គណបក្សប្រជាធិបតេយ្យមូលដ្ឋាន ស្នើទៅរដ្ឋាភិបាលឱ្យមានក្រុមប៉ូលិសជាស្ត្រី ចុះរៀបចំសណ្ដាប់ធ្នាប់នៅពេលមានប្រជាពលរដ្ឋជាស្ត្រីនាំគ្នាប្រមូលផ្តុំធ្វើកូដកម្មឬបាតុកម្មដោយសន្តិវិធី ដើម្បីបញ្ចៀសកុំឱ្យមានការបៀតបៀនលើស្ត្រីជាអ្នកតវ៉ាបន្តទៀត។
អនុប្រធានគណបក្សប្រជាធិបតេយ្យមូលដ្ឋាន លោកស្រី ឡឹក រដ្ឋា បានលើកឡើងនៅក្នុងសន្និសីទសារព័ត៌មាននៅស្នាក់ការរបស់ខ្លួនក្នុងរាជធានីភ្នំពេញ កាលពីថ្ងៃម្សិលមិញថា កន្លងមកស្ត្រីដែលចេញតវ៉ាទាមទាររកយុត្តិធម៌ឱ្យសាច់ញាតិនិងទាមទារឱ្យដោះលែងលោក រ៉ុង ឈុន ត្រូវបានក្រុមសមត្ថកិច្ចរៀបចំសណ្ដាប់ធ្នាប់ដែលជាបុរស បង្រ្កាបដោយហិង្សានិងបានបៀតបៀនទៅលើពួកគេ។
ករណីនេះ លោកស្រីបានស្នើរដ្ឋាភិបាលឱ្យរៀបចំក្រុមសមត្ថកិច្ចជាស្ត្រីដែលមានជំនាញ ដើម្បីចុះទៅរៀបចំសណ្ដាប់ធ្នាប់ជាមួយឬទៅជំនួសក្រុមសមត្ថកិច្ចបុរសវិញ ដើម្បីបញ្ចៀសកុំឱ្យមានការប្រើប្រាស់អំពើហិង្សានិងការបៀតបៀនលើស្ត្រីដែលជាអ្នកតវ៉ាបន្តទៀត។
លោកស្រីថា៖ «ដូចយើងឃើញកន្លងមក ការបង្រ្កាបរបស់អាជ្ញាធរបុរសហ្នឹង បុគ្គលខ្លះដែលបានលូកលាន់ឬប៉ះពាល់ទៅស្ត្រីហ្នឹង ក៏យើងទាមទារសុំឱ្យរដ្ឋាភិបាលស៊ើបអង្កេតឱ្យបានច្បាស់លាស់ទៅលើរឿងហ្នឹង ដើម្បីផ្ដល់ភាពយុត្តិធម៌ដល់ក្រុមស្រ្តី យុវតីដែលបានធ្វើការតវ៉ានិងក៏បានផ្ដល់ភាពស្អាតស្អំមន្ត្រីប៉ូលិសផ្សេងទៀតដែលគាត់ល្អៗ»។
កញ្ញា យិន ម៉ូលីនី ដែលធ្លាប់បានចូលរួមការតវ៉ាដោយសន្តិវិធីទាមទារឱ្យដោះលែងលោក រ៉ុងឈុន សមាជិកក្រុមប្រឹក្សាឃ្លាំមើលកម្ពុជា នៅថ្ងៃសុក្រនេះ បានបង្ហាញការគាំទ្រចំពោះការស្នើរបស់គណបក្សនេះ ដោយថា កន្លងមក ក្រុមសន្តិសុខខណ្ឌដែលសុទ្ធតែជាបុរសមួយចំនួនបានប្រើហិង្សា រុញច្រាន និងឆ្លៀតឱកាសប៉ះពាល់រាងកាយរបស់កញ្ញានិងក្រុមអ្នកចូលរួមជាស្ត្រីផ្សេងទៀត។
កញ្ញានិយាយថា៖ «យើងជាមនុស្សស្រី យើងគឺជាស្ត្រីទន់ខ្សោយ រងកម្លាំងបៀតបៀនពីមនុស្សប្រុសប្រើហិង្សាមកលើយើង គឺអាហ្នឹងវាធ្ងន់ធ្ងរ ប៉ុន្តែបើសិនមានកម្លាំងជាស្រ្តីដែលគាត់ចុះមកការពារ មិនមែនមកដើម្បីប្រើហិង្សាទេ ខ្ញុំសុំឱ្យពួកគាត់ចុះមកដោយការពារ ដោយសន្តិភាព ដោយអហិង្សា ពីព្រោះពួកខ្ញុំទៅ គឺទៅដោយអហិង្សាដូចគ្នា ដូច្នេះខ្ញុំគាំទ្របើសិនជាមានសមត្ថកិច្ចជាស្រ្តី»។
លោកស្រី ជូ ប៊ុនអេង អនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សនៃក្រសួងមហាផ្ទៃ មានប្រសាសន៍ថា ក្រសួងមិនទាន់មាននគរបាលជាស្ត្រីក្នុងការធ្វើកិច្ចការងារទេ ដោយសារបច្ចុប្បន្ន ចំនួនស្ត្រីជានគរបាលនៅមានចំនួនតិចតួចនៅឡើយ។
លោកថា៖ «សកម្មភាពពួកគេ [ក្រុមអ្នកតវ៉ា] យើងដឹងស្រាប់ហើយ អាជេរក៏មាន អាចង្អុលមុខក៏មាន អ៊ីចឹងបើមិនចាប់ ហើយ[ពេល]ចាប់ គាត់បម្រះ ធ្វើម៉េចមិនឱ្យប៉ះខ្លះ! អាហ្នឹងហើយដែលយើងពិបាក បើកាលណាយើងចេះគិតថាគេបៀតបៀន ការបៀតបៀនជាចេតនាមួយសម្រាប់ផលចំណេញក្នុងផ្លូវភេទ ប៉ុន្តែបើក្នុងបេសកកម្មហើយគិតថាជាការបៀតបៀនដែរ អាហ្នឹងខ្ញុំគិតថាចប់ហើយ»។
នាយករងអង្គការការពារសិទ្ធិមនុស្សលីកាដូ លោក អំ សំអាត យល់ថា បើទោះជាកងកម្លាំងសមត្ថកិច្ចអនុវត្តភារកិច្ចរបស់ខ្លួនក៏ដោយ ប៉ុន្តែការអនុវត្តនោះគួរធ្វើទៅតាមច្បាប់ មិនមែនឆ្លៀតឱកាសដើម្បីប៉ះពាល់រូបរាងអ្នកដែលងាយរងគ្រោះនោះទេ។
លោកថា៖ «បើសិនជាសមត្ថកិច្ចណាបំពេញមុខងារ ហើយឆ្លៀតឱកាសបៀតបៀនស្ត្រីជនដែលងាយរងគ្រោះនោះ អាហ្នឹងជាបទល្មើសដែលត្រូវអនុវត្តតាមផ្លូវច្បាប់»។
ចំណែកអ្នកសម្របសម្រួលបណ្ដាញយេនឌ័រ និងអភិវឌ្ឍន៍ អ្នកស្រី អេង ចាន់ឌី ក៏យល់ស្របចង់ឱ្យកម្លាំងនគរបាលជាស្ត្រីចុះទៅអន្តរាគមន៍ពេលមានការតវ៉ាកើតឡើងផងដែរ ដើម្បីកាត់បន្ថយការប្រើប្រាស់អំពើហិង្សានិងការបំពានទៅលើរាងកាយស្ត្រី។ តែយ៉ាងណា អ្នកស្រីបានជំរុញដល់រដ្ឋាភិបាលគួរមានការបណ្តុះបណ្តាលអប់រំអំពីសិទ្ធិស្ត្រីនិងសិទ្ធិបុគ្គលជាមុន មុននឹងឱ្យពួកគេចុះអនុវត្តការងារ៕
