តុលាការកំពូលបានសម្រេចតម្កល់សេចក្តីសម្រេចរបស់សាលាដំបូងរាជធានីភ្នំពេញដែលទាត់ចោលបណ្តឹងគ្រូបង្រៀន១១នាក់ប្តឹងក្រសួងអប់រំករណីលុបឈ្មោះពួកគេចេញពីក្របខណ្ឌ។
ក្រសួងអប់រំ កាលពីថ្ងៃទី៣០ ខែមករា ឆ្នាំ២០១៨ បានសម្រេចលុបឈ្មោះគ្រូបង្រៀនចំនួន១១នាក់ ក្រោមហេតុផលថា ពួកគេអវត្តមានពីការងារដោយគ្មានច្បាប់អនុញ្ញាត។ ក្រុមគ្រូបង្រៀនទាំងនោះមិនសុខចិត្ត បានដាក់ពាក្យបណ្តឹងទៅសាលាដំបូងរាជធានីភ្នំពេញកាលពីថ្ងៃទី១៦ ខែមករា ឆ្នាំ២០១៩ ដោយស្នើឱ្យតុលាការចេញសាលក្រមបដិសេធចោលនូវសេចក្តីសម្រេចរបស់ក្រសួងអប់រំ។ ប៉ុន្តែក្នុងសាលសវនាការកាលពីថ្ងៃទី២២ ខែមេសា ឆ្នាំ២០១៩ ចៅក្រមសាលាដំបូងរាជធានីភ្នំពេញបានសម្រេចទាត់ចោលបណ្តឹងរបស់គ្រូបង្រៀនទាំង១១នាក់នោះ។
ក្រុមគ្រូបង្រៀនទាំង១១នាក់ ក៏បានប្តឹងទៅសាលាឧទ្ធរណ៍បន្តទៀត ប៉ុន្តែសាលាឧទ្ធណ៍កាលពីពាក់កណ្តាលខែមីនា ឆ្នាំ២០២០ ក៏បានសម្រេចតម្កល់ការសម្រេចរបស់សាលាដំបូង។ ដោយមិនសុខចិត្តនឹងសេចក្ដីសម្រេចរបស់តុលាការទាំងពីរថ្នាក់ មេធាវីការពារក្ដីគ្រូបង្រៀនទាំងនោះបានប្ដឹងមកតុលាការកំពូល។
មេធាវីការពារក្ដីឱ្យគ្រូបង្រៀនទាំង១១រូប គឺលោក ជូង ជូងី ប្រាប់វីអូឌីថា នៅថ្ងៃនេះ ប្រធានក្រុមបឹ្រក្សាជំនុំជម្រះតុលាការកំពូល លោក និល ណុន សម្រេចតម្កល់សេចក្តីសម្រេចរបស់សាលាដំបូងរាជធានីភ្នំពេញ ដោយសម្អាងថា អ្នកគ្រូនិងលោកគ្រូ បានបោះបង់ការងារនិងអវត្តមានគ្មានការអនុញ្ញាត។
លោកសម្ដែងការសោកស្ដាយចំពោះការសម្រេចរបស់តុលាការកំពូល ដោយលោកថា លោកគ្រូ-អ្នកគ្រូទាំង១១រូបមិនបានបោះបង់ការងាររបស់ខ្លួនចោលនោះទេ។
លោកបន្ថែមថា៖ «នៅពេលដែលគាត់ទៅបំពេញការងារថ្មីនោះ ក្រសួងបានចេញប្រកាសដាក់គាត់នៅក្រៅក្របខណ្ឌ ហើយពេលដែលដាក់ពាក្យចូលបម្រើក្នុងក្របខណ្ឌវិញ ក្រសួងអប់រំអត់ទាន់បានចេញប្រកាសយកគាត់យកទៅក្នុងក្របខណ្ឌនៅឡើយទេ។ ដូច្នេះមិនទាន់មានប្រកាសដាក់គាត់ចូលនៅក្នុងក្របខណ្ឌវិញទេ។ ប៉ុន្តែបែរជាក្រសួងអប់រំអះអាងថា គាត់បោះបង់ការងារនិងគាត់អវត្តមានគ្មានការអនុញ្ញាត ហើយលុបឈ្មោះគាត់ចោលចេញពីក្របខណ្ឌតែម្ដង»។
លោក ជូង ជូងី បញ្ជាក់ថា គ្រូបង្រៀនទាំង១១រូបដែលត្រូវលុបឈ្មោះចេញពីក្របខណ្ឌក្រសួង គឺមាន៣រូបកំពុងជាប់ពន្ធនាគារ ក្នុងនោះមានលោក រ៉ុង ឈុន លោក ជុំ ចាន់ នៅខេត្តព្រៃវែង និងលោក ពៀត ម៉ាប់ នៅខេត្តសៀមរាប។
ដោយឡែក គ្រូបង្រៀន៩រូបទៀតដែលត្រូវលុបឈ្មោះពីក្របខណ្ឌក្រសួងអប់រំ យុវជន និងកីឡាដែរ រួមមានលោក លី ឌី និងអ្នកស្រី វង រុន្នី នៅខេត្តព្រះសីហនុ, លោក គង់ ស៊ីវង្ស នៅខេត្តកំពង់ចាម, លោក ហុង សុជា , លោក ច័ន្ទ សុភា, លោក មុត មល្លា នៅខេត្តសៀមរាប, លោក ខែម ស៊ីថា នៅខេត្តបាត់ដំបង រួមទាំងលោក យិន ឈូករ័ត្ន នៅខេត្តកំពត។
គ្រូបង្រៀនម្នាក់ក្នុងចំណោម១១រូបដែលត្រូវតុលាការសម្រេចឱ្យលុបឈ្មោះចេញពីក្របខណ្ឌក្រសួងអប់រំដែរ គឺអ្នកស្រី វង រុន្នី សម្ដែងការខកចិត្តចំពោះតុលាការកំពូល ដោយអ្នកស្រីហៅការសម្រេចនេះថា ជារឿងនយោបាយ។
អ្នកស្រីមានប្រសាសន៍ថា៖ «ប្រកាសដែលគាត់លុបឈ្មោះពួកខ្ញុំ គាត់និយាយថា ពួកខ្ញុំបោះបង់ការងារ ពួកខ្ញុំមិនបានបោះបង់ការងារណា! ពួកខ្ញុំជាប់ទៅបំពេញភារកិច្ច ជាក្រុមប្រឹក្សាក្រុង ខេត្ត-រាជធានី ហើយការរំលាយគណបក្ស ត្បិតរំលាយមែន តែថាមិនទាន់ស្របច្បាប់។ ហើយពួកខ្ញុំក៏ព្យាយាមដាក់ពាក្យចូលធ្វើការវិញ អ្នកខ្លះបានចូលធ្វើការវិញហើយនៅតែលុបឈ្មោះពួកខ្ញុំទៀត។ អ៊ីចឹងខ្ញុំគិតថា គាត់ប្រកាសលុបឈ្មោះពួកខ្ញុំជាហេតុផលនយោបាយតែមួយគត់»។
នាយករងអង្គការការពារសិទ្ធិមនុស្សលីកាដូ លោក អំ សំអាត ចាត់ទុកការសម្រេចរបស់តុលាការកំពូលថា អាចជាការធ្វើឱ្យបាត់បង់ធនធានសំខាន់សម្រាប់វិស័យអប់រំ។
លោកថា៖ «លោកគ្រូអ្នកគ្រូទាំងអស់នោះធ្លាប់បានបណ្ដុះបណ្ដាលសិស្សជាច្រើន នេះជាធនធានមនុស្សដ៏សំខាន់ ប៉ុន្តែនៅពេលដែលតុលាការសម្រេចលុប […] យើងឃើញថា វាជាការបាត់បង់ថ្នាលមួយនៃការបណ្ដុះបណ្ដាលធនធានមនុស្សដ៏សំខាន់មួយផងដែរ។ ខ្ញុំជឿថា រឿងទាំងអស់ហ្នឹង គេអាចនឹងរិះគន់ថា វាអាចជាប់ពាក់ព័ន្ធរឿងនយោបាយ បានជាមានការលុបឈ្មោះគ្រូបង្រៀន១១នាក់ចេញពីក្របខណ្ឌ»។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា សុំមិនធ្វើអត្ថាធិប្បាយបន្ថែមចំពោះករណីនេះទេ ។
លោកថា៖ «ក្រសួងនៅរក្សាការសម្រេចចិត្តដូចមាននៅក្នុងសេចក្ដីជូនដំណឹងជូនអ្នកគ្រូលោកគ្រូ ហើយបច្ចុប្បន្នភាពសុំយោងទៅតាមការសម្រេចរបស់តុលាការ ដោយសារស្ថិតនៅក្នុងអំណាចតុលាការ»។
បើតាមអ្នកស្រី វង រុន្នី រូបគាត់និងគ្រូបង្រៀន១០នាក់ផ្សេងទៀត ជាអតីតសមាជិកក្រុមប្រឹក្សាឃុំ ក្រុង-ស្រុក និងខេត្ត និងជាសមាជិកគណៈកម្មាធិការជាតិរៀបចំការបោះឆ្នោតមកពីកូតាគណបក្សសង្គ្រោះជាតិដែលបានរំលាយកាលពីខែវិច្ឆិកា ឆ្នាំ២០១៧៕