ក្រុមអង្គការសង្គមស៊ីវិលដែលកំពុងបំពេញការងារដើម្បីលើកកម្ពស់សិទ្ធិស្ត្រី បានអំពាវនាវដល់រាជរដ្ឋាភិបាលកម្ពុជា ទម្លាក់ចោលសេចក្តីព្រាងច្បាប់ស្តីពីសណ្តាប់ធ្នាប់សាធារណៈជាបន្ទាន់ ដោយលើកហេតុផលថា ច្បាប់នេះរំលោភបំពានសិទ្ធិស្ត្រី។
សេចក្តីថ្លែងការណ៍រួមរបស់តំណាងអង្គការ-សមាគមជិត៤០អង្គភាពដែលបានផ្សព្វផ្សាយកាលពីថ្ងៃម្សិលមិញ បានលើកឡើងថា ពួកគេមានក្តីបារម្ភជាខ្លាំងចំពោះមាត្រាជាច្រើនដែលមានចែងក្នុងសេចក្តីព្រាងច្បាប់នេះ ដែលអាចធ្វើឱ្យស្ត្រីបាត់បង់លទ្ធភាពទទួលបានសិទ្ធិរបស់ខ្លួន ទាំងជម្រើសនៃការស្លៀកពាក់និងការប្រកបរបរចិញ្ចឹមជីវិតរបស់ពួកគេ។
ក្រុមអង្គការសង្គមស៊ីវិលទាំងនោះ បានស្នើយ៉ាងទទូចឱ្យរាជរដ្ឋាភិបាលរក្សាកាតព្វកិច្ចរបស់រដ្ឋទៅតាមសន្ធិសញ្ញាសិទ្ធិមនុស្សអន្តរជាតិទាំងអស់នៅក្រោមច្បាប់សិទ្ធិមនុស្សអន្តរជាតិ និងអនុវត្តសេចក្តីសង្កេតសន្និដ្ឋានឆ្នាំ២០១៩របស់គណៈកម្មាធិការស៊ី-ដ ដែលទាមទារឱ្យរដ្ឋាភិបាលត្រូវវាយតម្លៃលក្ខណៈជាប្រព័ន្ធទៅលើផលប៉ះពាល់នៃវិធានការនានាដែលបានដាក់ចេញ ដើម្បីប្រយុទ្ធប្រឆាំងនឹងអំពើហិង្សាផ្អែកលើយេនឌ័រទៅលើស្ត្រីនិងក្មេងស្រី។
ក្រៅពីនោះ អនុសាសន៍របស់គណៈកម្មាធិការស៊ី-ដ ក៏បានជំរុញរដ្ឋាភិបាលធ្វើការវាយតម្លៃប៉ាន់ប្រមាណផលប៉ះពាល់យេនឌ័រជាលក្ខណៈប្រព័ន្ធនៅពេលអនុម័តឬធ្វើវិសោធនកម្មច្បាប់នានា និងធានាថាការធ្វើវិសោធនកម្មច្បាប់ទាំងនោះនឹងជួយលើកកម្ពស់និងការពារសិទ្ធិស្ត្រី។
សេចក្តីថ្លែងការណ៍រួម បានបញ្ជាក់ថា៖ «រាជរដ្ឋាភិបាលគួរតែចាត់ទុកជាអាទិភាពបន្ទាន់ ដើម្បីដោះស្រាយរាល់ទម្រង់នៃការរើសអើងយេនឌ័រ រួមមាន អំពើហិង្សាផ្អែកលើយេនឌ័រនិងការរើសអើងក្នុងប្រព័ន្ធអប់រំ ការចូលរួមផ្នែកសេដ្ឋកិច្ច សង្គម និងនយោបាយ តាមរយៈការកែទម្រង់ច្បាប់និងការផ្លាស់ប្តូរគោលនយោបាយ»។
រដ្ឋលេខាធិការក្រសួងមហាផ្ទៃ ទទួលបន្ទុកការងារផែនសណ្តាប់ធ្នាប់សាធារណៈ លោកនាយឧត្តមសេនីយ៍ អ៊ុក គឹមលេខ មានប្រសាសន៍ថា សេចក្តីព្រាងច្បាប់ស្តីពីសណ្តាប់ធ្នាប់សាធារណៈនេះ នៅជាសេចក្តីព្រាងនិងកំពុងស្ថិតក្នុងការពិភាក្សានៅឡើយ ហើយក៏ពុំមានចំណុចណាមួយរំលោភបំពានដល់ស្ត្រីដែរ។
លោកថា៖ «ខ្ញុំអត់យល់! បើអង្គការណាច្រានចោលច្បាប់នេះ បានសេចក្តីថា អង្គការនោះចង់ឱ្យប្រទេសមួយគ្មានច្បាប់ ហើយប្រហែលជាអង្គការនោះដេកយល់សប្តិទេដឹង! ព្រោះមិនទាន់មានច្បាប់ផង គ្រាន់តែជាសេចក្តីព្រាង គ្រាន់តែលើកជាគំនិតនៅឡើយ ហើយទៅទម្លាក់ចោលយ៉ាងម៉េចទៅ»។
សេចក្តីព្រាងច្បាប់ស្តីពី «សណ្តាប់ធ្នាប់សាធារណៈ» ដែលផ្តួចផ្តើមឡើងដោយក្រសួងមហាផ្ទៃ មាន៨ជំពូកនិង៤៧មាត្រា តាក់តែងឡើងក្នុងគោលបំណងគ្រប់គ្រងសណ្តាប់ធ្នាប់សាធារណៈ ឱ្យមានរបៀបរៀបរយ សោភ័ណភាព អនាម័យ បរិស្ថាន ភាពស្ងប់ស្ងាត់ សុវត្ថិភាពសង្គម និងការរក្សាប្រពៃណីជាតិ និងសេចក្តីថ្លៃថ្នូររបស់ប្រជាពលរដ្ឋ៕