គណៈកម្មាធិការព្រំដែនកម្ពុជាអះអាងថា រកមិនឃើញប្រជាពលរដ្ឋរស់នៅក្នុងខេត្តត្បូងឃ្មុំ បាត់បង់ដីស្រែទៅវៀតណាមទេ តែរកឃើញអ្នកញុះញង់ឱ្យពលរដ្ឋតវ៉ាដើម្បីបានដីក្រោយបោះបង្គោលព្រំដែនហើយ។
អនុប្រធានគណៈកម្មាធិការព្រំដែនកម្ពុជាលោកស្រី កុយ ពិសី លើកឡើងថា ក្នុងដំណើរទៅខេត្តត្បូងឃ្មុំនៅថ្ងៃនេះ សាកសួរពលរដ្ឋនៅស្រុកពញ្ញាក្រែករកមិនឃើញអ្នកបាត់បង់ដីទៅវៀតណាមទេ។
លោកស្រី កុយ ពិសី៖«គ្រប់ចម្លើយសុទ្ឋតែឆ្លើយថា អត់មានបាត់ដីទៅវៀតណាមទេ អ្វីដែលគាត់ចូលរួមជាមួយពួកអគតិកន្លងទៅ ដោយ សារពួកអគតិបានសន្យាថា នឹងជួយតវ៉ាសុំដីដែលកម្ពុជា ទទួលបានបន្ទាប់ពីការបញ្ចប់ការងារខណ្ឌសីមានិងបោះ បង្គោលព្រំដែននៅតំបន់នោះ ឲ្យពួកគាត់បានអាស្រ័យ ផលទៅថ្ងៃមុខតែប៉ុណ្ណោះ។ ការពិតត្រូវបានលាតត្រដាងបន្ថែមទៀត»។
កម្ពុជា-វៀតណាម មានព្រំប្រទល់ដីគោកប្រវែង១២៧០គីឡូម៉ែត បច្ចុប្បន្នបោះបាន៨៤ភាគរយនៅសស់១៤ភាគរយទៀតមិនទាន់ឯកភាពគ្នា ដែលភាគីទាំងពីររង់ចាំការគូរចម្លងផែនទីពីភាគីបារាំងពីខ្នាត «១លើ១០០ពាន់» មកខ្នាត «១លើ៥០ពាន់» វិញ។
បញ្ហាព្រំដែននៅក្នុងខេត្តត្បូងឃ្មុំនេះ រដ្ឋាភិបាលបានចាប់ខ្លួនអ្នកចោទថា បាត់ដីទៅវៀតណាមជាបន្តបន្ទាប់ ក្នុងនោះរួមទាំងអ្នកនយោបាយ សង្គមស៊ីវិល និងក្រុមយុវជន៕