សហភាពអឺរ៉ុបបានផ្ដល់ជំនួយចំនួន២លាន៥សែនអឺរ៉ូ ជួយគាំទ្រដល់ក្រុមអង្គការសង្គមស៊ីវិលដែលធ្វើការលើបញ្ហាគណនេយ្យភាពសង្គមនៅកម្ពុជា។
ជំនួយនេះត្រូវបានផ្សព្វផ្សាយជាសាធារណៈក្នុងពិធីប្រកាសជាផ្លូវការនៃគម្រោង «គាំទ្រការចូលរួមរបស់ប្រជាពលរដ្ឋប្រកបដោយអត្ថន័យតាមរយៈការប្រើប្រាស់បច្ចេកវិទ្យាឌីជីថល ដើម្បីធ្វើឱ្យប្រសើរឡើងនូវគណនេយ្យភាពសង្គម» នៅល្ងាចថ្ងៃពុធនារាជធានីភ្នំពេញ។
តំណាងសហភាពអឺរ៉ុប អ្នកស្រី ហ្វ្រង់សេស្កា ស៊ីកូម៉ាទីណូ (Francesca Ciccomatino) លើកឡើងថា ជំនួយលើគម្រោងនេះជាផ្នែកមួយនៃកិច្ចសហប្រតិបត្តិការរបស់អឺរ៉ុបនិងកម្ពុជាក្នុងការលើកកម្ពស់លទ្ធិប្រជាធិបតេយ្យ ជាពិសេសការចូលរួមរបស់ប្រជាពលរដ្ឋរស់នៅទីជនបទនិងងាយរងគ្រោះ ក្នុងដំណើរការអភិវឌ្ឍន៍ប្រទេស។
គម្រោងនេះត្រូវអនុវត្តចាប់ពីឆ្នាំ២០១៩ដល់២០២៣ នឹងជួយដោយផ្ទាល់ទៅដល់ស្ត្រីវ័យក្មេងនិងយុវជនប្រមាណជាង១ម៉ឺន៤ពាន់នាក់នៅនឹងសហគមន៍របស់ពួកគេរស់នៅ។ ក្រុមអង្គការសង្គមស៊ីវិលរំពឹងថា គម្រោងនេះក៏នឹងផ្ដល់អត្ថប្រយោជន៍ទៅដល់យុវជនជនជាតិដើមភាគតិច ស្ត្រី-កុមារប្រមាណជាង៩សែននាក់ដែលរស់នៅតំបន់អនុវត្តន៍គម្រោង។
ថវិកាទាំងនេះត្រូវផ្ដល់ដល់អង្គការក្រៅរដ្ឋាភិបាល៣ រួមមាន អង្គការ ឃែរ, វិទ្យាស្ថានតស៊ូមតិនិងគោលនយោបាយ និងអង្គការ INSTEDD។ អង្គការចំនួន៣នោះបានផ្តល់បច្ចេកទេសបណ្ដុះបណ្ដាលនិងផ្ដល់ថវិកាទៅអង្គការចំនួន១២ផ្សេងទៀត ដើម្បីអនុវត្តគម្រោងដោយផ្ទាល់នៅតាមបណ្ដាខេត្តគោលដៅ។ គម្រោងទាំងនោះនឹងត្រូវអនុវត្តនៅក្នុងខេត្តចំនួន៥ រួមមាន ខេត្តរតនគិរី មណ្ឌលគិរី ក្រចេះ ស្ទឹងត្រែង និងខេត្តកោះកុង។
ទាក់ទងនឹងគម្រោងនេះ នាយកវិទ្យាស្ថានតស៊ូមតិ និងគោលនយោបាយ (API) លោក ឡាំ សុជាតិ មានប្រសាសន៍ថា API គាំទ្រនិងពង្រឹងសមត្ថភាពស្តីពីគណនេយ្យភាពសង្គមនិងប្រធានបទពាក់ពន្ឋ័តាមបែបទំនើប ONLINE LEARNING (GOOGLE GLASSROOM) ដល់អង្គការដៃគូនានា ដើម្បីឱ្យអ្នកទាំងនោះជួយដល់អ្នកក្រីក្រ ស្ត្រី ជនពិការ យុវជនជនជាតិដើមភាគតិច ដើម្បីឱ្យពួកគេទទួលបានសេវាសាធារណៈដែលល្អប្រសើរ។
លោក ឡាំ សុជាតិ មានប្រសាសន៍ថា៖ «ស្ត្រី កុមារ និងយុវជនជនជាតិដើមភាគតិច ពិសេសតំបន់ដាច់ស្រយាល ពួកគាត់មិនមានឱកាសដូចអ្នកនៅទីក្រុងទេ ពួកគេត្រូវការជំនួយ។ គម្រោងនេះនឹងជួយពួកគាត់ឱ្យទទួលបានព័ត៌មាននិងសេវាដែលចាំបាច់ចំពោះជីភាពរស់នៅ»។
រដ្ឋលេខាធិការក្រសួងមហាផ្ទៃ លោក ងី ច័ន្ទផល ស្វាគមន៍ចំពោះជំនួយរបស់សហគមន៍អឺរ៉ុបនិងការគាំទ្រគម្រោងជួយដល់ពលរដ្ឋ ប៉ុន្តែលោកក៏ស្នើឱ្យសង្គមស៊ីវិលជួយបណ្ដុះបណ្ដាលដល់អាជ្ញាធរភូមិឱ្យចូលរួមដោះស្រាយបញ្ហាប្រឈមរបស់ពលរដ្ឋផងដែរ។ លោកស្នើឱ្យសង្គមស៊ីវិលផ្ដល់ព័ត៌មានមកលោកផង ប្រសិនបើអាជ្ញាធរថ្នាក់ក្រោមជាតិមិនសហការឬរារាំងការធ្វើសកម្មភាពណាមួយរបស់សង្គមស៊ីវិល។
ប្រសាសន៍លោក ងី ច័ន្ទផល៖ «សុំឱ្យអង្គការទាំងអស់ផ្ដល់ព័ត៌មានមកខាងលើ បើសិនអាជ្ញាធរណារារាំង។ ពេលខ្លះ អាចជាការយល់ច្រឡំ ពេលខ្លះខាងអាជ្ញាធរហ្នឹងគ្នាមិនទាន់យល់ ខាងក្រសួងបើកចំហកិច្ចសហប្រតិបត្តិការទាំងអស់ជាមួយ NGO»៕
