សមត្ថកិច្ចរាជធានីភ្នំពេញ អះអាងថា មន្ត្រីជំនាញកំពុងរៀបចំឯកសារ ដោយគ្រោងបញ្ជូនសកម្មជនមាតាធម្មជាតិចំនួន៣នាក់ ទៅសាលាដំបូងរាជធានីភ្នំពេញ នៅថ្ងៃនេះ ពាក់ព័ន្ធនឹងបទ«ញុះញង់»។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខ សីហា ប្រាប់វីអូឌីនៅព្រឹកនេះថា ក្រោយពីបានសាកសួររួច សមត្ថកិច្ចនឹងបញ្ជូនយុវជនទាំង៣នាក់ទៅតុលាការពាក់ព័ន្ធនឹងបទ«ញុះញង់»។
លោកថា៖ «នៅព្រឹកហ្នឹងដែរ សមត្ថកិច្ចបានរៀបចំសំណុំឯកសារ ដើម្បីបញ្ជូនយុវជនទាំង៣ នាក់ទៅតុលាការពីបទញុះញង់»។
សមត្ថកិច្ចបានចាប់ខ្លួនសកម្មជនមាតាធម្មជាតិ លោក ថុន រដ្ឋា, កញ្ញា ឡុង គន្ធា និងកញ្ញា ភួន កែវរស្មី កាលពីម្សិលមិញ ក្រោមហេតុផលថា រៀបចំដំឡើងស្ទូឌីយោផ្សាយវីដេអូនិងព័ត៌មានដោយគ្មានច្បាប់អនុញ្ញាត និងការបង្ហោះព័ត៌មានពីយុទ្ធនាការដើរទៅភូមិគ្រឹះនាយករដ្ឋមន្ត្រីដើម្បីសុំឱ្យដោះស្រាយករណីលុបបឹងតាមោក៕