ក្រសួងធនធានទឹក និងឧតុនិយម អំពាវនាវដល់ប្រជាពលរដ្ឋឱ្យមានការប្រុងប្រយ័ត្នចំពោះបាតុភូតធម្មជាតិខ្យល់កន្ត្រាក់និងរន្ទះ ខណៈស្ថានភាពអាកាសធាតុអាចនឹងមានភ្លៀងធ្លាក់ច្រើននៅតំបន់មួយចំនួនដោយសារឥទ្ធិពលខ្យល់មូសុងនិរតី។
សេចក្ដីជូនដំណឹងរបស់ក្រសួងធនធានទឹក និងឧតុនិយម ចេញផ្សាយនៅថ្ងៃអង្គារនេះ បានលើកឡើងថា ចាប់ពីថ្ងៃទី៩ ដល់ថ្ងៃទី១៥ ខែកញ្ញានេះ ប្រព័ន្ធសម្ពាធទាបបានអូសបន្លាយឆ្លងកាត់ភាគខាងជើងប្រទេសថៃ វៀតណាម និងឡាវ ខណៈខ្យល់មូសុងនិរតីមានល្បឿនមធ្យមបក់មកលើប្រទេសកម្ពុជា។
ក្រសួងបន្តថា ស្ថានភាពនេះនឹងធ្វើឱ្យអាកាសធាតុនៅកម្ពុជាមានភ្លៀងធ្លាក់ក្នុងកម្រិតពីតិចទៅច្រើន នៅតាមបណ្តាខេត្តតំបន់វាលទំនាបកណ្តាល តំបន់ជួរភ្នំដងរែក និងខ្ពង់រាបឦសាន និងតំបន់មាត់សមុទ្រ។
ករណីនេះ ក្រសួងបានអំពាវនាវដល់ប្រជាពលរដ្ឋឱ្យមានការប្រុងប្រយ័ត្នខ្ពស់ចំពោះបាតុភូត ផ្គរ រន្ទះ និងខ្យល់កន្ត្រាក់ ដែលអាចកើតមាននៅផ្នែកមួយចំនួននៃបណ្ដាខេត្តតាមតំបន់វាលទំនាបភាគកណ្តាល៕
