រដ្ឋបាលខេត្តព្រះសីហនុស្នើសុំជាវិភាគទានពីម្ចាស់លំនៅឋាននិងអាជីវកម្មនានា ដើម្បីដំណើរការគម្រោងសាងសង់បណ្ដាញលូរណប កាលពីថ្ងៃទី៨ ខែកញ្ញា។
វិភាគទាននេះ តម្រូវឱ្យមានការចូលរួមបង់ជាថវិកាក្នុង១ម៉ែត្រតម្លៃ៥៨ដុល្លារឬ៨០ដុល្លារ ទៅតាមកម្រិតទីតាំងផ្សេងគ្នា។
យោងតាមសេចក្ដីជូនដំណឹងរបស់រដ្ឋបាលខេត្តព្រះសីហនុ ក្នុងការបែងចែកកម្រិតទីតាំងនេះ រដ្ឋបាលខេត្តបានចែកជាពីរកម្រិត សម្រាប់ទីតាំងលំនៅឋានប្រជាពលរដ្ឋ ពួកគេត្រូវបង់តាមទំហំក្បាលដីក្នុង១ម៉ែត្រ តម្លៃ៥៨ដុល្លារ។ ចំណែកទីតាំងអាជីវកម្មសណ្ឋាគារ ផ្ទះសំណាក់ ធនាគារ ផ្សារទំនើប ភោជនីយដ្ឋាន អាហារដ្ឋាន កន្លែងលាងរថយន្ត និងអាជីវកម្មនានា ពួកគេត្រូវបង់ក្នុង១ម៉ែត្រ តម្លៃ៨០ដុល្លារ។
ការអំពាវនាវនេះ ធ្វើឡើងបន្ទាប់ពីរដ្ឋបាលខេត្តព្រះសីហនុ ដាក់ចេញនូវគម្រោងសាងសង់ហេដ្ឋារចនាសម្ព័ន្ធផ្លូវទាំង៣៤ខ្សែ និងរៀបចំប្រព័ន្ធលូរណប ទឹកកខ្វក់ និងទឹកភ្លៀង សម្រាប់បង្ហូរទឹកកខ្វក់ចូលក្នុងអាងប្រព្រឹត្តិកម្មទឹកកខ្វក់ស្របទៅតាមបច្ចេកទេស៕
