រដ្ឋមន្ត្រីការពារជាតិចិន លោក Wei Fenghe ត្រូវបានរំពឹងថា នឹងចូលជួបសមភាគីឥណ្ឌូណេស៊ី នៅថ្ងៃអង្គារនេះ ក្នុងដំណើរទស្សនកិច្ចទៅកាន់ទីក្រុងចាកាតា ស្របពេលដែលទីក្រុងប៉េកាំងព្យាយាមធ្វើឱ្យមានតុល្យភាពនៃឥទ្ធិពលរបស់អាមេរិកនៅអាស៊ីប៉ាស៊ីហ្វិក។
ដំណើរទស្សនកិច្ចនេះ បានធ្វើឡើងបន្ទាប់ពីលោក Wei Fenghe បានចូលជួបមេដឹកនាំម៉ាឡេស៊ី កាលពីថ្ងៃចន្ទម្សិលមិញ។
ប្រភពកាសែត SCMP បានឱ្យដឹងថា ដំណើរទស្សនកិច្ចនេះ ធ្វើឡើងនៅមុនពេលនៃការចាប់ផ្តើមកិច្ចប្រជុំអាស៊ាននៅថ្ងៃពុធនិងបញ្ចប់ទៅវិញនៅថ្ងៃសៅរ៍ ដោយក្នុងកិច្ចប្រជុំនេះ គេរំពឹងថា នឹងមានវត្តមានលោក Mike Pompeo ដែលជារដ្ឋមន្រ្តីការបរទេសសហរដ្ឋអាមេរិកចូលរួមផងដែរ ។
ប្រទេសឥណ្ឌូណេស៊ី ធ្លាប់មានការប៉ះទង្គិចជាមួយទីក្រុងប៉េកាំងជុំវិញបញ្ហាដែលនាវានេសាទចិនបានចូលទៅក្នុងតំបន់សេដ្ឋកិច្ចផ្តាច់មុខរបស់ឥណ្ឌូណេស៊ីនៅជុំវិញកោះ Natuna។ ក្រៅពីនេះ ឥណ្ឌូណេស៊ី ក៏ធ្លាប់បានច្រានចោលបន្ទាត់ផែនទីប្រាំបួនដែលចិនប្រើជាមូលដ្ឋានសម្រាប់ការទាមទារដែនទឹករបស់ខ្លួនផងដែរ។
បើទោះជាមានជម្លោះក៏ពិតមែន ប៉ុន្តែប្រទេសឥណ្ឌូនេស៊ី ដែលកំពុងប្រឈមមុខនឹងវិបត្តិសេដ្ឋកិច្ចក្នុងអំឡុងពេលនៃការកើនឡើងនៃជំងឺកូវីដ១៩ បានងាកទៅរកក្រុមហ៊ុនផលិតថ្នាំរបស់ចិនវិញ ដើម្បីធានាការផ្គត់ផ្គង់ប្រសិទ្ធភាពនៃវ៉ាក់សាំងព្យាបាលជំងឺ រួមទាំងបើកស្វាគមន៍ការវិនិយោគរបស់ចិនសម្រាប់កំណើនសេដ្ឋកិច្ចរបស់ខ្លួន។
កាលពីថ្ងៃចន្ទ លោក Wei បានប្រាប់នាយករដ្ឋមន្រ្តីម៉ាឡេស៊ី លោក Muhyiddin Yassin ថាប្រទេសចិនមានឆន្ទៈធ្វើការជាមួយបណ្តាប្រទេសក្នុងតំបន់អាស៊ាន ដើម្បីជួយគ្នាទៅវិញទៅមក ក្នុងការថែរក្សាសន្តិភាពនៅសមុទ្រចិនខាងត្បូង ហើយក្នុងនោះក៏មានប្រទេសម៉ាឡេស៊ីផងដែរ។
លោកបានបន្ថែមថា ការការពារស្ថិរភាពនៅតំបន់សមុទ្រចិនខាងត្បូង គឺជាការទទួលខុសត្រូវរួមគ្នារវាងចិននិងម៉ាឡេស៊ី នេះបើយោងតាមការរាយការណ៍នៃកាសែត Xinhua របស់ចិន ។
លោក Wei ក៏បានបញ្ជាក់ទៀតថា ប្រទេសចិនបានប្តេជ្ញាចិត្តពង្រឹងកិច្ចសហប្រតិបត្តិការការពារជាតិរវាងប្រទេសទាំងពីរនិងរឹតចំណងរវាងយោធានិងយោធាផងដែរ។
នាយករដ្ឋមន្ត្រីម៉ាឡេស៊ី លោក Muhyiddin បាននិយាយថា ប្រទេសម៉ាឡេស៊ីក៏មានឆន្ទៈធ្វើការជាមួយប្រទេសចិន ដើម្បីពង្រឹងកិច្ចសហប្រតិបត្តិការទ្វេភាគីលើគ្រប់វិស័យ រួមទាំងវិស័យការពារជាតិ អប់រំ សេដ្ឋកិច្ច និងពាណិជ្ជកម្ម។
ក្នុងដំណើរទស្សនកិច្ចរបស់លោក Wei នេះ អតីតអនុរដ្ឋមន្រ្តីក្រសួងការពារជាតិម៉ាឡេស៊ី លោក Liew Chin Tong បានព្រមានថា សមុទ្រចិនខាងត្បូងអាចហៅជាតំបន់បាល់កង់នៃពិភពលោក ដែលប្រទេសមហាអំណាចអាចដើរឆ្ពោះទៅរកវិបត្តិនយោបាយនិងសង្គ្រាម។
លោកបានបន្ថែមទៀតថា ក្រៅពីតំបន់អាស៊ីអាគ្នេយ៍ដែលមានតាមសមុទ្រនោះ គ្មានតំបន់ណាផ្សេងទៀតនោះឡើយ ដែលមានចំណែកខ្ពស់និងមានផលប៉ះពាល់ខ្លាំងចំពោះការកើនឡើងរបស់ចិន ក្នុងអំឡុងពេលដែលភាពតានតឹងរវាងអាមេរិកនិងចិនកាន់តែខ្លាំងឡើងៗនេះ។
លោក Liew Chin Tong បញ្ជាក់ថា៖ «ខ្ញុំតែងតែធ្វើការតស៊ូមតិថា ប្រទេសចិនត្រូវតែចាត់ទុករដ្ឋក្នុងអាស៊ីអាគ្នេយ៍ ជាប្រទេសមានអាទិភាពលើគោលនយោបាយការបរទេសលេខមួយ»។
