លោកនាយករដ្ឋមន្ត្រី ហ៊ុន សែន បានអំពាវនាវទៅពលរដ្ឋឱ្យបន្តការពារខ្លួនពីការឆ្លងនៃវីរុសកូរ៉ូណា និងប្រាប់ទៅអាជ្ញាធរគ្រប់ជាន់ថ្នាក់ឱ្យថែរក្សាសន្តិសុខនិងសុវត្ថិភាពដល់ប្រជាពលរដ្ឋអំឡុងពិធីបុណ្យភ្ជុំនេះ។
លោក ហ៊ុន សែន បានអំពាវនាវបែបនេះនៅលើទំព័រហ្វេសប៊ុកផ្លូវការរបស់ខ្លួននៅព្រឹកថ្ងៃនេះ ចំពេលដែលពលរដ្ឋកម្ពុជាប្រារព្ធពិធីកាន់បិណ្ឌទី៧ និងមួយសប្ដាហ៍មុនកម្ពុជាឈប់សម្រាករយៈពេល៣ថ្ងៃសម្រាប់ពិធីបុណ្យភ្ជុំបិណ្ឌនាពេលខាងមុខនេះ។
នាយករដ្ឋមន្ត្រីរូបនេះក៏បានប្រាប់ទៅអាជ្ញាធរគ្រប់លំដាប់ថ្នាក់ឱ្យបង្កើនកិច្ចការពារសុវត្ថិភាព សន្តិសុខ សណ្ដាប់ធ្នាប់សាធារណៈ និងចរាចរណ៍ផងដែរ ដោយថា ដើម្បីសម្រួលដល់ពលរដ្ឋក្នុងរដូវបុណ្យទាននេះ។
ទំព័រហ្វេសប៊ុកលោក ហ៊ុន សែន សរសេរថា៖ «កុំធ្វេសប្រហែសឬមើលស្រាលជំងឺកូវីដ-១៩ឱ្យសោះ ព្រោះជាជំងឺឆ្លងរាតត្បាតសាហាវខ្លាំងណាស់ ហើយពុំមានថ្នាំព្យាបាលនៅឡើយទេ»។
គិតមកដល់ថ្ងៃនេះ មនុស្សដល់ទៅ២៧៤នាក់ ត្រូវបានរកឃើញឆ្លងវីរុសកូរ៉ូណានៅក្នុងប្រទេសកម្ពុជា ប៉ុន្តែក្រសួងសុខាភិបាលប្រកាសថា អ្នកជំងឺកូវីដ-១៩ចំនួន១៧៣នាក់ហើយត្រូវបានព្យាបាលជាសះស្បើយ ហើយត្រូវបានអនុញ្ញាតឱ្យចាកចេញពីមន្ទីរពេទ្យ៕
