ទំនាក់ទំនងរវាងក្រុងដេលីនិងក្រុងប៉េកាំងកាន់តែមានភាពតានតឹង ក្រោយពីភាគីឥណ្ឌាបានចោទប្រកាន់ថា កងទ័ពចិនបានចាប់ពង្រត់ជនស៊ីវិលឥណ្ឌាចំនួន៥នាក់នៅព្រំប្រទល់ប្រទេសទាំងពីរក្នុងតំបន់ដែលកំពុងមានជម្លោះស្ថិតនៅជួរភ្នំហិមាល័យ។
ព័ត៌មាននៃការចាប់ខ្លួនពលរដ្ឋស៊ីវិលឥណ្ឌាទាំង៥នាក់ ត្រូវបានផ្សព្វផ្សាយជាលើកដំបូងដោយសមាជិកសភារបស់ឥណ្ឌាមកពីរដ្ឋ Arunachal Pradesh។
តាមការចុះផ្សាយរបស់សារព័ត៌មាន BBC លោក Tapir Gao សមាជិកសភារដ្ឋ Arunachal Pradesh របស់ឥណ្ឌា បានសរសេរក្នុងបណ្តាញសង្គមរបស់លោកថា ការចាប់ខ្លួននោះបានកើតឡើងនៅថ្ងៃទី៣ ខែកញ្ញា នៅក្បែរព្រំដែន។ ប៉ុន្តែលោកមិនបានផ្តល់ព័ត៌មានលម្អិតបន្ថែមទេ។ កងទ័ពឥណ្ឌាបានបញ្ជូនសារសួរនាំបញ្ហានេះទៅកងទ័ពចិនរួចហើយ ប៉ុន្តែរហូតដល់ពេលនេះភាគីចិនពុំទាន់បានឆ្លើយតបថាយ៉ាងណានោះទេ។
បុរសជនជាតិឥណ្ឌាទាំង៥នាក់ត្រូវបានកងទ័ពចិនចាប់ខ្លួននៅពេលដែលពួកគេចូលទៅបរបាញ់នៅតំបន់ក្បែរព្រំដែនដែលកំពុងមានជម្លោះជាមួយចិនក្នុងរដ្ឋ Arunachal Pradesh។
ប្រទេសឥណ្ឌាក៏ធ្លាប់បានចោទប្រកាន់ប្រទេសចិនថា បង្កភាពតានតឹងផ្នែកយោធានៅតាមបណ្តោយព្រំដែនចំនួនពីរដងក្នុងរយៈពេលមួយសប្តាហ៍កាលពីខែសីហាកន្លងទៅ ក៏ប៉ុន្តែការចោទប្រកាន់ទាំងនេះត្រូវបានបដិសេធដោយទីក្រុងប៉េកាំង។
កាលពីថ្ងៃទី៥ ខែកញ្ញា នៅក្នុងទីក្រុងមូស្គូ រដ្ឋមន្រ្តីក្រសួងមហាផ្ទៃឥណ្ឌា លោក Rajnath Singh បានជួបជាមួយសមភាគីចិន ក៏ប៉ុន្តែការស្វែងរកវិធីដោះស្រាយនោះ បានក្លាយជាសង្គ្រាមពាក្យសម្តីទៅវិញ។
ប្រទេសចិនបាននិយាយថា ការឈរជើងនៅតាមព្រំដែនគឺជាកំហុសរបស់ឥណ្ឌាទាំងស្រុង។ ចំណែកប្រទេសឥណ្ឌាវិញ បានចោទប្រកាន់ទៅចិនពីការប្រមូលផ្តុំកងទ័ពជាច្រើនលើសលុប រួមនឹងឥរិយាបថឈ្លានពាននិងការប៉ុនប៉ងផ្លាស់ប្តូរស្ថានភាពជាឯកតោភាគី៕
