មេដឹកនាំតៃវ៉ាន់ លោកស្រី Tsai Ing-Wen បាននិយាយថា ហានិភ័យនៃជម្លោះដោយចៃដន្យអាចនឹងផ្ទុះឡើងចៀសមិនផុត បើមិនមានការទំនាក់ទំនងគ្នារកផ្លូវចរចាដើម្បីបន្ថយភាពតានតឹងដែលកំពុងកើនឡើងនោះទេ។
មេដឹកនាំតៃវ៉ាន់ លោកស្រី Tsai Ing-Wen ថ្លែងក្នុងវេទិកាមួយដែលរៀបចំឡើងដោយវិទ្យាស្ថានគោលនយោបាយយុទ្ធសាស្ត្រអូស្ត្រាលី ដោយត្អូញត្អែរថា ចិនកំពុងបង្កើនសម្ពាធឱ្យតៃវ៉ាន់ទទួលស្គាល់ថា ដែនដីកាន់របបប្រជាធិបតេយ្យមួយនេះជាផ្នែកមួយឬជាខេត្តមួយរបស់ចិន។ នេះបើតាមទីភ្នាក់ងារព័ត៌មាន Reuters។
មេដឹកនាំតៃវ៉ាន់រូបនេះ ក៏បានលើកឡើងពីក្តីកង្វល់ដែលសកម្មភាពយោធាអាមេរិកនៅសមុទ្រចិនខាងត្បូងកំពុងបង្កភាពតានតឹងជាមួយចិនដែរ។ លោកស្រីអំពាវនាវឱ្យភាគីពាក់ព័ន្ធបង្កើនការអត់ធ្មត់និងចរចាស្វែងរកដំណោះស្រាយដោយសន្តិវិធី។
ប្រភពដដែលបានឱ្យដឹងថា ជាទូទៅ ទំនាក់ទំនងរវាងប្រទេសចិននិងអាមេរិក ត្រូវបានមើលឃើញថា ធ្លាក់ចុះក្នុងសភាពអាក្រក់បំផុតក្នុងរយៈពេលជាច្រើនទសវត្សរ៍មកហើយ ជាមួយនឹងការមិនទុកចិត្តគ្នាកាន់តែខ្លាំងនិងភាពមិនត្រូវរ៉ូវគ្នាជុំវិញបញ្ហាជំងឺកូវីដ១៩ ក្រៅពីនេះ សហរដ្ឋអាមេរិកបានចោទប្រកាន់ប្រទេសចិនអំពីភាពអយុត្តិធម៌នៃការអនុវត្តពាណិជ្ជកម្ម រួមជាមួយនឹងការខ្វែងគំនិតគ្នាលើបញ្ហាជម្លោះក្រុងហុងកុង សមុទ្រចិនខាងត្បូង និងកោះតៃវ៉ាន់ ជាដើម។
អ្នកស្រី Tsai Ing-Wen បាននិយាយថា សហគមន៍អន្តរជាតិបានតាមដានយ៉ាងដិតដល់អំពីស្ថានភាពនៅក្នុងទីក្រុងហុងកុង ក៏ដូចជាសកម្មភាពយោធារបស់ចិនក្នុងសមុទ្រចិនខាងត្បូងដែរពិសេសស្ថានភាពនៅច្រកសមុទ្រតៃវ៉ាន់ ។
មេដឹកនាំតៃវ៉ាន់រូបនេះ និយាយថា កោះតៃវ៉ាន់ចាំបាច់ត្រូវពង្រឹងសមត្ថភាពការពាររបស់ខ្លួន ដែលលោកស្រីបានផ្តល់អាទិភាព ដើម្បីធានាដល់ការការពារសុវត្ថិភាពប្រទេស។ លោកស្រីក៏បានបញ្ជាក់ជំហរក្នុងការបើកចំហផ្លូវចរចាជាមួយចិន ក៏ដូចជាភាគីពាក់ព័ន្ធផ្សេងទៀត ដើម្បីរក្សាផលប្រយោជន៍រួម។
តៃវ៉ាន់បានប្រកាសផ្តាច់ខ្លួនចេញពីចិនកាលពីឆ្នាំ១៩៤៩នៅក្នុងសង្គ្រាមស៊ីវិលមួយ។ គិតនៅឆ្នាំ២០២០ ដែនដីមួយនេះមានប្រជាជនជិត២៤លាននាក់ ហើយមានប្រទេសតូចៗនៅលើពិភពលោកតែជាង១០តែប៉ុណ្ណោះដែលទទួលស្គាល់ថា តៃវ៉ាន់ជាប្រទេសឯករាជ្យ។
បើទោះជាតៃវ៉ាន់ប្រឹងរៀបចំខ្លួនជារដ្ឋឯករាជ្យមួយក៏ដោយ ប៉ុន្តែចិនប៉េកាំងប្រកាសថា តៃវ៉ាន់គឺជាខេត្តមួយរបស់ចិន គឺរង់ចាំតែឱកាសល្អមកដល់ នឹងបង្រួបបង្រួមគ្នាវិញ។ ចិនបញ្ជាក់ញឹកញាប់ថា បើតៃវ៉ាន់ហ៊ានប្រកាសឯករាជ្យពេលណា ចិននឹងប្រើប្រាស់កម្លាំងទ័ពវាយចូលគ្រប់គ្រងភ្លាម៕