រដ្ឋមន្រ្តីក្រសួងហិរញ្ញវត្ថុថ្មីរបស់ប្រទេសថៃ បានលាលែងពីដំណែងក្រោយពីមកកាន់ការងារនេះរយៈជាង២០ថ្ងៃ។
តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ការលាលែងដំណែងរបស់លោក ប្រេឌី ដាវចា (Predee Daocha) រដ្ឋមន្រ្តីក្រសួងហិរញ្ញវត្ថុថៃ ត្រូវបានប្រកាសក្នុងសៀវភៅរាជកិច្ចដែលផ្សព្វផ្សាយនៅថ្ងៃអង្គារម្សិលមិញ។ ទីភ្នាក់ងារសារព័ត៌មានរ៉យទ័រមិនអាចទាក់ទងលោកប្រេឌី សុំការអត្ថាធិប្បាយលំអិតជុំវិញរឿងនេះទេ ប៉ុន្តែលោកបានប្រាប់ព័ត៌មានក្នុងស្រុករបស់ថៃថាលោកលាលែងពីដំណែងដោយសារតែលោកមានបញ្ហាសុខភាព។ តួនាទីរបស់លោកនឹងត្រូវបញ្ចប់ជាផ្លូវការនៅថ្ងៃពុធនេះ។ ទោះយ៉ាងណាក៏ដោយរដ្ឋាភិបាលថៃមិនទាន់បានប្រកាសថានរណាជាបេក្ខជនដែលនឹងត្រូវឡើងមកកាន់ដំណែងនេះជំនួសលោក ប្រេឌី នៅឡើយទេ។
មុនឡើងកាន់ដំណែងជារដ្ឋមន្រ្តីក្រសួងហិរញ្ញវត្ថុ លោក ប្រេឌី ជាអតីតនាយកធនាគារ Kasikornbank ដែលជាធនាគារធំបំផុតលំដាប់ទី៤របស់ថៃ។ លោកបានចូលរួមជាមួយរដ្ឋបាលលោក ប្រយុទ្ធ ចាន់អូចា កាលពីថ្ងៃទី២៤ ខែកក្កដា ហើយត្រូវបានតែងតាំងជារដ្ឋមន្រ្តីនៅថ្ងៃទី១២ ខែសីហា។
ការចាកចេញរបស់លោក ប្រេឌី អាចនឹងធ្វើឱ្យរង្គោះរង្គើការធ្វើគោលនយោបាយដែលជួយសេដ្ឋកិច្ចថៃក្នុងពេលដែលកូវីដ១៩កំពុងរាតត្បាត ខណៈរដ្ឋាភិបាលប្រទេសនេះបញ្ចេញប្រាក់រាប់ពាន់លានដុល្លាដើម្បីធ្វើការងារនេះ។ នាយករដ្ឋមន្រ្តីថៃ លោក ប្រាយុទ្ធ ចាន់អូចា បានប្រមែប្រមូលអ្នកសេដ្ឋកិច្ចថ្មីមួយក្រុមដើម្បីជួយរដ្ឋាភិបាលក្នុងការស្តារការធ្លាក់ចុះនៃសេដ្ឋកិច្ចដែលបណ្តាលមកពីការផ្ទុះឡើងនៃជំងឺកូវីដ១៩។ ការបង្កើតក្រុមអ្នកសេដ្ឋកិច្ចថ្មីធ្វើឡើងក្រោយអតីតរដ្ឋមន្រ្តីក្រសួងហិរញ្ញវត្ថុលោក អ៊ុតតាម៉ា សាវន្យាណា (Uttama Savanayana ) និងអតីតរដ្ឋមន្រ្តីក្រសួងថាមពល លោក សុនធីរ៉ាត់ សុនធីជីរ៉ាវង្ស( Sonthirat Sonthijirawong) ចាកចេញពីក្រុម ក្រោយពីពួកគេប្រកាសលាលែងពីដំណែងកាលពីពាក់កណ្តាលខែកក្កដា។
គិតត្រឹមថ្ងៃអង្គារនេះប្រទេសថៃមានករណីកូវីដ១៩ ចំនួន៣ ៤១៧ ដែលក្នុងនោះអ្នកឆ្លងចំនួន៥៨នាក់បានបាត់បង់ជីវិត។ បញ្ហាកូវីដ១៩នេះបានវាយប្រហារយ៉ាងខ្លាំងទៅលើសេដ្ឋកិច្ចថៃជាពិសេសលើវិស័យទេសចរណ៍ដែលជាឧស្សាហកម្មដ៏សំខាន់មួយរបស់ប្រទេសថៃ៕
