គណៈកម្មាធិការអន្តរក្រសួង បាននិងកំពុងរៀបចំផែនការមេសម្រាប់អភិវឌ្ឍន៍វិស័យទេសចរណ៍ខេត្តសៀមរាប ឆ្នាំ២០២០-២០៣៥ ដែលជាយន្តការចាំបាច់មួយសម្រាប់ឆ្លើយតបទៅនឹងឥទ្ធិពលនៃជំងឺឆ្លងកូវីដ១៩ នាពេលបច្ចុប្បន្ន ក៏ដូចជាទៅអនាគត។
ការរៀបចំផែនការមេនេះ ត្រូវបានយកមកពិភាក្សានៅក្នុងកិច្ចប្រជុំគណៈកម្មារអន្តរក្រសួង ដោយមានការចូលរួម ពីថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុ, ក្រសួងទេសចរណ៍, ក្រសួងវប្បធម៌ និងវិចិត្រសិល្បៈ, ក្រសួងបរិស្ថាន និងសមាជិកគណៈកម្មាធិការជាតិអភិវឌ្ឍន៍វិស័យទេសចរណ៍ ដែលធ្វើឡើងនៅខេត្តសៀមរាប កាលពីថ្ងៃចន្ទ។
សេចក្តីប្រកាសព័ត៌មានស្តីពីលទ្ធផលនៃកិច្ចប្រជុំអន្តរក្រសួង ដែលផ្សព្វផ្សាយដោយក្រសួងសេដ្ឋកិច្ច និងហិរញ្ញវត្ថុ នៅថ្ងៃនេះ បានលើកឡើងថា ផែនការមេអភិវឌ្ឍន៍វិស័យទេសចរណ៍ខេត្តសៀមរាបនេះ ត្រូវបានរំពឹងថា នឹងក្លាយជាយន្តការដ៏មានសារសំខាន់មួយសម្រាប់ខេត្តសៀមរាប ដែលជាខេត្តទេសចរណ៍អន្តរជាតិ ទទួលស្គាល់ជាសកលលើការអភិរក្ស និងគាំពារសម្បត្តិបេតិកភណ្ឌវប្បធម៌និងបរិស្ថានធម្មជាតិ។
សេចក្តីប្រកាសព័ត៌មាន បន្តថា ផែនការមេនេះ ក៏នឹងធានាឱ្យបាននូវផលប្រយោជន៍សង្គម-សេដ្ឋកិច្ចជាអតិបរមាពីវិស័យទេសចរណ៍ ផ្សារភ្ជាប់ជាមួយការអភិវឌ្ឍសេដ្ចកិច្ចមូលដ្ឋាន ការកាត់បន្ថយភាពក្រីក្រ និងជំរុញខេត្តមួយនេះឱ្យក្លាយជាគោលដៅទេសចរណ៍ប្រកបដោយគុណភាពនិងភាពទាក់ទាញសម្រាប់ភ្ញៀវទេសចរជាតិនិងអន្តរជាតិ។
តាមរយៈសេចក្តីប្រកាសព័ត៌មាននេះ គណៈកម្មការអន្តរក្រសួងក៏រំពឹងដែរថា ផែនការមេនេះក៏នឹងជួយលើកស្ទួយវប្បធម៌ ទ្រទ្រង់ដល់កិច្ចគាំពារបរិស្ថាន និងផលប៉ះពាល់ជាអវិជ្ជមានដល់តំបន់អង្គរនិងធនធានធម្មជាតិឱ្យបានជាអតិបរមាផងដែរ។
សេចក្តីប្រកាសព័ត៌មានបញ្ជាក់ថា៖ «ជារួម ចក្ខុវិស័យរបស់ផែនការមេអភិវឌ្ឍន៍ទេសចរណ៍ខេត្តសៀមរាប [២០២០-២០៣៥] គឺការក្តាប់យកមកវិញនូវមោទកភាព ជាគោលដៅទេសចរណ៍ចម្បងបំផុតរបស់វិស័យទេសចរណ៍កម្ពុជា និងជាគោលដៅទេសចរណ៍ចម្បងក្នុងតំបន់អាស៊ីអាគ្នេយ៍» ។
ដើម្បីសម្រេចនូវចក្ខុវិស័យនេះ គណៈកម្មការអន្តរក្រសួងក៏បានដាក់ចេញនូវយុទ្ធសាស្ត្រមួយចំនួនផងដែរ រួមមាន ការអភិវឌ្ឍតំបន់ទេសចរណ៍អាទិភាព, វិនិយោគទេសចរណ៍ និងការអភិវឌ្ឍរបៀងទេសចរណ៍ថ្មីៗ, អភិវឌ្ឍន៍ទីផ្សារ និងផ្សព្វផ្សាយទេសចរណ៍, ពង្រឹងគុណភាព និងអភិវឌ្ឍន៍ធនធានមនុស្សក្នុងវិស័យទេសចរណ៍, ការគ្រប់គ្រងបរិស្ថាន, អភិវឌ្ឍន៍ហេដ្ឋារចនាសម្ព័ន្ធ និងការពង្រឹងអភិបាលកិច្ចសម្រាប់ទ្រទ្រង់ការអភិវឌ្ឍទេសចរណ៍ក្នុងខេត្តនេះ។
សេចក្តីប្រកាសព័ត៌មានក៏បានបញ្ជាក់ដែរថា តាមការព្យាករក្នុងឆ្នាំ២០៣៥ ទេសចរអន្តរជាតិនឹងនាំមកនូវចំណូលប្រមាណ៤,៧៦៥លានដុល្លារ និងទេសចរជាតិនឹងនាំមកនូវចំណូលប្រមាណ១,២៨០លានដុល្លារ៕
