ក្រសួងសុខាភិបាល ចេញលិខិតស្នើទៅអភិបាលរាជធានី-ខេត្តទាំង២៥ ចាត់ចែងឱ្យមានកម្លាំងសមត្ថកិច្ចពង្រឹងសន្តិសុខ នៅតាមមណ្ឌលចត្តាឡីស័ក ទូទាំងប្រទេសកម្ពុជា ដើម្បីទប់ស្កាត់ការឆ្លងជំងឺកូវីដ១៩ឲ្យមានប្រសិទ្ធិភាពខ្ពស់។
ក្នុងលិខិតរបស់ក្រសួងសុខាភិបាល ចុះផ្សាយនៅថ្ងៃទី២៩ ខែសីហានេះថា ប្រជាពលរដ្ឋខ្មែរ និងជនបរទេសដែលធ្វើដំណើរត្រឡប់មកពីបរទេសតាមច្រកព្រំដែនគោក និងផ្លូវអាកាស ត្រូវបានមន្ត្រីនៃស្ថាប័នពាក់ព័ន្ធ រួមមាន សមត្ថកិច្ច និងក្រុមគ្រូពេទ្យប្រចាំនៅតាមមណ្ឌលកម្រិត១ កម្រិត២ និងនៅតាមបណ្តាសណ្ឋាគារ យកសំណាកពួកគេធ្វើតេស្តនៅមន្ទីរពិសោធន៍ និងអនុវត្តវិធានការចត្តាឡីស័កចំនួន១៤ថ្ងៃ នៅទូទាំង២៥រាជធានី-ខេត្ត។ ប៉ុន្តែរយៈពេល១៥ថ្ងៃកន្លងមកនេះ មិនមានអ្នកឆ្លងជំងឺកូវីដ១៩ថ្មីនោះទេ។
ទោះជាបែបនេះក្តី លិខិតដដែលបញ្ជាក់ថា ដើម្បីគ្រប់គ្រងប្រជាពលរដ្ឋនៅទូទាំង២៥រាជធានី-ខេត្ត គឺអភិបាលនៃគណៈអភិបាលរាជធានីខេត្តទាំងអស់ ត្រូវចាត់កម្លាំងសមត្ថកិច្ច ឲ្យទៅយាមប្រចាំការជាប់ជាប្រចាំ និងឃ្លាំមើលសកម្មភាពពីខាងក្រៅមណ្ឌលចត្តាឡីស័ក ជួយការពារសន្តិសុខ សណ្តាប់ធ្នាប់ឲ្យបានម្មត់ចត់ និងការពារកុំឲ្យអ្នកកំពុងធ្វើចត្តាឡីស័ករត់ចេញពីមណ្ឌលជាដាច់ខាត ទើបទប់ស្កាត់ការឆ្លងជំងឺកូវីដ១៩បានប្រសិទ្ធិភាពខ្ពស់
ក្រសួងសុខាភិបាលអះអាងថា គិតត្រឹមព្រឹកថ្ងៃ២៩ ខែសីហា ឆ្នាំ២០២០នេះ មានមនុស្សចំនួន ២៧៣នាក់ហើយ ដែលត្រូវបានរកឃើញឆ្លងវីរុសកូវីដ-១៩ នៅក្នុងប្រទេសកម្ពុជា ក្នុងនោះអ្នកជំងឺ ២៦៥នាក់ ត្រូវបានព្យាបាលជាសះស្បើយ និងអ្នកកំពុងសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ ចំនួន៨នាក់ ជាបុរស។ បច្ចុប្បន្ននេះមិនទាន់មានឆ្លងចូលក្នុងសហគមន៍នៅឡើយ៕
