គណៈកម្មការធិការជាតិរៀបចំការបោះឆ្នោត ដាក់ដំណើរការប្រព័ន្ធផ្លាស់ប្តូរឯកសារចុះឈ្មោះបោះឆ្នោតពីចម្ងាយ (តាមអនឡាញ) លើកដំបូង សម្រាប់ការពិនិត្យបញ្ជីឈ្មោះនិងការចុះឈ្មោះបោះឆ្នោតឆ្នាំ២០២០។
សេចក្ដីជូនដំណឹងរបស់គណៈកម្មការធិការជាតិរៀបចំការបោះឆ្នោត (គជប) ចុះថ្ងៃទី២៧ ខែសីហា ឆ្នាំ២០២០ បានឱ្យដឹងថា ប្រព័ន្ធផ្លាស់ប្តូរឯកសារចុះឈ្មោះបោះឆ្នោតតាមអនឡាញនេះ នឹងដំណើរការតាមគេហទំព័រ voterlist.nec.gov.kh ចាប់ពីថ្ងៃទី២៨ ខែសីហា ដល់ថ្ងៃទី១៩ ខែតុលា ឆ្នាំ២០២០។
គជប បន្តថា ប្រព័ន្ធផ្លាស់ប្តូរឯកសារនេះ នឹងបង្កភាពងាយស្រួលដល់អ្នកមានឈ្មោះក្នុងបញ្ជីបោះឆ្នោតចុងក្រោយឆ្នាំ២០១៩ ដែលបានប្រើប្រាស់ឯកសារមួយចំនួនសម្រាប់ចុះឈ្មោះបោះឆ្នោត អាចផ្លាស់ប្តូរឯកសារចុះឈ្មោះបោះឆ្នោតរបស់ខ្លួនបាន និងធ្វើឱ្យបញ្ជីបោះឆ្នោតកាន់តែមានភាពពេញលេញ ត្រឹមត្រូវ និងមានបច្ចុប្បន្នភាព។
គជប បានបញ្ជាក់ដែរថា សម្រាប់អ្នកមានឈ្មោះនិងទិន្នន័យក្នុងអត្តសញ្ញាណបណ្ណប្រភេទថ្មីមានឈីប (Chip) ដូចគ្នាទៅនឹងឈ្មោះនិងទិន្នន័យក្នុងបញ្ជីបោះឆ្នោតចុងក្រោយឆ្នាំ២០១៩ អាចស្នើសុំផ្លាស់ប្ដូរអត្តសញ្ញាណបណ្ឌប្រភេទថ្មីរបស់ខ្លួនតាមប្រព័ន្ធអនឡាញនេះបាន។
ប៉ុន្តែសម្រាប់អ្នកដែលមានឈ្មោះនិងទិន្នន័យក្នុងអត្តសញ្ញាណបណ្ណប្រភេទថ្មី ខុសគ្នាទៅនឹងឈ្មោះនិងទិន្នន័យក្នុងបញ្ជីឈ្មោះបោះឆ្នោតចុងក្រោយឆ្នាំ២០១៩ ត្រូវទៅជួបជាមួយក្រុមចុះឈ្មោះបោះឆ្នោតឃុំ-សង្កាត់ដែលខ្លួនកំពុងរស់នៅ ដើម្បីស្នើសុំកែតម្រូវឈ្មោះនិងទិន្នន័យក្នុងបញ្ជីបោះឆ្នោត ក្នុងអំឡុងពេលពិនិត្យបញ្ជីឈ្មោះនិងការចុះឈ្មោះបោះឆ្នោតចាប់ពីថ្ងៃទី១ ដល់ថ្ងៃទី១៩ ខែតុលា ឆ្នាំ២០២០៕
