សមត្ថកិច្ចរាជធានីភ្នំពេញ បានចាប់ឃាត់ខ្លួនយុវជនមាតាធម្មជាតិចំនួន៣នាក់នៅថ្ងៃនេះ ពាក់ព័ន្ធនឹងការផ្សាយព័ត៌មានដោយគ្មានច្បាប់អនុញ្ញាត និងករណីគម្រោងដើរទៅភូមិគ្រឹះនាយករដ្ឋមន្ត្រីរឿងបឹងតាមោក។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខ សីហា មានប្រសាសន៍ថា យុវជនមាតាធម្មជាតិចំនួន៣នាក់ដែលត្រូវបានសមត្ថកិច្ចនាំខ្លួនទៅសាកសួរនោះ រួមមាន លោក ថុន រដ្ឋា, កញ្ញា ឡុង គន្ធា និងកញ្ញា ភួន កែវរស្មី។
លោកបន្តថា ក្នុងចំណោមពួកគេទាំង៣នាក់ មានម្នាក់ឈ្មោះ ថុន រដ្ឋា ត្រូវបានសមត្ថកិច្ចឃាត់ខ្លួនសាកសួរពាក់ព័ន្ធនឹងករណីផ្សាយព័ត៌មានដោយគ្មានច្បាប់អនុញ្ញាត ដោយយុវជនរូបនេះ បានរៀបចំបន្ទប់ផ្សាយព័ត៌មានក្នុងផ្ទះរបស់ខ្លួន។
ចំណែកការឃាត់ខ្លួនយុវជនពីរនាក់ទៀត កញ្ញា ឡុង គន្ធា និងកញ្ញា ភួន កែវរស្មី ត្រូវបានអ្នកនាំពាក្យរូបនេះបញ្ជាក់ថា ដោយសារតែពួកគេបង្ហោះព័ត៌មានពាក់ព័ន្ធនឹងការលុបបឹងតាមោក។
លោកថា៖ «អធិការខណ្ឌច្បារអំពៅយើងបានសួរនាំពាក់ព័ន្ធនឹងការផុសព័ត៌មានហ្នឹង អាចមើលទៅក្នុងផេក Mother Nature Cambodia គាត់ផុសទាក់ទងព័ត៌មានថា ការលុបបឹងម៉េចៗ ហើយគាត់ធ្វើការផ្សព្វផ្សាយនិងគ្រោងមកជួបថ្នាក់ដឹកនាំដល់ផ្ទះអីណា»។
ការឃាត់ខ្លួនយុវជនមាតាធម្មជាតិទៅសាកសួរ បានធ្វើឡើងក្រោយពីពួកគេបានប្រកាសពីគម្រោងដើរថ្មើរជើងចេញពីវត្តភ្នំឆ្ពោះទៅកាន់ភូមិគ្រឹះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ នៅម៉ោង១១ព្រឹកថ្ងៃព្រហស្បតិ៍នេះ ដើម្បីស្នើសុំការអន្តរាគមន៍លើក្តីបារម្ភមួយចំនួនជុំវិញការលុបបឹងតាមោក ដូចជា បញ្ហាជន់លិចទឹកក្នុងរាជធានីភ្នំពេញពេលភ្លៀងម្ដងៗ ផលប៉ះពាល់ចំពោះបរិស្ថាន ការបាត់បង់ជម្រកសត្វស្លាប រួមជាមួយជីវចម្រុះក្នុងបឹង ជាដើម។
តាមកំណត់ហេតុរបស់សមត្ថកិច្ចចុះថ្ងៃទី៣ ខែកញ្ញា ឆ្នាំ២០២០ ឱ្យដឹងថា ស្នងការរងនៃស្នងការដ្ឋាននគរបាលរាជធានីភ្នំពេញ លោក ប៊ុន សុសិក្ខា សហការជាមួយអនុប្រធានមន្ទីរព័ត៌មាន លោក ឈាន ប៊ុនថា រួមទាំងព្រះរាជអាជ្ញារង លោក គុជ គឹមឡុង បានឃាត់ខ្លួនសកម្មជនមាតាធម្មជាតិ លោក ថុន រដ្ឋា នៅផ្ទះលេខ០៥ ភូមិត្រពាំងថ្លឹង៣ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។ កំណត់ហេតុសមត្ថកិច្ចបន្តថា ការចាប់ខ្លួនលោក ថុន រដ្ឋា ពាក់ព័ន្ធនឹងការផ្សាយព័ត៌មានពុំមានច្បាប់អនុញ្ញាត៕
