ក្រុមមន្ត្រីជំនាញក្រសួងបរិស្ថាន បានរកឃើញផូស៊ីលខ្យងសមុទ្រចំនួនពីរដែលមានអាយុកាលរាប់ពាន់ឆ្នាំ នៅចំណុចល្អាងភ្នំប្រាំពីរ និងភ្នំវាលចាប ស្ថិតក្នុងស្រុកភ្នំព្រឹក ខេត្តបាត់ដំបង។
ប្រធានមន្ទីរបរិស្ថានខេត្តបាត់ដំបង លោក កត់ បូរិន មានប្រសាសន៍កាលពីថ្ងៃអង្គារថា ក្រុមការងារអគ្គនាយកដ្ឋានសហគមន៍មូលដ្ឋាន បានរកឃើញផូស៊ីលខ្យងនេះ កាលពីថ្ងៃទី៥ ខែកញ្ញា និងកំពុងធ្វើការសិក្សាស្រាវជ្រាវបន្ថែមដោយក្រុមអ្នកជំនាញជាតិនិងអន្តរជាតិ។
លោកបានបន្តថា៖ «ផូស៊ីលដែលបានរកឃើញនេះ វាអាចឱ្យយើងសន្និដ្ឋានបានថា ប្រទេសរបស់យើងកាលពីមុនគឺសិ្ថតនៅក្រោមបាតសមុទ្រ»។
លោកបានបន្ថែមថា ក្រោយការស្រាវជ្រាវរួច មន្ត្រីជំនាញនឹងបញ្ជូនផូស៊ីលទាំងនេះទៅតម្កល់ទុកនៅសារមន្ទីររបស់ក្រសួងបរិស្ថាន៕
