រដ្ឋាភិបាលវៀតណាមបានអនុញ្ញាតទីក្រុងដាណាងបើកឡើងវិញនូវមធ្យោបាយដឹកជញ្ជូននានាដូចជា យន្តហោះ រថភ្លើង និងរថយន្តក្រុង ក្រោយសេវាដឹកជញ្ជូនក្នុងទីក្រុងទេសចរណ៍មួយនេះត្រូវបានបិទបន្ទាប់ពីរកឃើញករណីកូវីដ១៩ដែលឆ្លងក្នុងសហគមន៍ជាបន្តបន្ទាប់។
សារព័ត៌មាន vnexpress បានចុះផ្សាយថា ការបើកដំណើរការឡើងវិញនេះនឹងចាប់ផ្តើមពីថ្ងៃចន្ទនេះ។ ប្រភពដដែលបញ្ជាក់ថា កាលពីរសៀលថ្ងៃអាទិត្យម្សិលមិញ ក្រសួងដឹកជញ្ជូននៃប្រទសវៀតណាមបានជូនដំណឹងទៅដល់ក្រុមហ៊ុនតូចធំទាំងអស់អំពីការបើកឱ្យដំណើរការឡើងវិញនូវសេវាដឹកជញ្ជូននេះ។
បើទោះជាយ៉ាងណាក៏ដោយ អ្នកដំណើរទាំងអស់នៅតែតម្រូវឱ្យបង្ហាញរបាយការណ៍វេជ្ជសាស្រ្តឱ្យបានត្រឹមត្រូវ ក្នុងនោះផងដែរ សម្រាប់យានយន្តដែលត្រូវចាកចេញពីក្រុងដាណាងវិញ គឺតម្រូវឱ្យអ្នកដំណើរទាំងអស់អនុវត្តនូវគោលកាណ៍គម្លាតសុវត្ថិភាពនិងពាក់ម៉ាស់។
ប្រភពដដែលបានលើកឡើងទៀតថា ចាប់តាំពីថ្ងៃទី៥ ខែកញ្ញាកន្លងមក ការរក្សាគម្លាតសុវត្ថិភាពនៅទីក្រុងដាណាងចាប់ផ្តើមបន្ធូរបន្ថយ បន្ទាប់ពីការរីករាលដាលនៃជំងឺកូវីដ១៩ក្នុងសហគមន៍នេះស្ថិតក្រោមការគ្រប់គ្រង។
ដោយឡែក សម្រាប់ភោជនីយដ្ឋាន ហាងអាហារ និងភេសជ្ជៈផ្សេងៗ ក៏ត្រូវបានអនុញ្ញាតឱ្យបើកឡើងវិញនូវសេវាកម្មវេចខ្ចប់ផងដែរ ។
កាលពីថ្ងៃទី២៥ ខែកក្កដា ការឆ្លងជំងឺកូវីដ១៩ក្នុងសហគម៍បានកើតឡើងក្នុងក្រុងដាណាងដែលគិតចាប់ពីពេលនោះ ក្រុងទេសចរណ៍មួយនេះរកឃើញអ្នកឆ្លងកូវីដ១៩ចំនួន៣៨៩ករណី។ ដោយសារតែបញ្ហានេះ រដ្ឋាភិបាលបានសម្រេចផ្អាកមិនឱ្យមានជើងហោះហើរ រថយន្តក្រុង និងរថភ្លើងធ្វើដំណើរចេញចូលទីក្រុង៕
