ប្រទេសវៀតណាមបានសម្រេចលើកលែងមិនឱ្យមានការដាក់ដោយឡែក១៤ថ្ងៃសម្រាប់អ្នកជំនាញបរទេស រួមមាន អ្នកវិនិយោគ អ្នកគ្រប់គ្រង និងអ្នកការទូត ដែលចូលក្នុងប្រទេសខ្លួន ក្នុងរយៈពេលតិចជាង១៤ថ្ងៃ។
តាមប្រភពព័ត៌មាន vnexpress កាលពីថ្ងៃអង្គារ បានឱ្យដឹងថា ក្រសួងសុខាភិបាលវៀតណាម នៅតែបន្តគោលការណ៍សុវត្ថិភាពរបស់ខ្លួនដែលតម្រូវឱ្យជនបរទេសទាំងនោះអនុវត្តតាមការណែនាំដែលមានដូចជា ការពាក់ម៉ាស់និងការរក្សាគម្លាតជាដើម ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩។
ក្រៅពីនេះ ពួកគេក៏តម្រូវឱ្យមានការធ្វើតេស្តសុខភាពផ្សេងៗដែលរួមមានទាំងការតេស្តរកវីរុសកូវីដ១៩ផងដែរ។ បើសិនជាមានករណីវីរុសកូវីដ១៩ណាមួយកើតឡើងនោះ ស្ថាប័នដែលអញ្ជើញពួកគេត្រូវតែមានការធានាឬមានក្រុមហ៊ុនធានារ៉ាប់រងអន្តរជាតិណាមួយ ជាអ្នកទទួលខុសត្រូវ នៃការចំណាយទាំងអស់លើផ្នែកវេជ្ជសាស្ត្រនិងការចំណាយផ្សេងៗ។
គួរបញ្ជាក់ថា ប្រទេសវៀតណាមបានចាប់ផ្តើមគិតថ្លៃសេវាអ្នកដែលមកពីបរទសសម្រាប់ការដាក់ដោយឡែកចាប់ពីថ្ងៃទី១ ខែកញ្ញាកន្លងទៅ ដោយឡែកសម្រាប់ជនបរទសដែលមកបំពេញបេសកកម្មការទូតក្នុងប្រទេសវៀតណាមវិញ ត្រូវបានការអនុគ្រោះដោយពុំមានការគិតថ្លៃសេវានោះឡើយ។
ប្រភពដដែលបានឱ្យដឹងថា ជនបរទេសទាំងនោះអាចបន្តស្នាក់នៅក្នុងប្រទេសវៀតណាមបាន ដោយមិនមានការដាក់ដោយឡែកនោះឡើយ បើសិនជាពួកគេពុំមាននរណាម្នាក់ផ្ទុកនូវជំងឺកូវី១៩ ក្នុងរយៈពេល១៤ថ្ងៃក្រោយពីការមកដល់។
គួរបញ្ជាក់ថា ចាប់តាំងពីមានករណីផ្ទុះរីករាលដាលនៃជំងឺកូវីដ១៩ជាសហគមន៍ក្នុងខេត្តដាណាងកន្លងមក ក្នុងរយៈពេលបីថ្ងៃចុងក្រោយនេះ វៀតណាមពុំទាន់រកឃើញករណីថ្មីណាមួយ ឆ្លងមកពីសហគមន៍នោះឡើយ។
បច្ចុប្បន្នប្រទេសវៀតណាមមានករណីឆ្លងកូវី១៩សរុបចំនួន១ ០៤៤ករណី ក្នុងនោះមានអ្នកស្លាប់ចំនួន៣៤នាក់ និង៥៥ 000នាក់ផ្សេងទៀតត្រូវបានដាក់ដោយឡែក។
តាមប្រភពពីទីភ្នាក់ងារព័ត៌មានរដ្ឋវៀតណាម កាលពីថ្ងៃទី១៣ ខែសីហាកន្លងទៅ វៀតណាមគ្រោងធ្វើតេស្តវ៉ាក់សាំងបង្ការជំងឺកូវីដ១៩លើមនុស្សនៅក្នុងខែតុលាខាងមុខនេះ ហើយគ្រោងផលិតចែកចាយលើទីផ្សារចំនួន៣០លានដបក្នុងមួយឆ្នាំផងដែរ៕
