ក្រសួងសុខាភិបាលរកឃើញករណីថ្មីនៃជំងឺកូវីដ-១៩ចំនួនមួយករណីថ្មីដែលបានកើតលើបុរសជនជាតិបារាំងម្នាក់ បន្ទាប់ពីមានភាពស្ងប់ស្ងាត់អស់រយៈពេលជាង១៨ថ្ងៃ និងអ្នកជាសះស្បើយម្នាក់។
ក្នុងសេចក្ដីជូនព័ត៌មានរបស់ក្រសួងសុខាភិបាលចុះថ្ងែទី៣១ ខែសីហា ឆ្នាំ២០២០ បានឱ្យដឹងថាបុរសដែលបានធ្វើតេស្តវិជ្ជមានអំពីវីរុសកូវីដ-១៩នេះ មានសញ្ជាតិជាជនជាតិបារាំង អាយុ៣០ឆ្នាំ ដោយបុរសម្នាក់នេះបានធ្វើដំណើរមកពីប្រទេសបារាំងនិងបន្តជើងហោះហើរពីទីក្រុងតៃវ៉ាន់ប្រទេសចិន មករាជធានីភ្នំពេញ កាលពីថ្ងៃទី៣០ ខែសីហា ឆ្នាំ២០២០។
ក្រសួងបានបញ្ជាក់ថា បច្ចុប្បន្ន អ្នកជំងឺថ្មីម្នាក់នេះបានកំពុងសម្រាកព្យាបាលនៅមន្ទីរពេទ្យខ្មែរ-សូវៀត រីឯមនុស្សចំនួន៧០នាក់ផ្សេងទៀតដែលបានរួមដំណើរជាមួយបុរសម្នាក់នេះ ត្រូវបានសើ្នសុំឱ្យនៅដោយឡែកនៅឯមណ្ឌលចត្តាឡីស័កប្រាំកន្លែងផ្សេងៗគ្នា រួមមានសណ្ឋាគារ៤កន្លែងនៅភ្នំពេញនិងមណ្ឌលចត្តាឡីស័កវិទ្យាល័យបូរី១០០ខ្នង។
ចំណែកឯអ្នកជាសះស្បើយម្នាក់គឺជាបុរសជនជាតិចិន ដែលបានធ្វើដំណើរមកពីប្រទេសហ្វីលីពីន កាលពីថ្ងៃទី០៩ ខែសីហា ឆ្នាំ២០២០។
បើគិតត្រឹមព្រឹកថ្ងៃទី៣១ ខែសីហា ឆ្នាំ២០២០ ចំនួនអ្នកជាសះស្បើយពីជំងឺកូវីដ-១៩នៅកម្ពុជាមានចំនួន២៩៩នាក់ ក្នុងនោះមានស្រី៥៤នាក់ ហើយអ្នកជំងឺ៨នាក់ទៀតកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែ៕
