មន្ត្រីរដ្ឋបាលខេត្តបាត់ដំបង បានឱ្យដឹងថា អាជ្ញាធរខេត្តនេះកំពុងសិក្សាពីគម្រោងជួសជុលសំណង់ផ្សារធំបាត់ដំបងឡើងវិញ បន្ទាប់ពីសំណង់អគារចំណាស់មួយនេះ បានខូចខាតមួយផ្នែកក្រោយពីរងអគ្គិភ័យកាលពីចុងសប្ដាហ៍កន្លងមកនេះ។
ផ្សារធំបាត់ដំបង ឬផ្សារណាត់ ត្រូវបានភ្លើងឆាបឆេះកាលពីម៉ោង ៥កន្លះល្ងាចថ្ងៃអាទិត្យកន្លងមកនេះ ដោយបណ្ដាលឱ្យតូបលក់របស់អាជីវករជាង ៤០បានរងការខូចខាត ក្នុងនោះតូបចំនួន ៣៣បានខូចខាតទាំងស្រុង។
អភិបាលរងខេត្តបាត់ដំបង លោក សឿម ប៊ុនរិទ្ធិ បានប្រាប់វីអូឌីកាលពីថ្ងៃម្សិលមិញថា ទំហំនៃការខូចខាតដែលបណ្ដាលមកពីភ្លើងឆាបឆេះផ្នែកខាងលិច និងខាងត្បូងនៃផ្សារនេះ មានតម្លៃដល់ទៅ ៨៣ម៉ឺនដុល្លារ ក្នុងនោះមានទាំងទំនិញតម្លៃខ្ទង់ ៧៥ម៉ឺនដុល្លារ ដែលត្រូវបានស្តុកទុកនៅតាមតូបរបស់ក្រុមអាជីវករផងដែរ។
អភិបាលរងខេត្តរូបនេះ បានឱ្យដឹងទៀតថា អាជ្ញាធរខេត្តកំពុងសម្អាតកម្ទេចកម្ទី និងសំណល់ផេះផង់នៅផ្នែកដែលត្រូវភ្លើងឆាបឆេះ ខណៈជួយរៀបចំផ្នែកផ្សេងទៀតនៃផ្សារដែលមិនរងអគ្គិភ័យ ដើម្បីសម្រួលដល់ក្រុមអាជីវករឱ្យបានចូលលក់ដូរធម្មតាឡើងវិញ។
លោក សឿម ប៊ុនរិទ្ធិ ប្រាប់ថា៖ «យើងរៀបចំម៉ាកំណាត់ទៀតដែលអត់ឆេះ និងឱ្យប្រជាពលរដ្ឋ និងអាជីវករយើងបានចូលលក់ធម្មតាវិញ ដើម្បីជីវភាពរស់នៅប្រចាំថ្ងៃគាត់។ យើងគិតគូរបញ្ហាហ្នឹងសិន»។
នៅពេលសួរថា តើអាជ្ញាធរគ្រោងជួសជុលផ្សារនេះឡើងវិញ ឬក៏ត្រូវសាងសង់ថ្មីឡើងវិញនោះ លោក សឿម ប៊ុនរិទ្ធិ អះអាងថា ក្រុមការងារខេត្តកំពុងតែសិក្សាវាយតម្លៃដើម្បីជួសជុលផ្សារនេះឡើងវិញ ដោយសារតែផ្សារនេះ គឺជាសំណង់ចំណាស់ ដែលត្រូវការការអភិរក្ស។
លោក សឿម ប៊ុនរិទ្ធិ ប្រាប់បន្ថែមថា៖ «អគារមួយនេះ មិនអាចវ៉ៃចោល ហើយសាងសង់ថ្មីវិញបានទេ ដោយសារតែអគារនេះជាអគារចំណាស់។ ដូចនេះ ក្រុមការងារត្រូវតែខិតខំសិក្សាវាយតម្លៃ និងសិក្សាស្វែងយល់ថា កន្លែងណាអាចសាងសង់បាន និងកន្លែងណាមិនអាចសាងសង់បាន»។
បើតាមលោក ប៊ុនរិទ្ធិ ការងារជួសជុលផ្សារនេះឡើងវិញ ត្រូវបានដាក់ឱ្យស្ថិតក្រោមការសិក្សាពីសំណាក់មន្ទីររៀបចំដែនដី នគរូបនីយកម្ម និងសំណង់ និងមន្ទីរវប្បធម៌ និងវិចិត្រសិល្បៈរបស់ខេត្តបាត់ដំបង។
ប្រធានមន្ទីររៀបចំដែនដី នគរូបនីយកម្ម និងសំណង់ខេត្តបាត់ដំបង លោក អ៊ូ ដារី បានប្រាប់វីអូឌីនៅថ្ងៃនេះថា ការងារជួសជុលឡើងវិញនៃផ្សារណាត់នេះ កំពុងស្ថិតនៅក្នុងដំណាក់កាលនៃការជជែកពិភាក្សាជាមួយរដ្ឋបាលខេត្តនេះនៅឡើយ។
កាលពីចុងឆ្នាំមុន លោកនាយករដ្ឋមន្ត្រី ហ៊ុន សែន បានជំរុញឱ្យថែរក្សាសំណង់អគារចាស់ៗដែលមានអាយុកាលលើសពី ៥០ឆ្នាំ បន្ទាប់ពីសំណង់ស្ពានសម័យអាណានិគមបារាំងមួយស្ថិតក្នុងសង្កាត់ស្វាយប៉ោ ខេត្តបាត់ដំបង ត្រូវបានស្នើកម្ទេចចោលដោយសារភាពចាស់ទ្រុឌទ្រោម។
ប្រធានមន្ទីរវប្បធម៌ និងវិចិត្រសិល្បៈខេត្តបាត់ដំបង លោក គឹម សោភ័ណ បានប្រាប់វីអូឌីកាលពីថ្ងៃម្សិលមិញថា ផ្សារធំបាត់ដំបង ស្ថិតនៅក្នុងផ្នែកមួយនៃគម្រោងអភិរក្សបេតិកភណ្ឌជាតិដែលត្រូវបានស្នើទៅអង្គការយូណេស្កូចាប់តាំងពីឆ្នាំ២០១៧មក។
មន្ត្រីវប្បធម៌រូបនេះ បានឱ្យដឹងទៀតថា រូបលោក និងក្រុមមន្ត្រី បានចុះទៅពិនិត្យមើលការខូចខាតនៃសំណង់អគារចំណាស់នេះដែរកាលពីថ្ងៃចន្ទកន្លងមកនេះ ប៉ុន្តែ ការខូចខាតកម្រិតណានោះ លោកថា មិនទាន់អាចវាយតម្លៃបាននៅឡើយទេ។
លោក គឹម សោភ័ណ ប្រាប់ថា៖ «ខ្ញុំអត់ហ៊ានថា ដោយសារយើងមិនសូវជំនាញ អត់ទាន់បានសិក្សាពីគុណភាពប៉េតុង តែតូបដឹងតែខូច ហើយតូបដែលឆេះហ្នឹង តែគ្រាន់ថា អគារទាំងមូល និងមួយជ្រុងហ្នឹង យើងអត់ទាន់បានធ្វើតេស្ដវាទេ»។
ផ្សារធំបាត់ដំបង ស្ថិតនៅក្នុងចំណោមសំណង់សម័យអាណានិគម និងសង្គមរាស្ត្រនិយមដល់ទៅ ៨០០ទីតាំងនៅក្នុងខេត្តបាត់ដំបង ដែលជាគោលដៅនៃការអភិរក្សបេតិកភណ្ឌមនុស្សជាតិ។
សាកលវិទ្យាធិការរងនៃសាកលវិទ្យាល័យភូមិន្ទវិចិត្រសិល្បៈ អ្នកម្នាង ម៉ែន ច័ន្ទទេវី ដែលជាអ្នកជំនាញអភិរក្សសំណង់បេតិកភណ្ឌជាតិក្រោយសម័យអង្គរ បានឱ្យដឹងថា ផ្សារមួយនេះ គឺជាផ្នែកមួយដ៏សំខាន់នៃគម្រោងអភិវឌ្ឍន៍ទីក្រុងរបស់ខេត្តបាត់ដំបង ហើយបានដើរតួនាទីយ៉ាងសំខាន់នៃដំណើររីកលូតលាស់នៃសេដ្ឋកិច្ចខេត្តបាត់ដំបងចាប់តាំងពីក្រោយសាងសង់រួចរហូតមកដល់បច្ចុប្បន្ន។
អ្នកម្នាង ច័ន្ទទេវី ប្រាប់ថា៖ «ដូច្នេះ ផ្សារហ្នឹងសំខាន់ណាស់នៅក្នុងខេត្តបាត់ដំបង។ គេហៅថា ជាអគារមួយជានិមិត្តសញ្ញាមួយសំខាន់ ជា iconic building [អគារប្លែកគួរជាទីកត់សម្គាល់]មួយនៅក្នុងហ្នឹងដែរ។ វាជាកន្លែងបណ្ដុំសេដ្ឋកិច្ចមួយសំខាន់ណាស់របស់ខេត្តបាត់ដំបង។ នរណាដែលចង់ទៅបាត់ដំបង ក៏ទៅផ្សារហ្នឹងដែរ»។
អ្នកជំនាញរូបនេះ បានប្រាប់ថា សំណង់ផ្សារធំបាត់ដំបងដែលត្រូវបានសាងសង់ឡើងនៅក្នុងឆ្នាំ១៩៣៦ទៅតាមរចនាថបបារាំងនោះ នៅមានភាពរឹងមាំនៅឡើយ ប៉ុន្តែ ត្រូវការការថែទាំដើម្បីអភរិក្សសំណង់ចំណាស់មួយនេះ។
អ្នកម្នាង ច័ន្ទទេវី ប្រាប់បន្តថា៖ «អគារហ្នឹង ជាទូទៅ ខ្ញុំនិយាយពី Structure[គ្រោងអគារ]គឺនៅល្អទេ។ វាមានកន្លែងខ្លះខូច។ ធម្មតា អគារក៏ដូចជីវិតមនុស្សដែរ យើងត្រូវការ maintenance[ថែទាំ]»៕
