អាជ្ញាធរខេត្តបាត់ដំបងបានឱ្យដឹងថា តូបលក់ដូររបស់អាជីវករដល់ទៅ៣៣តូបបានរងការខូចខាតទាំងស្រុង បន្ទាប់ពីអគ្គិភ័យឆាបឆេះផ្សារធំបាត់ដំបងកាលពីថ្ងៃម្សិលមិញនេះ។
អភិបាលខេត្តបាត់ដំបង លោក ងួន រតនៈ បានប្រាប់វីអូឌីនៅថ្ងៃនេះថា ផ្សារធំបាត់ដំបង ឬផ្សារណាត់បាត់ដំបង ត្រូវភ្លើងឆាបឆេះចាប់តាំងពីម៉ោងប្រហែល៥កន្លះល្ងាចថ្ងៃអាទិត្យម្សិលមិញនេះ មុននឹងត្រូវបានពន្លត់បានទាំងស្រុងនៅម៉ោងជិត៨យប់ថ្ងៃម្សិលមិញនេះ។
អភិបាលខេត្តបាត់ដំបងរូបនេះបានឱ្យដឹងទៀតថា អគ្គិភ័យនេះបណ្ដាលមកពីការទុស្សេខ្សែភ្លើងនៅក្នុងតូបមួយក្នុងផ្សារមួយនេះ។
នៅពេលសាកសួរអំពីទំហំនៃការខូចខាត លោក ងួន រតនៈ ប្រាប់ថា មិនទាន់អាចប្រាប់បាននៅឡើយទេ ខណៈគណៈកម្មការមួយកំពុងស្ថិតនៅក្នុងការប្រជុំពិភាក្សានៅឡើយ។
អភិបាលរងខេត្តបាត់ដំបង លោក សឿម ប៊ុនរិទ្ធិ បានឱ្យដឹងថា តូបលក់ដូររបស់អាជីវករជាង៤០តូបត្រូវបានរងការខូចខាត ក្នុងនោះតូបចំនួន៣៣តូបត្រូវបានភ្លើងឆាបឆេះខូចខាតទាំងស្រុង។
លោក សឿម ប៊ុនរិទ្ធិ ប្រាប់ថា៖ «ក្នុងនោះដែរចំពោះទំហំខូចខាត អត់ទាន់[ដឹង]ទេ គេកំពុងវាយតម្លៃ ចុះវាយតម្លៃ ខ្ញុំទើបប្រជុំចប់មិញ ដើម្បីវាយតម្លៃអំពីការខូចខាត ក៏ដូចជាផលប៉ះពាល់សំណង់បេតិកភណ្ឌ»។
លោក ងួន រតនៈ បានឱ្យដឹងថា ផ្សារមួយនេះត្រូវបានសាងសង់ឡើងនៅក្នុងសម័យអាណានិគមនិយមបារាំង៕
