អាជ្ញាធរជាតិអប្សរា ឱ្យដឹងថា ចម្លាក់ប្រអប់ព្រះហស្តឆ្វេងនៃព្រះពុទ្ធរូបមួយអង្គធ្វើពីថ្មភក់ ត្រូវបានប្រទះឃើញនៅក្នុងព្រៃចម្ងាយប្រមាណ៣០០ម៉ែត្រ នៅខាងត្បូងប្រាសាទបាយ័ន ក្នុងខេត្តសៀមរាប។
លោក ឈូក សុម៉ាឡា មន្ត្រីចុះបញ្ជីបេតិកភណ្ឌរូបីនៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ ត្រូវហ្វេសប៊ុកអាជ្ញាធរជាតិអប្សរាបានស្រង់ប្រសាសន៍កាលពីថ្ងៃម្សិលមិញថា ចម្លាក់នេះមានទំហំបណ្តោយ០.៩៥ម៉ែត្រ ទទឹង០.៤២ម៉ែត្រ និងកម្រាស់០.២៤ម៉ែត្រ មានសភាពហាក់មិនទាន់ឆ្លាក់រួចរាល់នៅឡើយ ដោយសារមានស្នាមមុខពន្លាកនិងមិនទាន់ធ្វើការខាត់រំលីង។
លោកបន្តថា ចម្លាក់ដែលមានត្រឹមកដៃនិងម្រាមទាំង៥ដែលលាផ្ងារបាតដៃទៅលើនេះ គឺស្ថិតនៅក្នុងសម័យកណ្តាល ទំនងជាព្រហស្តព្រះពុទ្ធបដិមាក្នុងកាយវិការភូមិស្បស៌មុទ្រា ឬហៅថាកាយវិការមារវិជ័យ ឬផ្ចាញ់មារ។
លោកបានគូសបញ្ជាក់ថា៖ «ការសន្និដ្ឋានជាកាយវិការភូមិស្បស៌មុទ្រាបែបដូចនេះ គឺយោងទៅលើហេតុផលដែលមានព្រះពុទ្ធបដិមាធំៗចំនួន២អង្គដែលស្ថិតនៅជុំវិញប្រាសាទបាយ័ន រួមមាន ព្រះអង្គឥន្ទ្រទេពនិងព្រះអង្គងោក គឺសុទ្ធសឹងតែសង់ឡើងក្នុងទំហំធំនិងពីថ្មភក់ច្រើនដុំ ហើយស្ថិតនៅក្នុងកាយវិការភូមិស្បស៌មុទ្រាដូចគ្នា»។
បើតាមអាជ្ញាធរជាតិអប្សរា បច្ចុប្បន្ន ចម្លាក់ប្រអប់ព្រះហស្តនេះត្រូវបានក្រុមការងារអាជ្ញាធរជាតិអប្សរាសហការជាមួយស្ថាបន័ពាក់ព័ន្ធ បានធ្វើកំណត់ហេតុប្រគល់-ទទួលនិងដឹកយកទៅរក្សាទុកនៅមជ្ឈមណ្ឌលអាជ្ញាធរជាតិអប្សរា ដើម្បីចុះបញ្ជីនិងរក្សាទុករង់ចាំការជួសជុលនៅថ្ងៃអនាគត៕