តំណាងសមាគមគ្រូបង្រៀនកម្ពុជាឯករាជ្យ អះអាងថា ករណីចាប់ខ្លួនមេដឹកនាំសហជីព លោក រ៉ុង ឈុន កំពុងស្ថិតក្រោមការតាមដានពីសំណាក់ស្ថានទូតជប៉ុន បន្ទាប់ពីពួកគេស្នើសុំអន្តរាគមន៍។
កាលពីថ្ងៃអង្គារសប្ដាហ៍មុន ក្រុមយុវជននិងសមាជិកសមាគមគ្រូបង្រៀនកម្ពុជាឯករាជ្យ បានដាក់ញត្តិទៅស្ថានទូតជប៉ុននិងស្ថានទូតអាល្លឺម៉ង់ប្រចាំនៅកម្ពុជា ដើម្បីស្វែងរកអន្តរាគមន៍ក្នុងករណីលោក រ៉ុង ឈុន ដែលត្រូវបានសមត្ថកិច្ចចាប់ខ្លួនកាលពីចុងខែកក្កដាកន្លងមកនេះ។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី បានប្រាប់វីអូឌីនៅថ្ងៃនេះថា អ្នកស្រីនិងមនុស្ស២រូបទៀត ត្រូវបានអនុញ្ញាតឱ្យជួបមន្ត្រី៤រូបប្រចាំនៅស្ថានទូតជប៉ុន រយៈពេលជាង៣០នាទីកាលពីរសៀលថ្ងៃម្សិលមិញនេះ។
អ្នកស្រី អ៊ុក ឆាយ៉ាវី អះអាងថា មន្ត្រីស្ថានទូតជប៉ុនបានឆ្លើយតបនឹងសំណើរបស់សមាគមដែលស្នើឱ្យជួយក្នុងករណីចាប់ខ្លួនលោក រ៉ុង ឈុន នេះ។
អ្នកស្រី អ៊ុក ឆាយ៉ាវី ប្រាប់ថា៖ «គេថា គេកំពុងតែតាមដាន ហើយនិងយកចិត្តទុកដាក់ ហើយគេនឹងទៅជជែកជាមួយរដ្ឋាភិបាល ដើម្បីឱ្យមានការដោះលែង»។
នៅពេលសួរថា តើអ្នកស្រីបានជួបជជែកជាមួយនរណាខ្លះនោះ អ្នកស្រី អ៊ុក ឆាយ៉ាវី ប្រាប់ថា អ្នកស្រីមិនបានចាំឈ្មោះមន្ត្រីស្ថានទូតជប៉ុននោះឡើយ។
អ្នកស្រីបានបន្ថែមថា ក្រុមរបស់អ្នកស្រីបានស្នើបន្ថែមដល់ស្ថានទូតជប៉ុនក្នុងការពន្លឿនការដោះលែងលោក រ៉ុង ឈុន និងយុវជនដែលជាប់ពន្ធនាគារដោយអយុត្តិធម៌។
លោក រ៉ុង ឈុន ដែលជាអតីតប្រធានសមាគមគ្រូបង្រៀនកម្ពុជាឯករាជ្យ ត្រូវបានសមត្ថកិច្ចចាប់ខ្លួនកាលពីយប់ថ្ងៃទី៣១ ខែកក្កដា ពាក់ព័ន្ធនឹងការលើកឡើងរបស់លោកថា ការបោះបង្គោលព្រំដែននៅខេត្តត្បូងឃ្មុំ បានបណ្ដាលឱ្យដីស្រែរបស់ពលរដ្ឋបាត់បង់ទៅខាងវៀតណាម៕
