គណៈកម្មាធិការប្រយុទ្ធប្រឆាំងផលិតផលក្លែងក្លាយ បានអំពាវនាវដល់សាធារណជន ចូលរួមទប់ស្កាត់ការចរាចរផលិតផលក្លែងក្លាយ-ខុសច្បាប់នៅលើទីផ្សារកម្ពុជា និងទប់ស្កាត់ជនទុច្ចរិតដែលបានបន្លំខ្លួនជាសមត្ថកិច្ចមកពីគណៈកម្មាធិការនេះ ដើម្បីជំរិតទារប្រាក់ពីម្ចាស់អាជីវកម្មនានា។
ការអំពាវនាវនេះ បានធ្វើឡើងនៅក្នុងសេចក្តីជូនដំណឹងរបស់គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ហៅកាត់ថា (គ.ប.ផ.ក) ដែលបានផ្សព្វផ្សាយកាលពីថ្ងៃម្សិលមិញ។
គណៈកម្មាធិការ គ.ប.ផ.ក បានលើកឡើងថា មានផលិតផលក្លែងក្លាយ-ខុសច្បាប់ ខូចគុណភាព ហួសសុពលភាពប្រើប្រាស់ បន្លំគុណភាព បន្លំការវេចខ្ចប់ ឬស្តុកទុកមិនត្រឹមត្រូវតាមស្តង់ដាបច្ចេកទេស ទាំងផលិតផលក្នុងស្រុក និងនាំចូល រួមទាំងផលិតផលកែច្នៃខុសច្បាប់ បាននិងកំពុងបន្លំលក់នៅលើទីផ្សារជាមួយផលិតផលពិតមានច្បាប់ត្រឹមត្រូវ ដែលបណ្តាលឱ្យប៉ះពាល់យ៉ាងធ្ងន់ធ្ងរដល់សុខភាព និងសុវត្ថិភាពសង្គម។
គណៈកម្មាធិការនេះ ឱ្យដឹងទៀតថា នាពេលថ្មីៗនេះ ក៏មានក្រុមទុច្ចរិតបានបន្លំខ្លួនជាសមត្ថកិច្ចមកពីគណៈកម្មាធិការ គណៈកម្មាធិការ គ.ប.ផ.ក ហើយបានទៅគំរាម និងជំរិតទាររកលាភសក្ការៈពីម្ចាស់អាជីវកម្មនានា ជាហេតុនាំឱ្យមានការយល់ច្រឡំពីសំណាក់សាធារណជន និងបានធ្វើឱ្យប៉ះពាល់ដល់កិត្តិយសនិងសេចក្តីថ្លៃថ្នូររបស់អង្គភាព។
គណៈកម្មាធិការនេះ បានបញ្ជាក់ថា៖ «ការចុះបំពេញការងាររបស់សមត្ថកិច្ចមកពី គណៈកម្មាធិការ គ.ប.ផ.ក ត្រូវមានលិខិតបង្គាប់ការចេញដោយប្រធានគណៈកម្មាធិការ និងការសហការពីស្ថាប័នពាក់ព័ន្ធបង្កើតជាក្រុមការងារដោយមិនមានការចុះជាបុគ្គលនោះទេ»។
ករណីនេះ គណៈកម្មាធិការ គ.ប.ផ.ក បានអំពាវនាវដល់សាធារណជនទាំងអស់ ចូលរួមសហការ និងផ្តល់ព័ត៌មានអំពីទីតាំងផលិត ការចែកចាយផលិតផលគ្មានការអនុញ្ញាត និងក្រុមទុច្ចរិតទាំងនោះទៅកាន់គណៈកម្មាធិការ ដែលមានទីតាំងនៅក្រសួងមហាផ្ទៃ ឬតាមហ្វេសប៊ុកផេក «គណៈកម្មាធិការប្រយុទ្ធប្រឆាំងផលិតផលក្លែងក្លាយ-Counter Counterfeit Committee» ដើម្បីឱ្យក្រុមការងារអង្គភាពនេះចុះទៅពិនិត្យស្រាវជ្រាវ តាមដានស៊ើបអង្កេត និងឈានដល់ការចុះអនុវត្តនីតិវិធីច្បាប់ដោយសហការជាមួយសមត្ថកិច្ចនៃក្រសួងស្ថាប័នពាក់ព័ន្ធ៕
