ក្រសួងសាធារណការ និងដឹកជញ្ជូន ក្រើនរំឭកជាថ្មីដល់ប្រជាពលរដ្ឋដែលកំពុងកាន់កាប់យានយន្តទិញលក់តៗគ្នាហើយរកម្ចាស់ដើមមិនឃើញ ប្រញាប់ទៅដាក់ពាក្យស្នើសុំផ្ទេរកម្មសិទ្ធិយានយន្តឱ្យបានមុនចុងខែកញ្ញានេះ។
ក្រសួងបានលើកឡើងក្នុងទំព័រហ្វេសប៊ុកនៅថ្ងៃពុធនេះថា ការផ្ទេរកម្មសិទ្ធិយានយន្តដែលរកម្ចាស់ដើមមិនឃើញ នឹងត្រូវបញ្ចប់ត្រឹមថ្ងៃទី៣០ ខែកញ្ញា ឆ្នាំ២០២០។
ករណីនេះ ក្រសួងបានអំពាវនាវដល់ម្ចាស់យានយន្តដែលមិនទាន់បានផ្ទេរកម្មសិទ្ធិ រួសរាន់ដាក់ពាក្យស្នើសុំឱ្យបានទាន់ពេលវេលា។
ក្រសួងបន្ថែមថា ការផ្ទេរកម្មសិទ្ធិនេះ តម្រូវឱ្យមានឯកសារភ្ជាប់មួយចំនួន រួមមាន ពាក្យស្នើសុំផ្ទេរកម្មសិទ្ធិយានជំនិះនិងសំណៅលេខកាល់ (តួ ឬ សាក់ស៊ី) ដែលបានចម្លងជាក់ស្តែងពីយានយន្ត, ច្បាប់ដើមបណ្ណសម្គាល់យានយន្ត និងផ្លាកលេខសម្គាល់យានជំនិះក្នុងករណីផ្ទេរកម្មសិទ្ធិឆ្លងរាជធានីខេត្ត, វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ, អត្តសញ្ញាណបណ្ណអ្នកលក់និងអ្នកទិញ, បង្កាន់ដៃពន្ធប្រថាប់ត្រាលើការផ្ទេរកម្មសិទ្ធិយានយន្ត, លិខិតទិញលក់និងកិច្ចសន្យាធានាដែលមានបញ្ជាក់ពីប៉ុស្តិ៍នគរបាលរដ្ឋបាល។
ចំពោះទីតាំងដែលត្រូវធ្វើវិញ ក្រសួងបញ្ជាក់ថា នៅមន្ទីរសាធារណការ និងដឹកជញ្ជូនរាជធានី-ខេត្ត តាមអាសយដ្ឋានរបស់ម្ចាស់ចុងក្រោយ។
កាលពីខែកក្កដា ក្រសួងសាធារណការ ធ្លាប់បានជូនដំណឹងពាក់ព័ន្ធនឹងករណីនេះម្តងហើយ និងថា ក្នុងករណីផុតកំណត់រយៈពេលនេះ ក្រសួងតម្រូវឱ្យមានម្ចាស់ដើមមកផ្តិតមេដៃលើសំណុំឯកសារស្នើសុំផ្ទេរកម្មសិទ្ធិយានយន្ត៕