អតីតមន្ត្រីជាន់ខ្ពស់បក្សប្រឆាំងមួយរូបគឺលោក សុន ឆ័យ ត្រូវបានព្រះមហាក្សត្រត្រាស់បង្គាប់ឱ្យធ្វើនយោបាយឡើងវិញ ក្រោយពីលោកដាក់លិខិតស្នើសុំក្រសួងមហាផ្ទៃ។
ព្រះរាជក្រឹត្យចុះថ្ងៃទី៣ ខែកញ្ញា ព្រះមហាក្សត្របានត្រាស់បង្គាប់ឱ្យលោក សុន ឆ័យ ភេទប្រុស អាយុ៦៤ឆ្នាំ បានធ្វើនយោបាយឡើងវិញ។
លោក សុន ឆ័យ អតីតអ្នកតំណាងរាស្ត្រមណ្ឌលភ្នំពេញ និងជាអតីតសមាជិកគណៈកម្មាធិការអចិន្ត្រៃយ៍ នៃអតីតគណបក្សសង្គ្រោះជាតិ និយាយក្នុងលិខិតចុះថ្ងៃទី១៧ ខែសីហា ដែលផ្ញើទៅក្រសួងមហាផ្ទៃថា ផ្អែកតាមមាត្រា៤៥ថ្មីនៃច្បាប់គណបក្សនយោបាយ លោកស្នើរដ្ឋមន្ត្រីក្រសួងមហាផ្ទៃពិនិត្យតាមនីតិវិធី ដើម្បីផ្តល់កាយសម្បទាធ្វើនយោបាយឡើងវិញដោយក្តីអនុគ្រោះ។
លោក សុន ឆ័យ និងមន្ត្រី១១៧រូបផ្សេងទៀត ត្រូវតុលាការកំពូលចេញសាលដីកាហាមធ្វើសកម្មភាពនយោបាយរយៈពេល៥ឆ្នាំ ខណៈតុលាការជាន់ខ្ពស់មួយនេះប្រកាសរំលាយអតីតគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧។
អតីតគណបក្សសង្គ្រោះជាតិដែលត្រូវបានរំលាយ មានអ្នកបោះឆ្នោតគាំទ្រជាង៤០ភាគរយ មានអាសនៈក្នុងសភាចំនួន៥៥ និងអាសនៈឃុំ-សង្កាត់ចំនួន៥០០៧ ជាចំនួនប្រហាក់ប្រហែលអាសនៈក្រុមប្រឹក្សាឃុំ-សង្កាត់ដែលកាន់កាប់ដោយគណបក្សកាន់អំណាចបច្ចុប្បន្នដែរ។
ការរំលាយនោះ អាសនៈក្នុងសភានិងអាសនៈឃុំ-សង្កាត់របស់គណបក្សប្រឆាំង ត្រូវបានរឹបអូសយកទៅចែកឱ្យគណបក្សផ្សេងៗដែលពលរដ្ឋមិនបានបោះឆ្នោតឱ្យ។
គិតត្រឹមថ្ងៃសុក្រនេះ អតីតមន្ត្រីបក្សប្រឆាំង១២នាក់ បានចេញលិខិតសុំសិទ្ធិធ្វើនយោបាយ ក្នុងចំណោមមន្ត្រី១១៨នាក់ដែលបានហាមធ្វើសកម្មភាពនយោបាយ ខណៈគណបក្សនេះត្រូវបានរំលាយជិត៣ឆ្នាំរួចមក៕