សមត្ថកិច្ចជំនាញខេត្តព្រះសីហនុ បានឃាត់ខ្លួនជនសង្ស័យជិត២០នាក់ ពាក់ព័ន្ធនឹងករណីលួចកាត់ខ្សែភ្លើងអ៊ុបទិចដែលតភ្ជាប់សម្រាប់បំភ្លឺតាមមហាវិថីមួយចំនួនក្នុងស្រុកព្រៃនប់និងក្រុងព្រះសីហនុ។
ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ ត្រូវបានគេហទំព័រអគ្គស្នងការដ្ឋាននគរបាលជាតិ ស្រង់ប្រសាសន៍មកផ្សាយកាលពីថ្ងៃម្សិលមិញថា កម្លាំងសមត្ថកិច្ចខេត្ត ដោយមានការសហការពីព្រះរាជអាជ្ញាអមសាលាដំបូងខេត្ត បានចុះទៅបង្ក្រាបនៅទីតាំងប្រមូលទិញអេតចាយក្នុងក្រុងព្រះសីហនុ២កន្លែងនិងស្រុកព្រៃនប់៣កន្លែង ក្នុងនោះបានឃាត់ខ្លួនជនសង្ស័យចំនួន១៧នាក់ ពាក់ព័ន្ធករណីលួចកាត់ទម្លុះទម្លាយនិងកាត់ខ្សែភ្លើងអ៊ុបទិច។
លោកបន្តថា ការឈានទៅដល់ការឃាត់ខ្លួនជនសង្ស័យទាំងនោះ បានធ្វើឡើងក្រោយពីមានបណ្តឹងរាយការណ៍ពីក្រុមហ៊ុន ឌុយរ៉ាល់ អេឡិចត្រិច ជុំវិញករណីលួចកាត់ខ្សែភ្លើងរបស់ក្រុមហ៊ុន ដែលតបណ្ដាញបំភ្លឺតាមមហាវិថីនានានៅតំបន់ពយម៉ាចូវ ស្ថិតក្នុងភូមិគគីរ ឃុំបិតត្រាំង ស្រុកព្រៃនប់ ខេត្ដព្រះសីហនុ និងការងារតបណ្ដាញអគ្គិសនីបំភ្លឺតាមដងផ្លូវទូទាំងខេត្ដព្រះសីហនុ នាពេលកន្លងមក។
លោក ជួន ណារិន្ទ បានបញ្ជាក់ថា សម្ភារវត្ថុតាងដែលសមត្ថកិច្ចជំនាញរឹបអូសបាន រួមមាន ស្ពាន់ខ្សែភ្លើងទម្ងន់១៥គីឡូក្រាម ម៉ាក THIPHA Cable2020 CXV/DSTA 4×12-1x12mm2 ជាកម្មសិទ្ធិរបស់ក្រុមហ៊ុន ឌុយរ៉ាល់ អេឡិចត្រិច។
បើតាមស្នងការនគរបាលខេត្តរូបនេះ ក្រោយពីប្រតិបត្តិការបង្ក្រាបនោះ សមត្ថកិច្ចបានធ្វើការសាកសួរជនសង្ស័យទាំងនោះ ក្នុងការរៀបចំឯកសារដោយភ្ជាប់ជាមួយវត្ថុតាងតាមនីតិវិធី ដើម្បីបញ្ជូនទៅកាន់សាលាដំបូងខេត្ដ ចាត់ការតាមច្បាប់៕
