ព្រះអង្គម្ចាស់ក្សត្រី មហាចក្រី សិរិនថន នៃប្រទេសថៃ បានបន្តព្រះរាជឧបត្ថម្ភដល់ព្រះរាជាណាចក្រកម្ពុជា សម្រាប់អភិវឌ្ឍន៍វិទ្យាស្ថានបច្ចេកវិទ្យាកំពង់ឈើទាល នៅខេត្តកំពង់ធំ និងវិទ្យាស្ថានបច្ចេកវិទ្យាកំពង់ស្ពឺ នៅខេត្តកំពង់ស្ពឺ សម្រាប់រយៈពេល៥ឆ្នាំបន្ថែមទៀត។
ព្រះរាជឧបត្ថម្ភនេះធ្វើឡើងតាមរយៈការចុះកិច្ចព្រមព្រៀងគម្រោងព្រះរាជឧបត្ថម្ភដល់ព្រះរាជាណាចក្រកម្ពុជាលើវិស័យអប់រំ រវាងលោក អ៊ួក សោភ័ណ ឯកអគ្គរាជទូតកម្ពុជាប្រចាំប្រទេសថៃ តំណាងភាគីកម្ពុជា ជាមួយលោក ដន ប្រាប៉ាត់វិណៃ ឧបនាយករដ្ឋមន្ត្រី រដ្ឋមន្ត្រីក្រសួងការបរទេស តំណាងភាគីថៃ នៅទីក្រុងបាងកក ប្រទេសថៃ កាលពីថ្ងៃអង្គារ។
យោងតាមសេចក្តីប្រកាសព័ត៌មានរបស់ស្ថានទូតកម្ពុជាប្រចាំប្រទេសថៃ គម្រោងព្រះរាជឧបត្ថម្ភរបស់ព្រះអង្គម្ចាស់ក្សត្រីថៃ សម្រាប់វិស័យអប់រំនៅកម្ពុជា មានរយៈពេល៥ឆ្នាំ គិតចាប់ពីខែកញ្ញា ឆ្នាំ២០២០ ដល់ខែកញ្ញា ឆ្នាំ២០២៥ ក្នុងគោលបំណងចូលរួមអភិវឌ្ឍន៍ប្រព័ន្ធអប់រំប្រកបដោយគុណភាពសម្រាប់យុវជនកម្ពុជា។
ស្ថានទូតបន្តថា ការអនុវត្តគម្រោងព្រះរាជឧបត្ថម្ភនេះនាពេលកន្លងមក បានជំរុញទំនាក់ទំនងរវាងកម្ពុជានិងថៃឱ្យកាន់តែល្អប្រសើរ ជាពិសេសបង្កើតឱ្យមានកិច្ចសហប្រតិបត្តិការល្អទាំងផ្នែករដ្ឋ ឯកជន និងប្រជាជន។
ស្ថានទូតបន្ថែមថា គម្រោងនេះក៏ជួយបង្កើតឱ្យមានការអភិវឌ្ឍធនធានមនុស្សជំនាន់ថ្មីតាមរយៈការផ្តល់អាហារូបករណ៍ដល់សិស្ស និស្សិត និងមន្ត្រីរាជការកម្ពុជា ចំនួន២ ១២៤កន្លែង ចាប់ពីឆ្នាំ២០០៥ដល់ឆ្នាំ២០២០។
គួរបញ្ជាក់ថា វិទ្យាស្ថានបច្ចេកវិទ្យាកំពង់ឈើទាល និងវិទ្យាស្ថានបច្ចេកវិទ្យាកំពង់ស្ពឺ បើកបង្រៀនថ្នាក់បរិញ្ញាបត្ររងនិងបរិញ្ញាបត្រលើជំនាញបច្ចេកវិទ្យាកសិកម្មនិងឧស្សាហកម្ម ក្នុងបេសកកម្មបណ្តុះបណ្តាលអ្នកជំនាញបច្ចេកទេស សម្រាប់ឆ្លើយតបទៅនឹងតម្រូវការការងារក្នុងប្រទេសកម្ពុជា៕
