ក្រសួងសុខាភិបាលបានក្រើនរំលឹកដល់ប្រជាពលរដ្ឋ ត្រូវបន្តអនុវត្តវិធានការបង្ការការឆ្លងវីរុសកូវីដ១៩ ដោយបង្កើនការប្រុងប្រយ័ត្នខ្ពស់ក្នុងអំឡុងពិធីបុណ្យកាន់បិណ្ឌនិងភ្ជុំបិណ្ឌដែលនឹងប្រារព្ធធ្វើឡើងចាប់ពីថ្ងៃទី៣ដល់ថ្ងៃទី១៨ ខែកញ្ញា។
យោងតាមសេចក្ដីណែនាំរបស់ខ្លួនចេញនៅថ្ងៃនេះ ក្រសួងសុខាភិបាលបានណែនាំនូវវិធានការណ៍ចំនួន៧ចំណុចក្នុងការបន្តការពារការចម្លងវីរុសកូវីដ-១៩និងការពុលអាហារ នៅអំឡុងពេលបុណ្យកាន់បិណ្ឌនិងភ្ជុំបិណ្ឌ។
ក្រសួងបានណែនាំឱ្យពាក់ម៉ាស់នៅតាមទីវត្តអារាម រក្សាអនាម័យដៃ និងរក្សាគម្លាតសុវត្ថិភាព ដើម្បីបង្ការការឆ្លងវីរុសកូរ៉ូណា ខណៈដែលណែនាំឱ្យប្រកាន់យកជម្រើសជួបជុំគ្រួសារឬការធ្វើដំណើរកម្សាន្តប្រកបដោយសុវត្ថិភាព ដើម្បីចៀសផុតពីការឆ្លងវីរុសដ៏រាតត្បាតនេះ។
ក្រសួងសុខាភិបាល បានអំពាវនាវទៅពលរដ្ឋឱ្យជ្រើសរើសមធ្យោបាយធ្វើដំណើរ ទីកន្លែងស្នាក់នៅ និងអាហារប្រកបដោយសុវត្ថិភាព ដែលគេចផុតពីការចម្លងវីរុសនិងការពុលអាហារផងដែរ។
ក្រសួងសំណូមពរឱ្យសាធារណជនទាំងអស់ចូលរួមអនុវត្តវិធានការណ៍ខាងលើដើម្បីទប់ស្កាត់ការចម្លងវីរុសកូវីដ១៩ ចូលមកសហគមន៍។
មកដល់បច្ចុប្បន្ននេះ មនុស្សចំនួន២៧៤នាក់ហើយត្រូវបានរកឃើញឆ្លងវីរុសកូវីដ-១៩នៅក្នុងប្រទេសកម្ពុជា ក្នុងនោះអ្នកជំងឺ២៦៦នាក់ត្រូវបានព្យាបាលជាសះស្បើយ ហើយអ្នកកំពុងសម្រាកព្យាបាលនៅមន្ទីរពេទ្យរដ្ឋចំនួន៨នាក់ ៕