផ្តល់នីតិសម្បទាធ្វើនយោបាយឡើងវិញ។
លិខិតរបស់លោក ស៊ុន ឆ័យ អតីតសមាជិកគណៈកម្មាធិការអចិន្ត្រៃយ៍និងជាអតីតតំណាងរាស្ត្រគណបក្សសង្គ្រោះជាតិ ផ្ញើជូនលោក ស ខេង រដ្ឋមន្ត្រីក្រសួងមហាផ្ទៃ កាលពីថ្ងៃទី២៧ ខែសីហា បានលើកឡើងថា យោងតាមមាត្រា៤៥ថ្មីនៃច្បាប់ស្តីពីគណបក្សនយោបាយ បានបង្កលក្ខណៈឱ្យអ្នកដែលត្រូវបានហាមឃាត់មិនឱ្យធ្វើសកម្មភាពនយោបាយ អាចទទួលបាននីតិសម្បទាធ្វើនយោបាយឡើងវិញ។
ករណីនេះ លោកបានស្នើរដ្ឋមន្ត្រីក្រសួងមហាផ្ទៃពិនិត្យតាមនីតិវិធី ដើម្បីផ្តល់នីតិសម្បទាធ្វើនយោបាយដល់រូបលោកឡើងវិញ។
ក្រៅពីលោក សុន ឆ័យ ក៏មានអតីតសមាជិកគណៈកម្មាធិការនាយកដែលមកពីអតីតគណបក្សសង្គ្រោះជាតិ លោក វ៉ា សាម៉ុន និងលោក តាវ គឹមឈន បានដាក់លិខិតស្នើសុំសិទ្ធិធ្វើនយោបាយឡើងវិញទៅក្រសួងមហាផ្ទៃផងដែរ។
វីអូឌី មិនអាចស្វែងរកការអត្ថាធិប្បាយបន្ថែមពីលោក សុន ឆ័យ និងអតីតមន្ត្រីគណបក្សសង្គ្រោះជាតិពីររូបទៀតបានទេ នៅថ្ងៃសុក្រនេះ។
អតីតមន្ត្រីជាន់ខ្ពស់គណបក្សសង្គ្រោះជាតិទាំង៣រូបនេះកំពុងស្ថិតនៅក្នុងការហាមឃាត់មិនឱ្យធ្វើសកម្មភាពនយោបាយសម្រាប់រយៈពេល៥ឆ្នាំ ចាប់តាំងពីថ្ងៃទី១៦ ខែវិច្ឆិកា ឆ្នាំ២០១៧មក ទៅតាមអំណាចសាលដីការបស់តុលាការកំពូល ករណីគណបក្សសង្គ្រោះជាតិ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍នៅថ្ងៃសុក្រនេះថា ក្រសួងបានទទួលលិខិតរបស់អ្នកទាំង៣រូបនោះហើយ ក្នុងនោះថ្នាក់ដឹកនាំក្រសួងបានបញ្ជាឱ្យអគ្គនាយកដ្ឋានរដ្ឋបាល ក្រុមអ្នកច្បាប់របស់ក្រសួង និងអគ្គស្នងការនគរបាលជាតិ ប្រជុំពិនិត្យលើសំណើនេះ រួចផ្តល់ជាយោបល់ត្រឡប់ទៅថ្នាក់ដឹកនាំវិញ ដើម្បីធ្វើការសម្រេច។
លោកថា៖ «ពួកគាត់សុទ្ធតែជាអ្នកនយោបាយ ហើយបើអ្នកនយោបាយអត់បានធ្វើនយោបាយ ម៉េចគេហៅថាអ្នកនយោបាយ វាប្រៀបដូចជាអ្នកកីឡាករអត់មានកន្លែងប្រកួត ឬយើងអាចហៅថាអ្នកប្រដាល់ ប៉ុន្តែអត់បានឡើងរេញវ៉ៃគ្នា ឈរតែមើលគេទៅ»។
អ្នកវិភាគបញ្ហាសង្គម លោក មាស នី យល់ថា ការសម្រេចចិត្តដកខ្លួនពីអតីតគណបក្សសង្គ្រោះជាតិ ហើយសុំសិទ្ធិធ្វើនយោបាយឡើងវិញរបស់អតីតមន្ត្រីទាំងនោះ អាចជាសញ្ញាល្អសម្រាប់អតីតបក្សប្រឆាំងមួយនេះ ដោយសារពួកគេអាចមានឱកាសបានជួបជាមួយអ្នកគាំទ្រឡើងវិញ។
ប៉ុន្តែលោកថា ប្រសិនបើអតីតមន្ត្រីទាំងនោះបានដកខ្លួនចេញមកដើម្បីគ្រាន់តែបង្កើតគណបក្សថ្មី ដោយពុំមានយុទ្ធសាស្ត្រជាក់លាក់នោះ អាចនឹងធ្វើឱ្យចលនាគាំទ្ររបស់អតីតបក្សប្រឆាំងថយចុះបាន។
លោកថា៖ «ទោះបីជា [អតីតមន្ត្រីបក្សសង្គ្រោះជាតិ] ចេញមក ក៏យើងមិនសង្ឃឹមថា នឹងបាន[ធ្វើនយោបាយ]ពេញលេញដែរ ព្រោះអីចរន្តនៃប្រជាធិបតេយ្យក្នុងប្រទេសខ្មែរយើង កំពុងត្រូវបានស្ថិតនៅក្រោមការឃ្លាំមើលរបស់រដ្ឋាភិបាល ដែលជាការព្រួយបារម្ភមួយរបស់អ្នកដែលមាននិន្នាការប្រឆាំង ទោះបីម៉េចក៏យើងគិតថាមិនបានមួយរយភាគរយដែរ ប៉ុន្តែយ៉ាងហោចក៏គ្រាន់បើជាងដែរ»។
គួរបញ្ជាក់ថា គិតមកដល់ថ្ងៃនេះ មានអតីតមន្ត្រីជាន់ខ្ពស់និងសមាជិកអតីតគណបក្សសង្គ្រោះជាតិជាង១០នាក់ហើយដែលបានស្នើសុំសិទ្ធិធ្វើនយោបាយឡើងវិញពីក្រសួងមហាផ្ទៃ៕