នាយករដ្ឋមន្ត្រីជប៉ុនលោកAbe ប្រកាសលាលែងតំណែងនៅថ្ងៃនេះ ដោយបញ្ជាក់ហេតុផលថា មិនចង់ឱ្យបញ្ហាសុខភាពផ្ទាល់ខ្លួនលោកដែលកើតជំងឺរលាកពោះវៀន ប៉ះពាល់ដល់គោលនយោបាយដឹកនាំប្រទេសជាតិ។
នៅក្នុងសន្និសីទសារព័ត៌មាននៅថ្ងៃនេះ ដែលមានបណ្តាញសារព័ត៌មានល្បីៗលើពិភពលោកមួយចំនួនផ្សាយផ្ទាល់នោះ លោក Abe Shinzo ថ្លែងថា ជំងឺរលាកពោះវៀតរបស់លោក រើឡើងវិញកាលពីពាក់កណ្តាលខែមុន។ លោកបញ្ជាក់ថា ការសម្រេចនេះ ដើម្បីកុំឱ្យប៉ះពាល់ដល់គោលនយោបាយដឹកនាំប្រទេស។
លោក Abe Shinzo៖«ខ្ញុំបានសម្រេចចិត្តលាលែងតំណែងជានាយករដ្ឋមន្ត្រី ដោយខ្ញុំយល់ថា មិនអាចបន្តតំណែងនេះទៀតបាន នៅពេលដែលខ្ញុំមិនមានទំនុកចិត្តថា អាចបំពេញការងារដែលប្រជាជនផ្តល់ឱ្យខ្ញុំបំពេញនេះបានល្អ»។
លោកAbe Shinzo អាយុ៦៥ឆ្នាំ កាលពីឆ្នាំ២០០៧ បានដាក់ពាក្យលាលែងម្តងរួចមកហើយគឺដោយសារតែបញ្ហាជំងឺរលាកពោះវៀត ក្រោយពេលកាន់តំណែងបានមួយឆ្នាំ។ បន្ទាប់មកលោកចូលរួមប្រជែងតំណែងនាយករដ្ឋមន្ត្រីកាលពីឆ្នាំ២០១២ ទទួលការគាំទ្រច្រើនលើសលប់ពីពលរដ្ឋម្ចាស់ឆ្នោត៕
