មន្ត្រីនគរបាលក្រុងតាខ្មៅ បានឱ្យដឹងថា រថយន្ត៦គ្រឿងបានរងការខូចខាតនៅក្នុងគ្រោះថ្នាក់ចរាចរណ៍មួយនៅព្រឹកថ្ងៃនេះ នៅលើស្ពានព្រែកសំរោង ជាស្ពានតភ្ជាប់ក្រុងតាខ្មៅនិងខណ្ឌច្បារអំពៅ។
អធិការរងនគរបាលក្រុងតាខ្មៅ លោក ភឿង វ៉ាត បានប្រាប់វីអូឌីថា គ្រោះថ្នាក់ចរាចរណ៍នេះ បានកើតឡើងនៅម៉ោងប្រហែល៦កន្លះព្រឹក បន្ទាប់ពីរថយន្តដឹកទំនិញធុនធំមួយជួបបញ្ហាបច្ចេកទេសនៅលើស្ពាន ហើយបានរអិលថយក្រោយ ដោយបណ្ដាលឱ្យបុករថយន្ត៥គ្រឿងផ្សេងទៀត។
ទោះជាយ៉ាងណា មន្ត្រីនគរបាលរូបនេះ ញ្ជាក់ថា មិនមាននរណាម្នាក់រងរបួសនៅក្នុងគ្រោះថ្នាក់ចរាចរណ៍នេះនោះឡើយ។
លោក ភឿង វ៉ាត បន្ថែមថា អ្នកបើកបររថយន្តដឹកទំនិញនោះបានរត់គេចខ្លួនហើយក្រោយពីហេតុការណ៍គ្រោះថ្នាក់បានកើតឡើង។
លោក ភឿង វ៉ាត ឱ្យដឹងទៀតថា រថយន្តដែលរងការខូចខាតទាំងអស់ត្រូវបានសមត្ថកិច្ចស្ទូចយកទៅរក្សាទុកនៅអធិការដ្ឋាននគរបាលក្រុងតាខ្មៅ ដើម្បីដោះស្រាយតាមនីតិវិធីច្បាប់៕